ປີ 2017 ເຈົ້າໜ້າທີ່ສາມາດມ້າງຄະດີຢາເສບຕິດລາຍໃຫຍ່ຫລາຍລາຍ

- 20476272 145914902655789 2695110079580485986 n - ປີ 2017 ເຈົ້າໜ້າທີ່ສາມາດມ້າງຄະດີຢາເສບຕິດລາຍໃຫຍ່ຫລາຍລາຍ
- Untitled design - ປີ 2017 ເຈົ້າໜ້າທີ່ສາມາດມ້າງຄະດີຢາເສບຕິດລາຍໃຫຍ່ຫລາຍລາຍ

ສະພາບການຄ້າຂາຍຢາເສບຕິດແມ່ນປາກົດການຫຍໍ້ທໍ້ທີ່ອັນຕະລາຍຮ້າຍແຮງຕໍ່ຄວາມໝັ້ນຄົງ ແລະ ເສດຖະກິດຂອງຊາດ, ທັງເປັນສາເຫດຕົ້ນຕໍຂອງບັນຫາອາຊະຍາກໍາຕ່າງໆ, ດັ່ງນັ້ນ, ໃນຜ່ານມາລັດຖະບານຈຶ່ງໄດ້ມີຄວາມພະຍາຍາມປາບປາມ ແລະ ສະກັດກັ້ນບັນຫາດັ່ງກ່າວໃຫ້ໝົດໄປຈາກສັງຄົມ ແລະ ປີ 2017 ຜ່ານມາ, ກໍາລັງເຈົ້າໜ້າທີ່ໃນທົ່ວປະເທດກໍໄດ້ເອົາໃຈໃສ່ແກ້ໄຂ ແລະ ທັບມ້າງຂະບວນການຜະລິດ, ຜູ້ຄ້າຂາຍຢາເສບຕິດລາຍໃຫຍ່ໄດ້ຫລາຍລາຍຄື: ໃນວັນທີ 28 ກໍລະກົດ, ເຈົ້າໜ້າທີ່ ປກສ ແຂວງອຸດົມໄຊໄດ້ນໍາກໍາລັງເຂົ້າກວດຄົ້ນເຮືອນເປົ້າໝາຍຄ້າຢາເສບຕິດຢູ່ບ້ານພູຂຽວ ແລະ ບ້ານຫລັກ 44 ເມືອງໄຊ ສາມາດພົບເຫັນຂອງກາງປະເພດຢາບ້າຫລາຍກວ່າ 2,3 ລ້ານເມັດ, ຝິ່ນ 6,3 ກິໂລ, ກັນຊາ 1 ກິໂລ, ຖົງຢາງບັນຈຸຢາບ້າ 5 ເປົາ, ແປ້ງຜະລິດຢາບ້າ 126 ກວ່າກິໂລ, ສີປະສົມຢາບ້າ 69 ກິໂລ, ເຈ້ຍປໍສາ 13 ກິໂລ, ປືນຍາວ 4 ກະບອກ, ປືນສັ້ນ 2 ກະບອກ, ກະສຸນປືນ 699 ລູກ, ລົດໃຫຍ່ 5 ຄັນ, ລົດຈັກ 3 ຄັນ, ເງິນ 241 ລ້ານກວ່າກີບ, 5 ລ້ານກວ່າບາດ(ສະກຸນເງິນໄທ) ແລະ 49 ພັນກວ່າ ໂດລາສະຫະລັດ, ນອກຈາກນີ້, ຍັງມີໃບຕາດິນຫລາຍໃບ, ນໍແຮດ, ງາຊ້າງ ແລະ ອື່ນໆອີກຈຳນວນໜຶ່ງ, ພ້ອມທັງກັກຕົວຜູ້ຖືກຫາໄດ້ 8 ຄົນຄື: ທ້າວ ວືແຊເລົາ ອາຍຸ 38 ປີ, ທ້າວ ເລົາທໍ່ ແຊລື ອາຍຸ 47 ປີຢູ່ບ້ານໄທສາມັກຄີເມືອງວຽງແກ່ນແຂວງຊຽງຮາຍປະເທດໄທ, ທ້າວ ຈົງເຮີ ອາຍຸ 16 ປີ, ນາງ ໄມ່ຮົວ ອາຍຸ 19 ປີຢູ່ບ້ານຊົງຈ່າ, ທ້າວ ເທ້ ອາຍຸ 16 ປີ, ນາງ ເຮີ ອາຍຸ 16 ປີຢູ່ບ້ານຫ້ວຍຍິນເມືອງນ້ຳ ບາກແຂວງຫລວງພະບາງ, ນາງ ຄຳຮັກ ອາຍຸ 30 ປີຢູ່ບ້ານພູຂຽວ ແລະ ທ້າວ ລາວຮາລີ ອາຍຸ 50 ປີຢູ່ບ້ານຫລັກ 44 ເມືອງໄຊແຂວງອຸດົມໄຊ ມາດໍາເນີນຄະດີຕາມລະບຽບກົດໝາຍ.

ໃນວັນທີ 26 ກໍລະກົດ, ເຈົ້າໜ້າທີ່ພາສີດ່ານບໍ່ເຕນແຂວງຫລວງນ້ຳທາສົມທົບກັບເຈົ້າໜ້າທີ່ ປກສ ແຂວງໄດ້ກວດຄົ້ນລົດບັນທຸກ 6 ລໍ້ ປ້າຍທະບຽນຈີນ ແລະ ພົບເຫັນຢາບ້າຫລາຍກວ່າ 2,1 ລ້ານເມັດ. ສ່ວນຜູ້ຂັບລົດຄັນດັ່ງກ່າວແມ່ນສາມາດເອົາຕົວຫລົບໜີໄປໄດ້.

ໃນວັນທີ 17 ກໍລະກົດ, ເຈົ້າໜ້າທີ່ຕຳຫລວດກວດຄົນເຂົ້າ-ອອກ ດ່ານສາກົນຂົວມິດຕະພາບ 1 ໄດ້ຈັບຕົວທ້າວ ວັນພອນ ອາຍຸ 32 ປີ ຢູ່ບ້ານສີວິໄລເມືອງໄຊທານີນະຄອນຫລວງວຽງຈັນ, ພ້ອມຂອງກາງຢາບ້າ 2 ແສນກວ່າເມັດທີ່ຊຸກເຊື່ອງໄວ້ໃນລົດກະບະວີໂກ້ຂອງຜູ້ກ່ຽວ.

ວັນທີ 24 ພະຈິກ, ເຈົ້າໜ້າທີ່ ປກສ ເມືອງປາກທາແຂວງບໍ່ແກ້ວ ສາມາດຢຶດເຮໂຣອິນ 60 ແທ່ງ, ຢາໄອສ໌ 109 ກິໂລ ແລະ ຢາບ້າ 180 ພັນເມັດ, ພ້ອມກັກຜູ້ຖືກຫາຄື: ທ້າວ ຕຸ້ຍ ອາຍຸ 35 ປີຢູ່ບ້ານຂອນແກ້ວ ແລະ ທ້າວ ແສງທອງ ອາຍຸ 43 ປີຢູ່ບ້ານມ່ວງແກ້ວ ເມືອງຫ້ວຍຊາຍແຂວງບໍ່ແກ້ວ ແລະ ລົດໃຫຍ່ 1 ຄັນ, ມາດໍາເນີນຄະດີຕາມລະບຽບກົດໝາຍ.

ໃນວັນທີ 23 ກັນຍາ, ເຈົ້າໜ້າທີ່ ປກສ ເມືອງປາກທາແຂວງບໍ່ ແກ້ວ ສາມາດຈັບຜູ້ຄ້າຂາຍຢາເສບຕິດ 2 ຄົນຄື: ທ້າວ ເຢາະປໍວາ ອາຍຸ 42 ປີ ແລະ ນາງ ໄມວາງວື ອາຍຸ 20 ປີຢູ່ບ້ານຈອມຈຸກເມືອງຫ້ວຍຊາຍແຂວງບໍ່ແກ້ວ, ພ້ອມຂອງກາງຢາບ້າ 960 ພັນເມັດທີ່ຊຸກເຊື່ອງໄວ້ໃນລົດກະບະວີໂກ້ຂອງພວກກ່ຽວ.

- Wave100S AD to Website 2020 0 - ປີ 2017 ເຈົ້າໜ້າທີ່ສາມາດມ້າງຄະດີຢາເສບຕິດລາຍໃຫຍ່ຫລາຍລາຍ

ໃນວັນທີ 1 ມິຖຸນາ, ເຈົ້າໜ້າທີ່ ປກສ ແຂວງອຸດົມໄຊ ໄດ້ຈັບກຸມຜູ້ຄ້າຢາເສບຕິດໃນເຮືອນພັກແຫ່ງໜຶ່ງຢູ່ບ້ານໜອງວຽງດາເມືອງໄຊ ແລະ ກັກຕົວຜູ້ຕ້ອງຫາ 2 ຄົນຄື: ທ້າວ ຫວ່າເມັງວາ ອາຍຸ 33 ປີ ຢູ່ບ້ານສວນຢາເມືອງຫລວງນ້ຳທາ, ທ້າວ ຮືຈີຢາງ ອາຍຸ 29 ປີຢູ່ບ້ານໄຊອຸດົມເມືອງຜາອຸດົມແຂວງບໍ່ແກ້ວ, ພ້ອມເຮໂຣອິນ 30 ແທ່ງ ແລະ ຢາບ້າ 156 ພັນເມັດມາດໍາເນີນຄະດີ.

ໃນວັນທີ 10 ມັງກອນ, ເຈົ້າໜ້າທີ່ ປກສ ເມືອງປາກຊັນແຂວງບໍລິຄຳໄຊ ໄດ້ຈັບກຸມຜູ້ລັກລອບຂົນສົ່ງຢາເສບຕິດປະເພດກັນຊາຈໍານວນ 29 ເປົາຢູ່ບ້ານຫ້ວຍສຽດເມືອງປາກຊັນ, ພ້ອມກັກຕົວຜູ້ກະທຳຜິດໄດ້ 5 ຄົນຄື: ທ້າວ ທອງຈັນ, ທ້າວ ເຄືອ, ທ້າວ ບຸນທຳ ຢູ່ບ້ານປາກຊຸນ ເມືອງປາກກະດິງ, ທ້າວ ເກດ ຢູ່ບ້ານປາກກະດັນ ແລະ ທ້າວ ພູ ຢູ່ບ້ານຫາດຊາຍຄູນເມືອງປາກຊັນມາດໍາເນີນຄະດີ.

ໃນວັນທີ 4 ເມສາ, ເຈົ້າໜ້າທີ່ກົມຕຳຫລວດສະກັດກັ້ນ ແລະ ຕ້ານຢາເສບຕິດ, ໄດ້ກັກຕົວທ້າວ ຊາດີ ອາຍຸ 29 ປີ ແລະ ທ້າວ ປໍລີ ອາຍຸ 20 ປີຢູ່ບ້ານໄຊຈະເລີນເມືອງຫ້ວຍຊາຍແຂວງບໍ່ແກ້ວ ແລະ ທ້າວ ຮືຢາງ ອາຍຸ 23 ປີຢູ່ບ້ານໜອງສອງຫ້ອງເມືອງໄຊທານີນະຄອນຫລວງວຽງຈັນ, ພ້ອມຂອງກາງເຮໂຣອິນ 97 ແທ່ງມາດໍາເນີນຄະດີຕາມລະບຽບກົດໝາຍ ແລະ ບັນດາຄະດີຢາເສບຕິດລາຍອື່ນໆເປັນຈໍານວນຫລາຍ, ນີ້ຄືຜົນສໍາເລັດອັນໂດດເດັ່ນໃນຂະບວນການຕ້ານ ແລະ ປາບປາມຢາເສບຕິດໃນປະເທດເຮົາໃຫ້ໝົດໄປ ແນໃສ່ສ້າງຜືນແຜ່ນດິນແຫ່ງນີ້ປອດສິ່ງເສບຕິດໃຫ້ປາກົດຜົນເປັນຈິງ.

- WhatsApp Image 2020 05 27 at 5 - ປີ 2017 ເຈົ້າໜ້າທີ່ສາມາດມ້າງຄະດີຢາເສບຕິດລາຍໃຫຍ່ຫລາຍລາຍ
- WhatsApp Image 2020 05 27 at 5 - ປີ 2017 ເຈົ້າໜ້າທີ່ສາມາດມ້າງຄະດີຢາເສບຕິດລາຍໃຫຍ່ຫລາຍລາຍ
error: Alert: ເນື້ອຫາຂ່າວມີລິຂະສິດ !!