ປີໃໝ່ນາຍົກເນັ້ນຫລາຍວຽກໃຫ້ສະມາຊິກລັດຖະບານເອົາໃຈໃສ່

- PM thongloun - ປີໃໝ່ນາຍົກເນັ້ນຫລາຍວຽກໃຫ້ສະມາຊິກລັດຖະບານເອົາໃຈໃສ່
- Untitled design - ປີໃໝ່ນາຍົກເນັ້ນຫລາຍວຽກໃຫ້ສະມາຊິກລັດຖະບານເອົາໃຈໃສ່

ທ່ານນາຍົກລັດຖະມົນຕີ ທອງລຸນ ສີສຸລິດ ໄດ້ເນັ້ນໃຫ້ສະມາຊິກລັດຖະບານຈົ່ງສືບຕໍ່ເອົາໃຈໃສ່ປະຕິບັດວຽກງານຈຸດສຸມໃນປີ 2018 ໃຫ້ມີປະສິດທິຜົນສູງກວ່າເກົ່າ, ເພື່ອຮັບປະກັນໃຫ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມໃນປີໃໝ່ທີ່ຈະມາເຖິງນີ້ບັນລຸຄາດໝາຍວາງໄວ້ຄື: ສືບຕໍ່ເອົາໃຈໃສ່ສ້າງແຜນແມ່ບົດຈັດສັນລະບຽບສັງຄົມໃຫ້ສໍາເລັດໂດຍໄວ, ເພື່ອເປັນແນວທາງໃນການແກ້ໄຂບັນຫາປາກົດການຫຍໍ້ທໍ້ຕ່າງໆໃນສັງຄົມ ເຊັ່ນ: ບັນຫາຢາເສບຕິດ, ອຸປະຕິເຫດ, ອັກຄີໄພ, ປຸ້ນຈີ້-ຊິງຊັບ,​ ລັກຊັບ ແລະ ສະພາບການທີ່ບໍ່ດີຕ່າງໆໃຫ້ໝົດໄປ. ສືບຕໍ່ຕິດຕາມຢ່າງໃກ້ຊິດກ່ຽວກັບສະພາບການຂອງພາກພື້ນ ແລະ ສາກົນ ທີ່ພວມຜັນແປໄປຢ່າງສະຫລັບຊັບຊ້ອນ ແລະ ອາດມີຜົນກະທົບຕໍ່ດ້ານການເມືອງ, ​ເສດຖະກິດ-ສັງຄົມຢູ່ປະເທດເຮົາ ແລະ ກຽມຄວາມພ້ອມປ້ອງກັນ ຄວາມສ່ຽງຕ່າງໆທີ່ອາດເກີດຂຶ້ນໃຫ້ທັນເວລາ, ໃຫ້ທຸກຂະແໜງການເສດຖະກິດເລັ່ງເຜີຍແຜ່ ແລະ ຊຸກຍູ້ການຈັດຕັ້ງປະຕິບັດດໍາລັດວ່າດ້ວຍການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ,​ ແຜນງົບປະມານແຫ່ງລັດປີ 2018 ໃຫ້ທົ່ວເຖິງ, ເຊິ່ງດໍາລັດດັ່ງກ່າວໄດ້ກໍານົດບັນດາຄາດໝາຍສູ້ຊົນ ແລະ ວຽກງານຈຸດສຸມຂອງລັດຖະບານຫລາຍດ້ານຄື: ການຊຸກຍູ້ການເຕີບໂຕຂອງເສດຖະກິດ, ການຄຸ້ມຄອງການເງິນ-ງົບປະມານ-ເງິນຕາ, ປັບປຸງສະພາບແວດລ້ອມການດໍາເນີນທຸລະກິດ, ຊຸກຍູ້ສົ່ງເສີມການຜະລິດ ແລະ ບໍລິການ, ພັດທະນາທາງດ້ານວັດທະນາທໍາ-ສັງຄົມ ແລະ ແກ້ໄຂຄວາມທຸກຍາກ, ການຄົ້ນຄວ້າ ແລະ ຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ, ການບໍລິຫານລັດ, ການເຄື່ອນໄຫວຂອງຜູ້ປະກອບການ,​ ການປັບປຸງນິຕິກໍາ ແລະ ການສ້າງສະພາບແວດລ້ອມທີ່ດີໃຫ້ແກ່ການພັດທະນາ. ໃຫ້ເອົາໃຈໃສ່ການຊຸກຍູ້ການຈັດຕັ້ງປະຕິບັດບັນດາໂຄງການຮ່ວມມືກັບປະເທດເພື່ອນມິດ ແລະ ສາກົນ ເປັນຕົ້ນ: ການຊ່ວຍເຫລືອຂອງ ສປຈີນ, ສສ ຫວຽດນາມ, ໂຄງການທີ່ສະພາແຫ່ງຊາດໄດ້ຮັບຮອງແລ້ວໃຫ້ຮີບຮ້ອນປະສານສົມທົບກັບຜູ້ໃຫ້ທຶນກູ້ຢືມ ເພື່ອຈັດຕັ້ງປະຕິບັດໂດຍໄວ ແລະ ເນັ້ນໃສ່ໂຄງການທີ່ມີປະສິດທິຜົນເພື່ອບໍ່ໃຫ້ມີໜີ້ສີນເພີ່ມຂຶ້ນ. ສ່ວນບັນດາໂຄງການລົງທຶນຂະໜາດໃຫຍ່ທີ່ພວມດໍາເນີນຢູ່ນີ້ ເປັນຕົ້ນ: ໂຄງການກໍ່ສ້າງເສັ້ນທາງລົດໄຟລາວ-ຈີນ,​ ໂຄງການພັດທະນາຕາມນະໂຍບາຍ 1 ແລວທາງ 1 ເສັ້ນທາງ, ການພັດທະນາເຂດເສດຖະກິດພິເສດ ແລະ ໂຄງການອື່ນໆ ແມ່ນສຶບຕໍ່ຊຸກຍູ້ການຈັດຕັ້ງປະຕິບັດໃຫ້ໄປຕາມແຜນການວາງໄວ້. ນອກນີ້, ຕ້ອງເອົາໃຈໃສ່ປັບປຸງສະພາບແວດລ້ອມຂອງການດໍາເນີນທຸລະກິດ, ໂດຍສະເພາະສຸມໃສ່ແກ້ບັນຫາຄວາມບໍ່ສະດວກໃນການດໍາເນີນທຸລະກິດ ແລະ ການອະນຸມັດການລົງທຶນຜ່ານປະຕູດຽວໃຫ້ວ່ອງໄວ, ໂປ່ງໃສ ແລະ ສອດຄ່ອງຕາມລະບຽບກົດໝາຍ, ພ້ອມທັງສືບຕໍ່ປະຕິບັດແຜນພັດທະນາວິສາຫະກິດຂະໜາດນ້ອຍ ແລະ ກາງ ທີ່ລັດຖະບານໄດ້ປະກາດໃຊ້ແລ້ວນັ້ນໃຫ້ມີປະສິດທິຜົນດີ ເພື່ອຊຸກຍູ້ໃຫ້ວິສາຫະກິດດັ່ງກ່າວມີຄວາມເຂັ້ມແຂງເທື່ອລະກ້າວ. ພ້ອມນີ້, ກໍໃຫ້ ສືບຕໍ່ຄຸ້ມຄອງ ແລະ ແກ້ໄຂການລົງທຶນ, ເຄື່ອນໄຫວທຸລະກິດ ແລະ ບໍລິການຕ່າງໆທີ່ບໍ່ສອດຄ່ອງກັບລະບຽບກົດໝາຍ, ໂດຍສະເພາະແມ່ນການລັກລອບຂຸດຄົ້ນ ແລະ ສົ່ງອອກໄມ້, ການລັກລອບຂຸດຄົ້ນແຮ່ທາດ ແລະ ຊັບພະຍາກອນທໍາມະຊາດໃຫ້ໄດ້ຮັບການແກ້ໄຂຢ່າງຂາດຕົວ.

ການເນັ້ນຕໍ່ບັນຫາສໍາຄັນດັ່ງກ່າວ, ມີຂຶ້ນກອງປະຊຸມລັດຖະບານປະຈໍາເດືອນທັນວາ 2017,​ ໂດຍການເປັນປະທານຂອງທ່ານນາຍົກລັດຖະມົນຕີ.

- Wave100S AD to Website 2020 0 - ປີໃໝ່ນາຍົກເນັ້ນຫລາຍວຽກໃຫ້ສະມາຊິກລັດຖະບານເອົາໃຈໃສ່
- WhatsApp Image 2020 05 27 at 5 - ປີໃໝ່ນາຍົກເນັ້ນຫລາຍວຽກໃຫ້ສະມາຊິກລັດຖະບານເອົາໃຈໃສ່
- WhatsApp Image 2020 05 27 at 5 - ປີໃໝ່ນາຍົກເນັ້ນຫລາຍວຽກໃຫ້ສະມາຊິກລັດຖະບານເອົາໃຈໃສ່
error: Alert: ເນື້ອຫາຂ່າວມີລິຂະສິດ !!