ປີ​ໃໝ່ນະຄອນຫລວງ​ວຽງຈັນຈະ​ເລັ່ງ​ແກ້​ໄຂວຽກຄົງ​ຄ້າງ​ຫລາຍ​ອັນ

- vientiance capital - ປີ​ໃໝ່ນະຄອນຫລວງ​ວຽງຈັນຈະ​ເລັ່ງ​ແກ້​ໄຂວຽກຄົງ​ຄ້າງ​ຫລາຍ​ອັນ
- Untitled design - ປີ​ໃໝ່ນະຄອນຫລວງ​ວຽງຈັນຈະ​ເລັ່ງ​ແກ້​ໄຂວຽກຄົງ​ຄ້າງ​ຫລາຍ​ອັນ

ວັນ​ທີ 9 ມັງກອນນີ້, ທ່ານ ສິນ​ລະ​ວົງ ຄຸດ​ໄພທູນ ກຳມະການ​ກົມ​ການ​ເມືອງ​ສູນ​ກາງ​ພັກ, ​ເຈົ້າ​ຄອງ​ນະ​ຄອນຫລວງ​ວຽງຈັນ ​ໄດ້​ເປີດ​ເຜີຍ​ສະພາບ​ການ​ພັດທະນາ​ເສດຖະກິດ-ສັງຄົມຢູ່ນະຄອນຫລວງ​ວຽງຈັນ​ໃນ​ປີຜ່ານມາ​ຕໍ່ກອງ​ປະຊຸມ​ສະໄໝສາມັນ​ເທື່ອ​ທີ 4 ຂອງ​ສະພາ​ປະຊາຊົນນະຄອນຫລວງ​ວຽງຈັນ​ຊຸດ​ທີ I ວ່າ: ຍາມ​ໃດອົງການ​ປົກຄອງນະຄອນຫລວງ​ກໍໄດ້​ຖື​ສຳຄັນ​ໃນ​ການ​ພັດທະນາ​ເສດຖະກິດ​ຕາມ​ມະຕິ​ຕົກລົງ​ຂອງ​ສະພາ​ແຫ່ງ​ຊາດ ແລະ ຄາດໝາຍສະ​ເພາະ​ຂອງ​ແຕ່ລະ​ຂະ​ແຫນງ​ການ, ​ເຮັດ​ໃຫ້ລວມຍອດ​ຜະລິດ​ຕະພັນ​ພາຍ​ໃນ (GDP) ​ເຕີບ​ໂຕ​ເກືອບ 10%, ການຈັດ​ເກັບ​ລາຍ​ຮັບ​ເຂົ້າ​ງົບປະມານບັນລຸ​ໄດ້ 93,5%, ​ເຊິ່ງ​ເຫັນ​ວ່າ​ຕົວ​ເລກ​ການ​ລົງທຶນຢູ່ນະຄອນຫລວງ​ມີຫລາຍ​ກວ່າ 2.919 ຫົວໜ່ວຍ, ລວມມີມູນ​ຄ່າລົງທຶນ​ທັງໝົດ 18 ພັນ​ກ່ວາຕື້ກີບ, ​ໄດ້​ເອົາໃຈ​ໃສ່​ຈັດ​ຕັ້ງ​ປະຕິບັດ​ນະ​ໂຍບາຍ​ຂອງ​ລັດຖະບານ​ສົ່ງ​ເສີມ​ສິນຄ້າ ODOP, ​ເສດຖະກິດ​ຂະຫນາດນ້ອຍ-ກາງ ​ແລະ ​ເສດຖະກິດ​ຄອບຄົວ, ​ໄດ້​ອອກ​ນິຕິ​ກຳຈັດ​ແບ່ງ​ດິນ 8 ປະ​ເພດ ​ແລະ ອອກ​ໃບ​ຕາດິນ, ​ໄດ້​ສຳ​ຫລວດ​​ໂຄງ​ການ​ບຶງ​ທາດຫລວງ, ​ເຂົ້າຮ່ວມ ​ແລະ ຊຸກຍູ້​ການຈັດ​ຕັ້ງ​ປະຕິບັດ​ໂຄງການ​ໃຫຍ່​ລະດັບ​ຊາດຕ່າງໆ ​ເຊັ່ນ: ​ໂຄງການ​ທາງ​ລົດ​ໄຟ, ​ໂຄງການ​ປ້ອງ​ກັນ​ຕາ​ຝັ່ງ​ເຈື່ອນ ​ແລະ ພັດທະນາ​ແຄມ​ຂອງ​ໄລຍະ II, ​ໂຄງການ​ກໍ່ສ້າງ​ເສັ້ນທາງ​ຫລວງ​ແຫ່ງ​ຊາດ ​ແລະ ​ໂຄງການ​ອື່ນໆ ທັງໝົດນີ້​ໄດ້​ຊ່ວຍ​ກະ​ຕຸ້ນ​ໃຫ້ເສດຖະກິດນະຄອນຫລວງວຽງຈັນສືບຕໍ່ຂະຫຍາຍຕົວ​ຢ່າງ​ຕໍ່​ເນື່ອງ ​ແລະ ມີ​ທ່ວງທ່າ​ດີ​ຂຶ້ນ​ເປັນ​ກ້າວໆ.

​ທ່ານ​ເຈົ້າ​ຄອງ​ ໃຫ້​ຮູ້​ວ່າ: ​ການ​ພັດທະນາ ​ແລ​ະ ຄຸມ​ຄອງ​ຕົວ​ເມືອງ, ອົງການ​ປົກຄອງ​ນະ​ຄອນຫລວງ​ໄດ້​ຕັ້ງໜ້າຫັນ​ວິ​ໄສ​ທັດ ​ແລະ ຍຸດ​ທະ​ສາດ​ການ​ພັດທະນາ​ຕາມ​ທິດ​ເປັນ​ເມືອງໜ້າຢູ່, ຊຶ່ງ​​ປີຜ່ານ​ມາ​ໄດ້​ສຳ​ເລັດ​ການ​ສ້າງ​ແຜນຜັງ​ຈຳລອງ, ຂະຫຍາຍ​ແລວ​ຜັງ​ເມືອງ​ໄປ​ສູ່​​ເຂດນອກ, ​ກໍ່ສ້າງ​ເສັ້ນທາງ​ໃໝ່ ​ແລະ ສ້ອມ​ແປງ​ເສັ້ນທາງ​ທີ່​ຊຸດ​ໂຊມໄປ​ຕາມ​ແຜນ​ວຽກ ​ແລະ ​ແຜນ​ເງິນທີ່​ລັດຖະບານ​ໄດ້​ກຳນົດ ​ແລະ ປຸກລະດົມ​ການ​ປະກອບສ່ວນ​ຂອງ​ປະຊາຊົນ, ​ໄດ້​ເພີ່ມ​ທະວີ​ກວດກາ, ​ຄຸ້ມ​ຄອງ​ການ​ປຸກ​ສ້າງ-ສ້ອມ​ແປງ​ເຄຫາ​ສະຖານ​ໃຫ້​ເຂົ້າ​ສູ່​ລະບຽບ, ປັບປຸງ​ສະພາບ​ແວດ​ລ້ອມ​ເຂດ​ຕົວ​ເມືອງ​ເກົ່າ ​ແລະ ​ເຂດ​ມໍລະດົກ, ​ໄດ້​ສຳ​ເລັດ​ການ​ສຳ​ຫລວດ​ເບື້ອງຕົ້ນ ​ແລະ ​​ໂຄງການ​ສ້າງ​ທາງ​ດ່ວນ​ຄູ່​ຂະໜານຖະໜົ​ນໄກສອນ, ​ແກ້​ໄຂ​ສະພາບ​ນ້ຳ​ອັ່ງ​ຂັງ​ໃນ​ລະດູຝົນ, ລວງ​ຄອງ​ນ້ຳ​ບຶງ​ທາດຫລວງ-ຫ້ວຍໝາກຮຽວຕາມ​ວິທີ​ການ​ເອົາ​ຄອງ​ເໝືອງ​ລ້ຽງຄອງ​ເໝືອງ ​ແລະ ສຳ​ເລັດ​ຜົນ​ການ​ປະຕິບັດ​ຂະ​ບວນການຊົ່ວ​​ໂມງ​ວຽງຈັນ​ສະອາດ, ພ້ອມ​ນີ້ ກໍ​ໄດ້​ຂະຫຍາຍ​ທໍ່ສົ່ງ​ນ້ຳປະປາ​ໃໝ່ຈຳນວນໜຶ່ງ, ​ສຳ​ເລັດ​ການກໍ່ສ້າງ​ໂຮງງານ​ນ້ຳປະປາ​ໃໝ່ດົງໝາກຄາຍ, ດົງ​ບັງ, ທ່າ​ເດື່ອ ​ແລ​ະ ​ໂຄງການຢູ່​ເມືອງ​ສັງ​ທອງ, ​ແສນ​ດິນກໍ​ມີ​ຄວາມ​ຄືບໜ້າດີ​ສົມຄວນ.

ທ່ານ​ເຈົ້າ​ຄອງ​ນະຄອນຫລວງ ​ເນັ້ນ​ວ່າ: ​ໃນ​ແຜນ​ຈຸດ​ສຸມ​ຕໍ່ໜ້າຈະ​ຕ້ອງ​ເລັ່ງ​ໃສ່​ແກ້​ໄຂ​ບັນຫາ​ທີ່​ຍັງ​ຄົງ​ຄ້າງ​ໃຫ້​ສຳ​ເລັດ, ​ເຖິງວ່າ​ເສດຖະກິດນະຄອນຫລວງຂະຫຍາຍຕົວ​ສູງ, ​ແຕ່​ການ​ເກັບ​ລາຍ​ຮັບ​ເຂົ້າງົບປະມານ ​ແລະ ຕົວ​ເລກ​ຄາດໝາຍດຶງ​ດູດ​ນັກ​ທ່ອງ​ທ່ຽວຍັງ​ບໍ່ສາມາດ​ບັນລຸ​ຄາດໝາຍທີ່​ລັດຖະບານ​ມອບໝາຍ​ໃຫ້ ​ເຊິ່ງ​ໃນ​ປີຜ່ານມາບັນລຸ​ພຽງ 70%, ການ​ແກ້​ໄຂໜີ້ສິນ​ໂຄງການ​ລົງທຶນ​ຂອງ​ລັດ​ ສາມາດ​ຢັບຢັ້ງ​ໄດ້ພຽງ​ແຕ່​ບໍ່ສ້າງ​ໃຫ້​ເກີດໜີ້ສິນໃໝ່​ເພີ່ມ​ຂຶ້ນ​ເທົ່າ​ນັ້ນ, ສ່ວນ​ການ​ແກ້​ໄຂໜີ້ສິນ​ເກົ່າທີ່​ຄຸມ​ເຄືອ​ເປັນ​ຈຳນວນ​ຫລວງຫລາຍ​ນັ້ນ​ພົບ​ຄວາມ​ຫຍຸ້ງຍາກອັນ​ເນື່ອງ​ຈາກ​ບໍ່ມີ​ແຫ​ລ່ງທຶນ​ອື່ນ​ນອກຈາກ​ງົບປະມານ​ຂອງ​ລັດຖະບານບ້ວງ 400 ຕື້ກີບ, ການ​ປະຕິບັດ​ແຜນ​ຜັງ​ຕົວ​ເມືອງ, ການຈັດ​ສັນ​ຄວາມ​ເປັນ​ລະບຽບຮຽບຮ້ອຍບໍ່ທັນ​ໄດ້​ດີ, ປາກົດ​ການຖີ້ມຂີ້​ເຫຍື້ອຊະຊາຍ, ຄວາມ​ບໍ່ສະອາດ ອັນ​ເກີດ​ຈາກ​ບຸກຄົນ ​ແລະ ນິຕິບຸກຄົນຍັງ​ມີ​ໃຫ້​ເຫັນ​ຢ່າງ​ແຜ່​ຫລາຍ, ການ​ແກ້​ໄຂ​ປາກົດ​ການ​ຫຍໍ້​ທໍ້​ໃນ​ສັງຄົມ​ເຊັ່ນ: ຢາ​ເສບ​ຕິດ, ກຸ່ມ​ແກ້ງ​ກວນ​ເມືອງ, ອຸປະຕິ​ເຫດ, ​ເຖິງ​ວ່າ​ໄດ້​ເອົາ​ໃຈ​ໃສ່​​ແຕ່​ກໍ​ຍັງ​ບໍ່ທັນ​ເຖິງ​ກົກ​ເຖິງ​ຮາກ​ເທື່ອ ​ແລະ ຍັງ​ມີ​ຂໍ້​ຂັດ​ແຍ່ງ, ຄະດີ​ຄວາມ​ກ່ຽວກັບ​ທີ່​ດິນ, ມໍລະດົກ ​ແລະ ກູ້​ຢືມທີ່​ເປັນ​ບັນຫາ​ຊຳ​ເຮື້ອຊຶ່ງ​ຈະ​ຕ້ອງ​ໄດ້​ສືບຕໍ່​ແກ້​ໄຂ​ໃຫ້ໝົດ​ໄປ.

- Wave100S AD to Website 2020 0 - ປີ​ໃໝ່ນະຄອນຫລວງ​ວຽງຈັນຈະ​ເລັ່ງ​ແກ້​ໄຂວຽກຄົງ​ຄ້າງ​ຫລາຍ​ອັນ
- WhatsApp Image 2020 05 27 at 5 - ປີ​ໃໝ່ນະຄອນຫລວງ​ວຽງຈັນຈະ​ເລັ່ງ​ແກ້​ໄຂວຽກຄົງ​ຄ້າງ​ຫລາຍ​ອັນ
- WhatsApp Image 2020 05 27 at 5 - ປີ​ໃໝ່ນະຄອນຫລວງ​ວຽງຈັນຈະ​ເລັ່ງ​ແກ້​ໄຂວຽກຄົງ​ຄ້າງ​ຫລາຍ​ອັນ
error: Alert: ເນື້ອຫາຂ່າວມີລິຂະສິດ !!