ນະຄອນຫລວງ​ວຽງຈັນເລັ່ງສະກັດກັ້ນສິ່ງ​ຫຍໍ້​ທໍ້​ໃນ​ສັງຄົມໃຫ້ຜ່ອນຜັນລົງ

- Untitled design - ນະຄອນຫລວງ​ວຽງຈັນເລັ່ງສະກັດກັ້ນສິ່ງ​ຫຍໍ້​ທໍ້​ໃນ​ສັງຄົມໃຫ້ຜ່ອນຜັນລົງ

​ໃນ​ກອງ​ປະຊຸມຫັນກໍາລັງລົງກໍ່ສ້າງຮາກຖານປ້ອງກັນຄວາມສະຫງົບສົກປີ 2017-2018 ຢູ່ນະຄອນຫລວງ​ວຽງຈັນເມື່ອບໍ່ດົນ​ມານີ້, ​ໄດ້​ວາງຄາ​ດໝາຍໄວ້ວ່າ: ຕ້ອງຮັບປະກັນ​ໃຫ້ນະຄອນຫລວງ​ວຽງຈັນ​ມີ​ຄວາມ​ສະຫງົບ ​ແລະ ມີ​ຄວາມ​ປອດ​ໄພ​ຮອບດ້ານຕາມຄໍາຂວັນ 3 ຫລຸດຂອງເຈົ້າຄອງວາງອອກຄື: ຫລຸດຜ່ອນອຸປະຕິເຫດ, ຫລຸດຜ່ອນບັນຫາຢາເສບຕິດ ແລະ ຫລຸດຜ່ອນອັກຄີໄພໃຫ້ປະກົດຜົນເປັນຈິງ, ນອກນີ້ກໍໃຫ້ເອົາໃຈໃສ່ແກ້ໄຂບັນຫາການລັກລອບເຂົ້າ-ອອກເມືອງ ແລະ ການປະກອບອາຊີບຜິດກົດໝາຍ, ລວມທັງແກ້ໄຂການກໍ່ອາດຊະຍາກໍາທຸກຮູບແບບໃຫ້ຫລຸດລົງ ແລະ ນີ້​ແມ່ນ​ຄຳ​ຊີ້ນຳ​ເດັດຂາດຂອງທ່ານເຈົ້າ​ຄອງ ເພື່ອ​ໃຫ້​ກຳລັງ​ເຈົ້າໜ້າທີ່​ມີ​ຄວາມ​ຫ້າວ​ຫັ້ນ​ປະຕິບັດໜ້າທີ່​ວຽກງານ ຂອງຕົນມີຜົນສໍາເລັດ, ຮັບປະກັນໃຫ້ນະຄອນຫລວງວຽງຈັນມີສະຖຽນລະພາບດ້ານການເມືອງໜັກແໜ້ນ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານ.

ທ່ານຮອງ​ຫົວໜ້າກອງ​ບັນຊາ​ການ ປກສ ນະຄອນຫລວງ​ວຽງຈັນ ​ໄດ້​ເປີດ​ເຜີຍ​ໃນ​ກອງ​ປະຊຸມ​ກຳມາ​ທິການງານ​ປ້ອງ​ກັນຊາ​ດ-ປ້ອງ​ກັນ​ຄວາມ​ສະຫງົບສະພາ​ປະຊາຊົນນະຄອນຫລວງ​ວຽງຊຸດ​ທີ I ​ເມື່ອ​ບໍ່ດົນ​ມານີ້ວ່າ: ສະພາບ​ກໍ່ການ​ກະທຳ​ຜິດ​ທາງ​ອາຍາຢູ່ນະຄອນຫລວງ​ວຽງຈັນ​ແມ່ນ​ຍັງ​ສືບຕໍ່ມີ​ລັກສະນະ​​ເປີດ​ແປນ​ເຊັ່ນ: ປຸ້ນ​ຈີ້ຊີງ​ຊັບ, ລັກ​ຊັບ, ການຄ້າ​ມະນຸດ​ຂ້າມ​ຊາດ, ບັນຫາ​ຢາ​ເສບ​ຕິດ ​ແລະ ອື່ນໆຄື: ​ໃນ​ປີ 2017 ນີ້ຢູ່ນະຄອນຫລວງ​ວຽງຈັນມີ​ປະກົດ​ການ​ຫຍໍ້ໍ້ທໍ້​ເກີດ​ຂຶ້ນກ່ວາ 5 ພັນ​ເລື່ອງ, ພົ້ນ​ເດັ່ນ​ແມ່ນ​ເຫດ​ຄາດ​ຕະກຳມີ 16 ​ເລື່ອງ, ລັກ​ຊັບ 1.183 ​ເລື່ອງ, ມົ້ວ​ສຸມ ​ແລະ ຄ້າຂາຍ​ຢາ​ເສບ​ຕິດ 900 ກວ່າ​ເລື່ອງ, ອຸປະຕິ​ເຫດ​ 1.547 ຄັ້ງ, ມີ​ຜູ້​ເສຍ​ຊີວິດ 251 ຄົນ, ອັກຄີ​ໄພ​ເກີດ​ຂຶ້ນ 50 ກວ່າ​ຄັ້ງ ​ແລະ ຄະດີ​ອື່ນໆ,​ ຊຶ່ງ​ໄດ້​ສ້າງຄວາມ​ເສຍ​ຫາຍມີລົດຈັກ 913 ຄັນ, ລົດ​ໃຫຍ່ 13 ຄັນ ​ແລະ ຊັບ​ສິນ​ອື່ນໆ ລວມມູນ​ຄ່າ​ຫລາຍ​ຕື້ກີບ.

ທ່ານຮ​ອງຫົວໜ້າກອງ​ບັນຊາ​ການ ​ໃຫ້​ຮູ້​ວ່າ: ເພື່ອຮັບປະກັນ​ຄວາມສະຫງົບ ແລະ ຄວາມ​ເປັນ​ລະບຽບຮຽບຮ້ອຍໃນປີໃໝ່ນີ້, ​ກຳລັງ​ເຈົ້າໜ້າທີ່​ຕ້ອງໄດ້ເພີ່ມ​ທະວີ​ສະກັດ​ກັ້ນດ້ວຍການເລັ່ງໃສ່​ປະຕິບັດ​ຕາມ 4 ​​ໂຄງການ​ຄື: (1) ໂຄງການ​ສະກັດ​ກັ້ນ ​ແລະ ປາບ​ປາມ​ການ​ຜະລິດ ​ແລະ ຄ້າຂາຍ​ຢາ​ເສບ​ຕິດຕາມຄໍາສັ່ງເລກທີ 22/ຄລພສ, ໃຫ້ເພີ່ມທະວີລົງສົມທົບ​ກັບ​ອຳນາດ​ການ​ປົກຄອງ​ບ້ານ ​ເພື່ອ​ປຸກ​ລະດົມ​ທຸກ​ຊັ້ນ​ຄົນ​ເຂົ້າ​ມາ​ມີ​ສ່ວນ​ຮ່ວມ​ແກ້​ໄຂບັນຫາ​ຢາ​ເສບ​ຕິດ ​ແລະ ການ​ຂຶ້ນບັນຊີ​ເປົ້າໝາຍຂອງ​ເຈົ້າໜ້າທີ່. ​(2) ໂຄງການ​ປ້ອງ​ກັນ​ສະກັດ​ກັ້ນ ​ແລະ ​ແກ້​ໄຂ​ອຸປະຕິ​ເຫດ​ໃນ​ທ້ອງ​ຖະໜົນ, ​​ໂດຍເອົາ​ໃຈ​ໃສ່​ວຽກງານ​ໂຄສະນາ​ເຜີຍ​ແຜ່​ກົດ​ລະບຽບຈະລາຈອນ​ໃຫ້​ສຳນັກງານ, ​ໂຮງຮຽນ ​ແລະ ສະ​ຖາ​ບັນຫາ​ສຶກສາ​ໃຫ້​ທົ່ວ​ເຖິງ ​ແລະ ຈັດ​ຕັ້ງໜ່ວຍສະ​ເພາະ​ກິດ​ສາຍ​ກວດ​ອອກ​ກວດກາ​ລາດຕະ​ເວນ​ຕາມ​ສາຍ​ທາງ​ທີ່​ສຳຄັນບໍ່​ໃຫ້​ຈອດ​ລົດ​ຊະຊາຍ​ກິດ​ຂວາງ​ການ​ສັນຈອນ. (3) ​ໂຄງການ​ສະກັດ​ກັ້ນ ​ແລະ ​ແກ້​ໄຂ​ອັກຄີ​ໄພ ​ແມ່ນ​ສືບຕໍ່ລົງ​ກວດກາ​ຢູ່​ບັນ​ດາ​ສຳນັກງານ ອົງການ​,​ໂຮງ​ຈັກ-​ໂຮງງານ, ຫົວໜ່ວຍທຸລະ​ກິດ ແລະ ​ເຮືອນ​ປະຊາຊົນ​ໃຫ້​ມີ​ສະຕິ​ໃນ​ການ​ນຳ​ໃຊ້​ຟືນ​ໄຟ ​ແລະ ​ເລັ່ງສ້າງ​ຕັ້ງ​ສະຖານີ​ມອດ​ໄຟ​ເພີ່ມ​ຢູ່​ຈຸດ​ທີ່​ຈຳ​ເປັນ ​ເພື່ອ​ກຽມຄວາມ​ພ້ອມ​ໃຫ້​ແກ່​ການ​ສະກັດ​ກັ້ນ ​ແລະ ຕ້ານ​ອັກຄີ​ໄພ​ໃຫ້​ທັນ​ເວລາ.

- Wave100S AD to Website 2020 0 - ນະຄອນຫລວງ​ວຽງຈັນເລັ່ງສະກັດກັ້ນສິ່ງ​ຫຍໍ້​ທໍ້​ໃນ​ສັງຄົມໃຫ້ຜ່ອນຜັນລົງ

ທ່ານຫົວໜ້າກອງບັນຊາການ ປກສ ນະຄອນຫລວງ ໃຫ້ຮູ້ອີກວ່າ: ປັດຈຸບັນ, ໄດ້ຫັນກໍາລັງ ປກສ ລົງກໍ່ສ້າງຮາກຖານຈໍານວນ 544 ຄົນ, ໃນນັ້ນຈາກກະຊວງ 266 ຄົນ, ກໍາລັງມາຈາກບັນດາແຂວງ 34 ຄົນ ແລະ ປກສ ນະຄອນຫລວງ 244 ຄົນ, ໂດຍສຸມໃສ່ 339 ບ້ານເປົ້າ ໝາຍ, 42 ກຸ່ມບ້ານ ແລະ 7.709 ໜ່ວຍ ​ເພື່ອ​ຮັບປະກັນໃຫ້ການຈັດຕັ້ງປະຕິບັດຄຳ​ຂັວນ 3 ຫລຸດ ຂອງ​ທ່ານ​ເຈົ້າ​ຄອງ​​ໄດ້​ປາກົດ​ຜົນ​ເປັນ​ຈິງ.

- WhatsApp Image 2020 05 27 at 5 - ນະຄອນຫລວງ​ວຽງຈັນເລັ່ງສະກັດກັ້ນສິ່ງ​ຫຍໍ້​ທໍ້​ໃນ​ສັງຄົມໃຫ້ຜ່ອນຜັນລົງ
- WhatsApp Image 2020 05 27 at 5 - ນະຄອນຫລວງ​ວຽງຈັນເລັ່ງສະກັດກັ້ນສິ່ງ​ຫຍໍ້​ທໍ້​ໃນ​ສັງຄົມໃຫ້ຜ່ອນຜັນລົງ
error: Alert: ເນື້ອຫາຂ່າວມີລິຂະສິດ !!