ຮ່ວມກັນສົ່ງທ້າຍປີເກົ່າ-ຕ້ອນຮັບປີໃໝ່ດ້ວຍຈິດໃຈປະຢັດ

- happy new year 2018 images 1 - ຮ່ວມກັນສົ່ງທ້າຍປີເກົ່າ-ຕ້ອນຮັບປີໃໝ່ດ້ວຍຈິດໃຈປະຢັດ
- Untitled design - ຮ່ວມກັນສົ່ງທ້າຍປີເກົ່າ-ຕ້ອນຮັບປີໃໝ່ດ້ວຍຈິດໃຈປະຢັດ

ປີ ຄສ 2017 ພວມຈະໂບກບິນໄປຈາກພວກເຮົາ ແລະປີໃໝ່ ຄສ 2018 ກໍເຂົ້າມາແທນທີ່, ພວກເຮົາຈົ່ງພ້ອມກັນເບີກ ບານມ່ວນຊື່ນກັບຜົນການເຄື່ອນໄຫວໃນຮອບປີຜ່ານມາ ແລະທົບທວນຄືນຂໍ້ຄົງຄ້າງເພື່ອແກ້ໄຂແລ້ວກ້າວສູ່ປີໃໝ່ ດ້ວຍຈິດໃຈໃໝ່, ໄຊຊະນະໃໝ່, ໃຫຍ່ຫຼວງກ່ວາເກົ່າ ຕິດພັນກັບນະໂຍບາຍ-ຄຳສັ່ງປະຢັດຂອງລັດຖະບານ ແລະໃນປີນີ້ກໍຢູ່ໃນທ່າມກາງບັນຍາກາດທີ່ທົ່ວທັງຊາດມີຄວາມເອກອ້າງທະນົງໃຈຕໍ່ຜົນສໍາເລັດອັນໃຫຍ່ຫຼວງຫຼາຍດ້ານ ພາຍໃຕ້ການນໍາພາຂອງພັກ ແລະລັດຖະບານເຮົາທີ່ສາມາດຂັບເຄື່ອນປະເທດສູ່ຜົນສໍາເລັດ ໂດຍສະເພາະການແກ້ໄຂບັນຫາຄົງຄ້າງທີ່ຕົກທອດຈາກອະດີດ ເຮັດໃຫ້ກົງຈັກການຈັດຕັ້ງກະທັດຮັດ, ໂປ່ງໃສ ເຂັ້ມແຂງ ແລະໜັກແໜ້ນ, ຕີຖອຍສະພາບການຢຸດຈຶ້ງສະຫງັກງັນ ແລະສ້າງໃຫ້ມີໂສມໜ້າໃໝ່ ໂດຍຖືຜົນປະໂຫຍດຂອງຊາດ, ຂອງປະຊາຊົນເປັນກົກ.

ໃນຕະຫຼອດປີ 2017 ນີ້ ທຸກຢ່າງມັນຄົງເຫຼືອໄວ້ແຕ່ອະດີດ ເຊິ່ງມີຫຼາຍຄົນຄົງຈະພົບກັບຄວາມສຸກສົມຫວັງ, ມີຮອຍຍິ້ມທີ່ອີ່ມເອີບ, ພົບກັບຄວາມທ່ຽງແທ້ ແລະຜົນສໍາເລັດໃນໜ້າທີ່ການງານ ແລະຊີວິດສ່ວນຕົວ ແຕ່ຊີວິດຂອງທຸກຄົນບໍ່ໄດ້ຫວ່ານໂຮຍດ້ວຍກີບກຸຫຼາບສະເໝີໄປ ແລະຍັງມີຄົນອີກຈໍານວນບໍ່ໜ້ອຍທີ່ຍັງຢູ່ກັບຄວາມຫວ່າງເປົ່າ, ລະທົມຂົມຂື໋ນ…ແຕ່ທຸກຢ່າງທີ່ບໍ່ເປັນສິຣິມຸງຄຸນ ຂໍໃຫ້ປັດປ່າຍຈາງຫາຍອອກຈາກຊີວິດຕາມການເວລາ, ຂໍໃຫ້ ປີ 2018 ເປັນປີມະຫາໄຊຂອງທຸກທ່ານທີ່ຢູ່ບົນໂລກໜ່ວຍນີ້, ປີໃໝ່ຂໍໃຫ້ມີອາຍຸ ວັນນະ ສຸຂະ ພະລະ ຕະຫຼອດກັນທຸກຄົນ ແລະຂໍເງິນຄໍາຈົ່ງຫຼັ່ງໄຫຼມາເໝືອນດັ່ງນໍ້າຂອງຍາມເດືອນເກົ້າ ແຕ່ຂໍໃຫ້ເປັນຊັບທີ່ສະອາດ.

ການສະຫຼອງບຸນ ຫຼື ເທສະການຕ່າງໆ ມີເປົ້າໝາຍ ເພື່ອພົບປະສ້າງສັນດ້ວຍບັນຍາກາດເບີກບານມ່ວນຊື່ນ ເຊິ່ງທຸກຢ່າງມັນບໍ່ຂຶ້ນກັບເງິນຄໍາແຕ່ມັນຂຶ້ນກັບຈິດໃຈ ໂດຍທົ່ວໄປແມ່ນເພີ່ມຄວາມສາມັກຄີລະຫວ່າງຂັ້ນລຸ່ມກັບຂັ້ນເທິງ, ລະ ຫວ່າງຄອບຄົວກັບຄອບຄົວ ຫຼື ຊຸມຊົນ ກັບຍາດພີ່ນ້ອງໃນວົງຄະນະຍາດແຫ່ງຊາດ, ເທສະການປີໃໝ່-ການພົບປະຕ່າງໆຕ້ອງມີການວາງກອບ ຫຼື ມີປະຕິທິນຢ່າງຮັດກຸມ ຕິດພັນກັບການປະຢັດ, ຕ້ອງພ້ອມກັນຮັດສາຍແອວບົນຈິດໃຈຄໍາສັ່ງຂອງນາຍົກລັດຖະມົນຕີວ່າດ້ວຍການປະຢັດ, ຫຼ້າສຸດແຈ້ງການເລກທີ 1965/ຫສນຍ, ວັນທີ 21 ທັນວາ 2017 ຂອງຫ້ອງ ວ່າການສຳນັກງານນາຍົກລັດຖະມົນຕີກ່ຽວກັບ ບໍ່ໃຫ້ການນໍາເຮັດບັດອວາຍພອນປີໃໝ່ ແນໃສ່ຊຸກຍູ້ສົ່ງເສີມປະຊາຊົນບັນ ດາເຜົ່າ-ທຸກຊັ້ນຄົນໃນຊາດມີສະຕິຕື່ນຕົວ, ເປັນເຈົ້າການປະກອບສ່ວນເຂົ້າໃນການປະຢັດຕ້ານການຟູມເຟືອຍໃນການຊົມ ໃຊ້ຊັບສິນຂອງລັດ-ຂອງສ່ວນຕົວ, ຊັບພະກອນທໍາມະຊາດ, ພາຫະນະ, ວັດຖຸສິ່ງຂອງ ແລະເວລາເພື່ອສະສົມທຶນຮອນໄວ້ພັດທະນາຄອບຄົວ, ຊາດບ້ານເມືອງ ແລະ ສ້າງອະນາຄົດທີ່ສົດໃສໄວ້ໃຫ້ແກ່ລູກຫຼານສືບທອດຕໍ່ໄປ.

ການພົບປະສ້າງສັນ ຕ້ອງເຮັດແບບກະທັດຮັດ, ບໍ່ໃຫຍ່ໂຕຫຼູຫຼາ, ບໍ່ຟູມເຟືອຍຊັບສິນເງິນຄໍາ-ຊັບພະຍາກອນ ແລະເວລາ, ຢ່ານໍາເຄື່ອງຕ້ອນຂອງຝາກທີ່ເປັນການຊື້ໃຈ, ຊື້ໜ້າທີ່ ຕໍາແໜ່ງ ຫຼື ຊື້ຜົນປະໂຫຍດທຸກເລື່ອງ ເພາະໃນຜ່ານມາຍັງມີບາງແຫ່ງ, ບາງຄົນໃນກົງຈັກລັດ ໄດ້ຖືໂອກາດນີ້ຮັບເອົາຂອງຂັວນອັນໃຫຍ່ໂຕ ເພື່ອແລກກັບຖານະ, ຕໍາແໜ່ງ, ໂຄງການ… ອື່ນໆ, ອີກບັນຫາໜຶ່ງທີ່ສໍາຄັນ ເຈົ້າໜ້າທີ່ທີ່ກ່ຽວຂ້ອງຕ້ອງກວດກາ ແລະຄຸມເຂັ້ມສິນຄ້າທຸກປະເພດ ລວມທັງສິນຄ້າຂອງ ຂັວນທີ່ໝົດອາຍຸ, ເສຍຄຸນ, ລາຄາແພງ, ເອົາປຽບລູກຄ້າ ນັບທັງຄ່າລົດໂດຍສານ ແລະລາຄາສິນຄ້າໃນທ້ອງຕະຫຼາດ ຢ່າໃຫ້ເໜັງຕີງ; ການສະຫຼອງປີໃໝ່ ຄວນປະຢັດເງິນ-ປະຢັດເວລາ ແລະຕ້ອງປະຢັດອາຍຸສັງຂານໃຫ້ຍືນຍາວ, ໝົດປີເກົ່າເຂົ້າມາປີໃໝ່ກໍໃຫ້ເຫັນໜ້າກັນ, ບໍ່ຄວນດື່ມເຫຼົ້າເບຍເກີນໄປ ຈະເຮັດໃຫ້ສຸຂະພາບອ່ອນເພຍ ເສຍເງິນຄໍາ ບໍ່ສາມາດເຮັດວຽກງານຕາມປົກກະຕິ, ຮ້າຍແຮງກ່ວານັ້ນ ການດື່ມສິ່ງມືນເມົາມັກ​ຈະພາໃຫ້ເກີດອຸປະຕິເຫດຕາມທ້ອງຖະໜົນຕາມ​ມາ​ກໍ​ເປັນ​ໄດ້ ຄືສະເພາະປີ 2017  ມີອຸປະຕິເຫດເກີດຂຶ້ນເສຍຊີວິດເກືອບຫຼັກ 1.000 ແລ້ວ, ພາຫະນະເປ່ເພເປັນຈໍານວນຫຼວງຫຼາຍ ແລະກໍ່ໃຫ້ເກີດຄວາມບໍ່ສະຫງົບໃນສັງຄົມ, ນອກນັ້ນ ຄວນປະຕິບັດຫຼັກການອະນາໄມ 3 ສະອາດ, ອອກກໍາລັງກາຍ, ຫຼຸດ-ເລີກດື່ມສິ່ງມືນເມົາ​ເພື່ອຊີວິດຈະຍືນຍາວ.

ການຂັບຂີ່ລົດ ຕ້ອງປະຕິບັດກົດຈາລະຈອນຢ່າງເຂັ້ມງວດ “ ເມົາບໍ່ຂັບ ”, ການເດີນທາງໄກກໍຕ້ອງລະມັດລະວັງ, ດ້ານລົດໂດຍສານ ຕ້ອງປະຕິບັດກົດຈາລະຈອນຢ່າງເຂັ້ມງວດ, ຕ້ອງຮັບປະກັນທັງສຸ ຂະພາບ ແລະ ເຕັກນິກລົດ, ການບໍລິການ ຕ້ອງຢືນຢູ່ໃນຈັນຍາບັນນັກຂັບຂີ່, ຫ້າມຮັບຄົນໂດຍສານແລະສິ່ງຂອງເກີນກ່ວາເຈົ້າໜ້າທີ່ກໍານົດໄວ້, ກ່ອນຈະອອກໄປທ່ຽວ ຫຼື ອອກຈາກບ້ານເຮືອນ ຕ້ອງປະຕິບັດ 3 ປິດ ຄື: ປິດນໍ້າ-ປິດໄຟ ແລະປິດປະຕູໃຫ້ດີ, ຄັກແທ້ກໍມີຄົນຢູ່ຄົນໄປ ແລະໃນຂະນະດຽວກັນເຈົ້າໜ້າທີ່ທຸກພາກສ່ວນ ຕ້ອງເພີ່ມທະວີໃນການປົກປັກຮັກສາບ້ານຊ່ອງຢ່າງເຂັ້ມງວດ.

- Wave100S AD to Website 2020 0 - ຮ່ວມກັນສົ່ງທ້າຍປີເກົ່າ-ຕ້ອນຮັບປີໃໝ່ດ້ວຍຈິດໃຈປະຢັດ

ໃນໂອກາດທີ່ເປັນສິຣິມຸງຄຸນນີ້ ຂໍສະແດງຄວາມຮູ້ບຸນອັນລົ້ນເຫຼືອ ແລະຂໍອວຍພອນໄຊອັນປະເສີດ ມາຍັງບັນດາທ່ານຜູ້ນໍາພັກ-ລັດ ຈົ່ງມີອາຍຸໝັ້ນຍືນຍາວ ສືບຕໍ່ຊີ້ນໍານໍາພາປະເທດຊາດ ແລະປະຊາຊົນລາວ ສູ່ຄວາມວັດທະນາຖາວອນ, ຂໍອວຍພອນໃຫ້ພີ່ນ້ອງຮ່ວມຊາດທັງຫຼາຍຈົ່ງມີສຸຂະພາບແຂງແຮງ, ມີຊັບສິນເງິນຄໍາ, ມີຖານະໝັ້ນຄົງ, ຫາຍເຈັບ-ຫາຍຈົນ ປະກອບສ່ວນເຂົ້າໃນການປົກປັກຮັກສາ ແລະສ້າງສາພັດທະນາປະເທດຊາດ, ສ້າງ ສປປ ລາວ ໃຫ້ເປັນປະເທດທີ່ມັ່ງຄັ່ງເຂັ້ມແຂງ, ປະຊາຊົນຮັ່ງມີຜາສຸກ.

# ໂດຍ: ຣັດສະໝີ ດວງສັດຈະ

- WhatsApp Image 2020 05 27 at 5 - ຮ່ວມກັນສົ່ງທ້າຍປີເກົ່າ-ຕ້ອນຮັບປີໃໝ່ດ້ວຍຈິດໃຈປະຢັດ
- WhatsApp Image 2020 05 27 at 5 - ຮ່ວມກັນສົ່ງທ້າຍປີເກົ່າ-ຕ້ອນຮັບປີໃໝ່ດ້ວຍຈິດໃຈປະຢັດ
error: Alert: ເນື້ອຫາຂ່າວມີລິຂະສິດ !!