ປີ​ທ່ອງ​ທ່ຽວ​ລາວ​ມາ​ຮອດ​ແລ້ວ

- 5992 - ປີ​ທ່ອງ​ທ່ຽວ​ລາວ​ມາ​ຮອດ​ແລ້ວ
- Untitled design - ປີ​ທ່ອງ​ທ່ຽວ​ລາວ​ມາ​ຮອດ​ແລ້ວ

 

ກ້າວ​ເຂົ້າ​ເດ​ືອນມັງກອນ​ 2018 ສະພາບ​ຄວາມ​ໜາວ​ເຢັນ​ທີ່​ໄດ້​ແກ່ຍາວ​ມາ​ແຕ່​ປີ​ກາຍ​ຍັງ​ເປັນ​​ໄພຂົ່ມຂູ່ ​ແລະ ຄຸກ​ຄາມ​ຢ່າງ​ໜຶ່ງ​ແກ່​ພວກ​ເຮົາ​ໃນ​ປີ​ນີ້. ​ຮູ້ສຶກ​ວ່າ​ໝາ​ວກວ່າ​ປີຜ່ານ​ໆ​ມາ. ​ດັ່ງ​ຊຽງ​ຂວາງ, ຊຳ​ເໜືອ, ຜົ້ງສາລີ ​ແລະ ປາກ​ຊ່ອງ​ບໍລິ​ເວນ​ໃນ​ຊ່ວງ​ເດືອນ​ພະຈິກ, ທັນວາ​ປີ​ກາຍ​ບາງ​ມື້ກໍ​ໜາວ​ເຮັ່ງ​ອີ່ຫລີ​ອຸນຫະພູມ​ຈຳ​ຮອດ​ສູນ​ອົງສາ. ​​ແຕ່​ກໍ​ເປັນ​ຈັ່ງ​ບຸນ​ຍັງ​ບໍ່​ມີ​ແຫ​ລ່ງຂ່າວ​ຄາວ​ຢູ່​ບ່ອນ​ໃດ​ວ່າ​ມີ​ຄົນ​ຕາຍ​ຍ້ອນ​ໄພ​ໜາວ, ກໍ​ຍ້ອນ​ພວກ​ເຮົາ​ມີ​ຫລາຍ​ປັດ​ໄຈ, ​ບ້ານ​​ເມືອງ​ ມີ​ການ​ພັດທະນາ​ຫລາ​ຍຂຶ້ນ. ​ ເຮືອນ​ຊານ​ບ້ານ​ຊ່ອງ ​ສ່ວນ​ຫລາຍ​ເປັນ​ເຮືອນ​ທີ່​ແໜ້ນ​ໜາ​ຖາວອນ​, ຖ້າມື້​ໃດ​ອາກາດ​ໜາວ​ເຮັ່ງ​ກໍ​ອັດ​ປະຕູ​ ​ໃຫ້​ມີ​ຄວາມ​ອົບ​ອຸ່ນ​ຢູ່​ໃນ​ເຮືອນ. ອັນ​ສອງ​ມາ​ພວກ​ເຮົາ​ໄດ້​ຊົມ​ໃຊ້​ໄຟຟ້າ​ສາມາດ​ປັບ​ນ້ຳ​ເຢັນ​ມາ​ເປັນນ້ຳອຸ່ນ, ສາມາດ​ປັບ​ອາຍ​ເຢັນ​ມາ​ເປັນ​ອາຍ​ອຸ່ນ​ໄດ້​ຢ່າງ​ງ່າຍດາຍ. ອັນ​ສາມ​ມາ​ພວກ​ເຮົາ​ມີ​ເສື້ອຜ້າ, ອາພອນ, ​ເຄື່ອງນຸ່ງ​ຫົ່ມ​ໄວ້​ຮອງ​ຮັບ​ກັບ​ຄວາມ​ໜາວ​ເຢັນ. ອັນ​ທີ​ສີ່​ພວກ​ເຮົາ​ໄດ້​ຮັບ​ຂໍ້​ມູນ​ຂ່າວສານ​ກ່ອນ​ລ່ວງ​ໜ້າ​ວ່າ​ຈະ​ມີ​ໄພ​ໜາວ, ​ໄພ​ຮ້ອນ ​ເຊິ່ງ​ເປັນ​ເງື່ອນ​ໄຂ​ໜຶ່ງ​ ​ເຮັດ​ໃຫ້​ທຸກ​ຄົນ​​ໄດ້​ກະກຽມ​ຄວາມ​ພ້ອມ​ໃນ​ທຸກ​ກໍລະນີ​ຈຶ່ງ​ເຮັດ​ໃຫ້​ພວກ​ເຮົາ​ສາມາດ​ຕ້ານ​ກັບ​ໄພ​ທຳ​ມະ​ຊາດ​ໄດ້​ຢ່າງ​ລົງ​ຕົວ. ​ແນວ​ໃດ​ກໍ​ຕາມ, ທິດ​ກ່ຳ​ວ່າ​ບັນຫາ​ເລື່ອງ​ໄພ​ໜາວ​ຄາດ​ວ່າ​ມັນ​ກໍ​ຈະ​ໝົດ​ໄປ​ໃນ​ຊ່ວງ​ເດືອນ​ສາມພໍດີ​ເປັນ​ເດືອນ​ສີ່​ລາວ​ໄປ​ຮອດ​ເດືອນ​ຫ້າ​ຈາກ​ນັ້ນຈະ​ເລີ່​ມ​ໃສ່​ຄວາມ​ຮ້ອນ​ຕິດຕາມ​ມາ​ດ້ວຍ​ຮ່າ​ຝົນ​ໂຮຍ​ຮຳ​ກ້າວ​ເຂົ້າຍາມ​ຝົນ​ອັນ​ເປັນ​ລະດູ​ການ​ຜະລິດ​ເຂົ້ານາປີ ຂອງຜູ້​ມີ​ອາຊີບ​ເປັນ​ຊາວ​ໄຮ່​ຊາວນາ.

 

+ ຈົ່ງຊ່ວຍກັນຕ້ານໄພໜາວ

+ ປີທ່ອງທ່ຽວລາວ 2018 ອຸດົມໄຊຄາດໝາຍດຶງດູດນັກທ່ອງທ່ຽວ 3-4 ແສນຄົນ

 

- Wave100S AD to Website 2020 0 - ປີ​ທ່ອງ​ທ່ຽວ​ລາວ​ມາ​ຮອດ​ແລ້ວ

ດັ່ງ​ພວກ​ເຮົາ​ໄດ້​ຮັບ​ຮູ້​ໃນ​ທົ່ວ​ພັກ, ທົ່ວ​ກອງທັບ ​ແລະ ທົ່ວ​ປວງ​ຊົນ​ແລ້ວ​ວ່າ​ໃນ​ປີ 2018 ນີ້, ​ເປັນ​ປີ​ທ່ອງ​ທ່ຽວ​ລາວ​ອີກ​ປີ​ໜຶ່ງ, ​ເຊິ່ງ​ເມື່ອ​ປີ​ກ່ອນໆ​ນັ້ນພວກ​ເຮົາ​ກໍ​ເຄີຍ​ຈັດ​ມາ​ແລ້ວ ​ແລະ ຄັ້ງນີ້​ກໍ​ຖື​ວ່າ​ເປັນຄັ້ງທີ​ສ​ອງ, ​ແຕ່​ອັນ​ທີ່​ພິ​ເສດ​ສຳລັບ​ປີ​ນີ້​​ແມ່ນພວກ​ເຮົາ​ໄດ້​ຕັ້ງ​ເປົ້າ​ເອົາ​ໄວ້​ວ່າ​ຈະ​ເຮັດ​ໃຫ້​ນັກ​ທ່ອງ​ທ່ຽວ​ຕ່າງປະ​ເທດ​ເຂົ້າມາ​ທ່ຽວ​ລາວ​ຫລາຍ​ກວ່າ​ຄັ້ງ​ຜ່ານມາ. ຢ່າງ​ໜ້ອຍໃຫ້​ໄດ້​ແຕ່ 5 ຫາ 6 ລ້ານ​ເທື່ອ​ຄົນ. ສຳລັບ​ນັກ​ທ່ອງ​ທ່ຽວ​ທີ່ຢູ່​ພາຍ​ໃນ​ນັ້ນກໍ​ຈະ​ຈັດ​ໃຫ້​ມີ​ກິດຈະ​ກຳ​ຢູ່​ໃນ​ແຕ່ລະ​ທ້ອງ​ຖິ່ນ​ເຂດ​ແຂວງ​ໃຫ້​ໄດ້​ດີ ​ແລະ ຫລາກ​ຫລາຍ​ກວ່າ​ເກົ່າ​ໂດຍ​ສະ​ເພາະ​ໂອກາດ​ບຸນ​ປະ​ເພນີ ​ແລະ ກິດຈະກຳ​ນຳ​ທ່ຽວ​ອື່ນ​ໆ ທີ່​ເຫັນ​ວ່າ​ເໝາະ​ສົມ ​ແລະ ສອດຄ່ອງ​ກັບ​ທ້ອງ​ຖິ່ນ. ນີ້​ຄື​ພາລະກິດ​ໜຶ່ງ​ທີ່​ໃຫຍ່​ຫລວງ​ທັງ​ຖື​ວ່າ​ເປັນ​ວາລະ​ຂອງ​ຊາດ​ທີ່​ພວກ​ເຮົາ​ຈະ​ຕ້ອງ​ໄດ້​ພ້ອມ​ໜ້າ​ພ້ອມ​ຕາ​ກັນ​ເຮັດ. ອັນ​ສຳຄັນ​ທີ່​ສຸດ​ໜ້າ​ວຽກ​ທີ່​ທຸກ​ຄົນ​ຈະ​ຕ້ອງ​ມີ​ພັນທະນັ້ນກ່ອນ​ອື່ນ​ໝົດ​ແມ່ນ​ຄວາມ​ສະຫງົບ​ປອດ​ໄພ​ໃນ​ສັງຄົມ​ບ້ານ​ເມືອງ. ອັນ​ສອງ​ມາ​ແມ່ນ​ຕ້ອງ​ສ້າງ​ປັດ​ໄຈ​ສິ່ງ​ເອື້ອອຳນວຍ​ຄວາມ​ສະດວກ​​ເພື່ອ​ປິ່ນ​ອ້ອມ​ໃຫ້ການ​ທ່ອງ​ທ່ຽວ​ເປັນຕົ້ນນັບ​ແຕ່​ເສັ້ນທາງ​ໄປ​ມາ​ກໍ​ໃຫ້​ມີ​ຄວາມ​ສະດວກ​ສະບາຍ. ຈຸດ​ໜັກ​ແມ່ນ​ເສັ້ນທາງ​ທີ່​ຈະ​ໄປ​ຫາ​ບ່ອນ​ທ່ອງ​ທ່ຽວ​ຕົ້ນຕໍ​ແມ່ນ​ບໍ່​ໃຫ້​ມີ​ບວກ​ຂຸມ, ບໍ່​ໃຫ້​ມີ​ຂີ້ຝຸ່ນ​ຈົນ​ເກີນ​ເຫດ, ຕາມ​ປົດ​ປ້ອມ​ທີ່​ສຳຄັນ​ກໍ​ຕ້ອງ​ໃຫ້​ເຈົ້າໜ້າ​ທີ່​ຄອຍ​​ໃຫ້​ຄວາມ​ສະດວກ​ແກ່​ນັກ​ທ່ອງ​ທ່ຽວ​ບໍ່​ໃຫ້​ສວຍ​ໂອກາດ​ກິນ​ເລັກ​ກິນ​ນ້ອຍ ຫລື ​ໃຊ້​ທ່າ​ທີ​ນາບ​ຂູ່​ນັກ​ທ່ອງ​ທ່ຽວ, ບໍ່​ໃຫ້​ມີ​ເຫດການ​ປຸ້ນ​ຈີ້ດຶງ​ກະ​ເປົາ, ​ແຫກ​ກະ​ເປົາ​ຫລື​ໄປ​ສ້າງ​ການ​ເສຍຄວາມ​ຮູ້ສຶກ​ຕໍ່​ນັກ​ທ່ອງ​ທ່ຽວ. ​ເວົ້າ​ເລື່ອງ​ບ່ອນ​ພັກ​ບ່ອນ​ເຊົາ​ກໍ​ຕ້ອງ​ສະອາດ​ຈົບງາມ​ຫ້ອງ​ນອນ​ບໍ່​ໃຫ້​ມີ​ກິ່ນ​ສາບ, ຫ້ອງ​ນ້ຳບໍ່​ໃຫ້​ມີ​ກິ່ນ​ເໝັນ. ສິນຄ້າ​ຕາມ​ຫ້າງ​ຮ້ານ, ຕາມ​ຕະຫລາດ​ຕະລີ​ກໍ​ບໍ່​ຄວນ​ສວຍ​ໂອກາດ​ຂຶ້ນລາຄາ​ເອົາ​ລັດ​ເອົາ​ປຽບ​ນັກ​ທ່ອງ​ທ່ຽວ. ສ່ວນວ່າ​ອັນ​ສຸດ​ທ້າຍ​ທີ່​ຈະ​ເຮັດ​ໃຫ້​ແຂກ​ຄົນ​ຕິດ​ອົກ​ຕິດ​ໃຈ​ກັບ​ເມືອງ​ລາວ, ຄົນ​ລາວ​ນັ້ນຄື​ອັດທະຍາ​​ໃສ​ໄມ​ຕີ​ຈິດ​ທີ່​ດີງາມ​ນີ້​ຄື​ມົນ​ສະ​ເໜ່ຂອງ​ປະ​ເທດ​ດອກ​ຈຳປາ​ລ້ານ​ຊ້າງ.

 

ໂດຍ: ທິດກ່ຳ

- 5992 - ປີ​ທ່ອງ​ທ່ຽວ​ລາວ​ມາ​ຮອດ​ແລ້ວ
(ພາບປະກອບ)
- WhatsApp Image 2020 05 27 at 5 - ປີ​ທ່ອງ​ທ່ຽວ​ລາວ​ມາ​ຮອດ​ແລ້ວ
- WhatsApp Image 2020 05 27 at 5 - ປີ​ທ່ອງ​ທ່ຽວ​ລາວ​ມາ​ຮອດ​ແລ້ວ
error: Alert: ເນື້ອຫາຂ່າວມີລິຂະສິດ !!