ລາວ​ເລັ່ງຕ້ານ​ການ​ສໍ້​ລາດ​ບັງ​ຫລວງ​ໃຫ້ໝົດ​ໄປ

- corruption 1 - ລາວ​ເລັ່ງຕ້ານ​ການ​ສໍ້​ລາດ​ບັງ​ຫລວງ​ໃຫ້ໝົດ​ໄປ
- Untitled design - ລາວ​ເລັ່ງຕ້ານ​ການ​ສໍ້​ລາດ​ບັງ​ຫລວງ​ໃຫ້ໝົດ​ໄປ

ໃນ​ເງື່ອນ​ໄຂ​ໂລກ​ມີ​ການ​ເຊື່ອມ​ໂຍງ, ​ເຊິ່ງ​ເປັນ​ປະຖົມ​ປັດ​ໃຈ​ທີ່​ສຳຄັນ​ໃຫ້​ແກ່​ການ​ພັດທະນາ​ເສດຖະກິດ-ສັງຄົມ​ໄດ້​ມີ​ການ​ຂະຫຍາຍຕົວ​ຢ່າງ​ກ້າວ​ກະ​ໂດດ, ​ແຕ່​ໃນ​ຂະນະ​ດຽວກັນ ສປປ ລາວ ພວມ​ປະ​ເຊີນໜ້າກັບ​ໄພ​ອັນຕະລາຍ​ຫລາຍຢ່າງ ​ແລະ ໜຶ່ງ​ໃນ​ນັ້ນ​ກໍ​ແມ່ນ​ໄພ​ອັນຕະລາຍ​ຂອງ​ການສໍ້​ລາດ​ບັງ​ຫລວງທີ່​ເກີດ​ຂຶ້ນດ້ວຍ​ຫລາຍ​ຮູບ​ແບບ, ຫລາຍ​ລະດັບ, ຢູ່​ຫລາຍ​ຂົງ​ເຂດ​, ນັບ​ທັງ​ຂົງ​ເຂດ​ຄຸ້ມ​ຄອງ​ບໍລິຫານ​, ການກໍ່ສ້າງ​ພຶ້ນຖານ​ໂຄງ​ລ່າງ, ການ​ນຳ​ໃຊ້​ຊັບ​ສິນ​ຂອງ​ລັດ, ການ​ເກັບ​ລາຍ​ຮັບ ​ແລະ ການ​ຄຸ້ມ​ຄອງ​ລາຍ​ຈ່າຍງົບປະມານ, ການ​ສວຍ​ໃຊ້ໜ້າທີ່ ​ເພື່ອ​ກົດໜ່ວງທ່ວງດຶງ​ຕໍ່ລອງ​​ເອົາຜົນ​ປະ​ໂຫຍ​ດຈາກ​ຜູ້​ໃຊ້​ບໍລິການ​​ໃນ​ອົງການຈັດ​ຕັ້ງ​ພັກ-ລັດ​ ​ເຮັດ​ໃຫ້​ເປັນ​ອຸປະສັກ​ກົດໜ່ວງທ່ວງດຶງການ​ພັດທະນາ​ເສດຖະກິດ-ສັງຄົມ​ຂອງ​ຊາດ ​ແລະ ​ແກ້​ໄຂ​ຄວາມທຸກ​ຍາກ​ຂອງ​ປະຊາຊົນ. ຍ້ອນ​ແນວ​ນັ້ນ, ຍາມ​ໃດ​ພັກ ​ແລະ ລັດຖະບານ​​ເຮົາ​ກໍ​ໄດ້​ເອົາ​ໃຈ​ໃສ່ການ​ສະກັດ​ກັ້ນ ​ແລະ ຕ້ານ​ການ​ສໍ້​ລາດ​ບັງ​ຫລວງ ​ແລະ ​ແມ່ນຄວາມ​ຮັບຜິດຊອບ​ໂດຍ​ກົງ​ຂອງ​ພັກ, ຂອງ​ອຳນາດ​ລັດ ​ແລະ ພະນັກງານ​ທຸກ​ຂັ້ນ. ດັ່ງນັ້ນ ກົມ​ການ​ເມືອງ​ສູນ​ກາງ​ພັກ ​ໄດ້​ມີ​ມະຕິ​ສະບັບ​ເລກທີ 97/ກມສພ ວ່າ​ດ້ວຍ​ການ​ປັບປຸງ​ການຈັດ​ຕັ້ງ​ຂອງ​ຄະນະ​ກຳມະການ​ກວດກາ​ສູນ​ກາງ​ພັກ, ສ້າງ​ຕັ້ງ​ກົມ​ກວດກາ​ຕ້ານ​ການ​ສໍ້​ລາດ​ບັງ​ຫລວງ​ຂຶ້ນ, ກ່ອນ​ຈະ​ມາ​ເປັນ​ອົງການ​ກວດ​ສອບ​ແຫ່ງ​ລັດ​ໃນ​ປັດຈຸບັນ ​ເພື່ອ​ເຮັດ​ໜ້າທີ່​ໃນການ​ສະກັດ​ກັ້ນ ​ແລະ ຕ້ານ​ການ​ສໍ້​ລາດ​ບັງ​ຫລວງ, ນອກຈາກ​ນີ້ກໍ​ຍັງ​ສ້າງ​ກົດໝາຍວ່າ​ດ້ວຍ​ການ​ຕ້ານ​ການ​ສໍ້​ລາດ​ບັງ​ຫລວງ ​ແລະ ຍຸດ​ທະ​ສາດ​ຕ້ານ​ການ​ສໍ້​ລາດ​ບັງ​ຫລວງ​ຮອດ​ປີ 2020. ສ້າງ​ນິຕິ​ກຳ​ຫລາຍ​ຢ່າງຕະຫລອດ​ຮອດຫລັກສູດ​ການ​ຮຽນ-ການ​ສອນນັບ​ແຕ່​ຊັ້ນ​ອານຸບານ, ປະຖົມ, ມັດທະຍົມ​ ​ແລະ ປັດຈຸບັນ​ພວມ​ຄົ້ນ​ຄ້ວາ​ຫລັກສູດ​ຂັ້ນ​ມະຫາວິທະຍາ​ໄລ ​ເພື່ອ​ປູກ​ຈິດ​ສຳນຶກ​ໃຫ້​ສັງຄົມມີ​ຄວາມ​ຕື່ນ​ຕົວ ​ແລະ ຮຽນຮູ້​ເລ່ລ່ຽມ ​ແລະ ກົນອຸບາຍກ່ຽວກັບ​ບັນຫາ​ສໍ້​ລາດ​ບັງ​ຫລວງ​ໃນ​ປັດຈຸບັນ.

ໃນ​ຜ່ານ​ມານີ້, ພັກ-ລັດຖະບານເຮົາ​ໄດ້​ແນະນຳ​ໃຫ້​ຄະນະ​ພັກ, ອົງການ​ປົກຄອງ ​ແລະ ຄະນະ​ກວດກາ​ແຕ່​ລະ​ຂັ້ນ​ໄດ້​ດຳ​ເນີນ​ການ​ຕິດຕາມ​ກວດກາ​ພຶດຕິ​ກຳ​ທີ່​ເປັນ​ການ​ສໍ້​ລາດ​ບັງ​ຫລວງ ​ເປັນ​ຕົ້ນ: ການ​ໃຫ້ ​ແລະ ຮັບ​ສິນ​ບົນ, ການ​ສວຍ​ໃຊ້​ຖານະ​ຕຳ​ແຫນ່​ງ, ສິດ​ອຳນາດ, ໜ້າທີ່​ເກີນ​ຂອບ​ເຂດ, ການ​ລັກ​ໂລບ​ປອມ​ແປງ​​ມາດຕະຖານ​ເຕັກ​ນິກ​ກໍ່ສ້າງ, ອອກ​ແບບ, ຄິ​​ດ​ໄລ່, ການ​ໂກງ​ການ​ປະມູນ ຫລື​ ການ​ສຳ​ປະທານ ​ແລະ ອື່ນໆ ​ເຮັດ​ໃຫ້​ຊັບ​ສິນ​ຂອງ​ລັດ, ລວມໝູ່ ​ແລະ ຂອງ​ປະຊາຊົນ​ເສຍ​ຫາຍ​ເປັນ​ຈຳນວນ​ຫລາຍຄື: ​ແຕ່​ປີ 2013​ ມາ​ຮອດ​ປັດຈຸບັນ, ອົງການ​ກວດກາ​ລັດຖະບານ​ໄດ້​ສົມທົບ​ກັບ​ຄະນະ​ກວດກາຂອງ​ບັນດາ​ກະຊວງ-ອົງການ ​ແລະ ທ້ອງ​ຖິ່ນດຳ​ເນີນ​ການ​ກວດກາ​ຫລາຍ​ເປົ້າໝາຍ, ສາມາດກວດກາ​ພົບ​ເຫັນ​ຜົນ​ເສຍ​ຫາຍ​ມີ​ມູນ​ຄ່າ​ສູງ​ເຖິງ 480 ຕື້ກີບ, ​ເກັບ​ກູ້​ຄືນ​ໄດ້​ແລ້ວ 337 ກ່ວາຕື້ກີບ, ໃນ​ນັ້ນ​ສະ​ເພາະ​ການ​ເສຍ​ຫາຍ​ຈາກ​ການ​ປະຕິບັດ​ໂຄງການ ​ແລະ ການ​ສໍ້​ໂກງ​ຊັບ​ຂອງ​ລັດມີ 417 ຕື້ ​ແລະ ​ໄດ້​ດຳ​ເນີນ​ການສຶກສາ​ອົບຮົມ, ກ່າວ​ເຕືອນ​, ປະຕິບັດ​ວິ​ໄນ​ດ້ານ​ບໍລິຫານ ​ແລະ ​ດຳ​ເນີນ​ຄະດີຕາມ​ລະບຽບກົດໝາຍ​ໄດ້​ຈຳນວນ 107 ຄົນ, ​ໃນ​ນັ້ນ​ເປັນພະນັກງານ​ລັດ 86 ຄົນ, ​ໄດ້​ສະຫລຸບ​ສຳນວນ​ຄະດີ​ສົ່ງ​ຟ້ອງໄອ​ຍະ​ການ 55 ຄົນ ​ແລະ ​ສານ​ໄດ້​ຕັດສິນ​ແລ້ວ 13 ຄົນ.

- Wave100S AD to Website 2020 0 - ລາວ​ເລັ່ງຕ້ານ​ການ​ສໍ້​ລາດ​ບັງ​ຫລວງ​ໃຫ້ໝົດ​ໄປ
- WhatsApp Image 2020 05 27 at 5 - ລາວ​ເລັ່ງຕ້ານ​ການ​ສໍ້​ລາດ​ບັງ​ຫລວງ​ໃຫ້ໝົດ​ໄປ
- WhatsApp Image 2020 05 27 at 5 - ລາວ​ເລັ່ງຕ້ານ​ການ​ສໍ້​ລາດ​ບັງ​ຫລວງ​ໃຫ້ໝົດ​ໄປ
error: Alert: ເນື້ອຫາຂ່າວມີລິຂະສິດ !!