ໄຂ​ເປືອກ​ຕາ​ເບິ່ງ​ກົດໝາຍ​ບ້ານ​ເພິ່ນ

- international law - ໄຂ​ເປືອກ​ຕາ​ເບິ່ງ​ກົດໝາຍ​ບ້ານ​ເພິ່ນ
- Untitled design - ໄຂ​ເປືອກ​ຕາ​ເບິ່ງ​ກົດໝາຍ​ບ້ານ​ເພິ່ນ

ມື້ນີ້​ພວກ​ເຮົາ​ພາກັນ​ສົ່ງ​ສາຍຕາ​ໄປ​ກວ້າງໆ​ໄກໆ​ເພື່ອ​ເບິ່ງ​ບັນຫາ​ຮ່າງ​ກົດບັດກຳນົດ​ຍົກ​ເວັ້ນພາສີ​ລາຍ​ໄດ້​ສຳລັບ​ພະນັກງານ​ຂັ້ນສູງ​ໃນ​ຟິລິບ​ປິນ ​ແລະ ກົດໝາຍ​​ເຮັດ​ໝັນຜູ້​ມີ​ຄວາມ​ຜິດ​ໃນ​ຄະດີ​ພະຍາຍາມ​ຂົມ​ຂືນ​ຢູ່ ສ. ​ເກົາຫລີ​ຂໍ​ເລີ່​ມຕົ້ນກັບ​ເລື່ອງ​ຮ່າງ​ກົດ​ບັດ​ທີ່​ສ້າງ​ສຽງ​ຮື​ຮາ​ຟ້າ​ລັ່ນ, ສຽງ​ວິພາກ​ວິຈານ​ຢູ່​ຟິລິບ​ປິນ​ໃນ​ປັດຈຸບັນ​ນັ້ນກໍ​ຄື​ຮ່າງ​ກົດ​ບັດ​ວ່າ ດ້ວຍ​ການ​ຍົກ​ເວັ້ນພາສີ​ລາຍ​ໄດ້​ສຳລັບ​ພະນັກງານ​ຂັ້ນສູງ​ຂອງ​ລັດ (Vientiane Times 11/01/2018) ​ເຊິ່ງ ໜັງສືພິມ Daily Inquirer ຂອງ​ຟີ​ລິບ​ປິນບອກ​ວ່າ​ຖ້າ​ຮ່າງ​ກົດ​ບັດ​ນີ້​ຖືກ​ຮັບຮອງ ​​ແລະ ປະກາດ​ໃຊ້​ຢ່າງ​ເປັນ​ທາງ​ການ​ແລ້ວ, ພະນັກງານ​ລັດ​ລະດັບ “​ເຕີບໆ” ກໍ​ຈະ​ບໍ່​ມີ​ພັນທະເສຍ​ພາສີ​ລາຍ​ໄດ້​ຂອງ​ພວກ​ຕົນ​ອີກ​ຕໍ່​ໄປ. ຜູ້​ທີ່​ອອກ​ມາ​ຕ້ານ​ຮ່າງ​ກົດໝາຍ​ນີ້​ແບບ​ຫົວ​ຄາດ​ຄານັ້ນ​ໄດ້​​ແກ່ ທ່ານ ​ເນ​ຣີ​ໂກນ ​ເມນາ​ເຣັດ (Neri Colmenares) ຈາກ​ພັກ​ບາ​ຢັນ​ມູ​ນາ​ຂອງ ຟີ​ລິບ​ປິນ ​ໂດຍ​ທ່ານ ​ໄດ້​ເຕືອນ​ວ່າ ຖ້າ​ຮ່າງ​ກົດ​ບັດ​ນີ້​ຖືກ​ຮັບຮອງ​ເອົາ​ມັນ​ກໍ​ຈະ​ເຮັດ​ໃຫ້​ລັດຖະທຳ​ມະນູນ​ເປັນ​ເຄື່ອງມື​ຮັບ​ໃຊ້​ສ່ວນ​ບຸກຄົນ​ເທົ່າ​ນັ້ນ. ໝວດ​ທີ 15 ມາດຕາ 17 ຂອງ​ມະຕິ​ສະພາ​ຕ່ຳ ​ແລະ ສະພາ​ສູງ​ເລກທີ 8 ​ໄດ້​ກຳນົດ​ວ່າ ປະທານາທິບໍດີ ພ້ອມ​ດ້ວຍ​ຜູ້​ຮອງ,​ປະທານ​ສະພາ​ສູງ, ສະພາ​ຕ່ຳ, ບັນດາ​ສະມາຊິກ​ລັດຖະສະພາ, ປະ​ທານ​ສານ, ບັນດາ​ປະທານ​ໃນ​ຄະນະ​​ກຳມະການ​ລັດຖະທຳ​ມະນູນ​ລ້ວນ​ແຕ່​ຈະ​ໄດ້​ຮັບ​ການ​ຍົກ​ເວັ້ນການ​ເສຍ​ພາສີ​ລາຍ​ໄດ້. ທ່ານ ຜູ້​ແທນ ​ເນຣີ​ໂກນ​ເມ ນາ​ເຣັດ ​ໄດ້​ມີ​ຄຳ​ເຫັນ​ຕື່ມ​ວ່າ ​ເມື່ອ​ເປັນ​ແນວ​ນີ້​ກໍ​ສາມາດ​ເວົ້າ​ໄດ້​ວ່າ​ຮ່າງ​ກົດ​ບັດ​ຍົກ​ເວັ້ນພາສີ​ລາຍ​ໄດ້​ສຳລັບ​ພະນັກງານ​ລັດ​ຂັ້ນສູງ​ສ້າງ​ຂຶ້ນ​ເພື່ອ​ຜົນ​ປະ​ໂຫຍ​ດຂອງ​ກຸ່ມ​ກ້ອນ​ເພາະວ່າ​ໃນ​ຂະນະ​ທີ່​ປະຊາຊົນ​ສາມັນ​ທຳ​ມະ​ດາ​ທີ່​ມີ​ພັນທະ​ເສຍ​ພາສີ​ໄດ້​ຕໍ່ສູ້​ແບບ​ຍືດ​ເຍື້ອຍາວ​ນານ​ມາ​​ເປັນ​ເວລາ​ຫລາຍ​ປີ​ເພື່ອ​ຫລຸດຜ່ອນ​ການ​ເສ​ຍພາສີ​ລາຍ​ໄດ້​ຂອງ​ພວກ​ຕົນ​ແຕ່​ບັນດາ​ຜູ້​ແທນ​ລັດຖະສະພາ​ພັດ​ຈະ​ອອກ​ກົດບັດຍົກ​ເວັ້ນພາສີ​ລາຍ​ໄດ້​ໃຫ້​ພວກ​ຕົນ​ເອງ, ​ເປັນ​ຫຍັງ​ພະນັກງານ​ເງິນ​ເດືອນ​ສູງໆ ຈຶ່ງ​ຈະ​ໄດ້ສິດ​ຍົກ​ເວັ້ນພາສີ​ແຕ່​ຄົນ​ທຳ​ມະ​ດາ​ພັດ​ຕ້ອງ​ໄດ້​ເສຍ​ພາສີ? ນີ້​ຄື​ຄຳ​ຖາມ ຢ້ຳຂອງ​ທ່ານ​ຜູ້​ແທນ​​ເນເຣັດ ທີ່​ບໍ່​ເຫັນ​ພ້ອມ​ນຳ​ຮ່າງ​ກົດ​ບັດ ດັ່ງກ່າວ. ມີ​ອີກ​ຂ່າວ​ໜຶ່ງ​ທີ່​ຕິດ​ຫ້ອຍ​ກັບ​ຟີ​ລິບ​ປິນນັ້ນກໍ​ຄື ສະຖິຕິ​ອົງການ​ສາກົນ​ທີ່​ເຮັດ​ໜ້າ​ທີ່​ກຳນົດ​ມາດຕະຖານ​ຂອງ​ປະ​ເທດ​ທີ່​ປະຊາຊົນ​ມີ​ຄວາມສຸກ​ທີ່​ສຸດ​ໄດ້​ກຳນົດ​ວ່າ ຟີ​ລິບ​ປິນ​ເປັນ​ປະ​ເທດ​ລະດັບ​ທີ 3 ຂອງ​ໂລກ ທີ່​ພົນລະ​ເມືອງ​ມີ​ຄວາມສຸກ​ທີ່​ສຸດ​ປະຈຳ​ປີ 2017 ທັງໆ ທີ່​ປະ​ເທດ​ນີ້​ປະ​ເຊີນ​ກັບ​ບັນຫາ​ໄພພິບັດ​ທາງ​ທຳ​ມະ​ຊາດ ​ແລະ ບັນຫາ​ຄວາມ​ຂັດ​ແຍ່ງ​ຕ່າງໆ. ຄະ​ແນນ​ມາດ​ຕະຖານ​ຄວາມສຸກ​ຂອງ ຟີ​ລິບ​ປິນນັ້ນພຸ່ງ​ຂຶ້ນ​ເຖິງ 84 ຈຸດ​ລື່ນ​ຄະ​ແນນ 79 ຈຸດ​ໃນ​ປີ 2016 (​ເຊິ່ງຟີ​ລິບ​ປິນ​ໄດ້​ຕິດ​ອັນ​ດັບ​ທີ 3 ​ເຊັ່ນ​ກັນ). ໜຶ່ງ​ໃນ​ປັດໄຈ​ທີ່​ຊ່ວຍ​ກຳນົດ​ລະດັບ​ຄວາມສຸກ​ຂອງ​ຊາວ ຟີ​ລິບ​ປິນ ປະຈຳ​ປີ 2017 ນັ້ນກໍ​ຄື​ການ​ເບິ່ງ​ໂລກ​ໃນ​ແງ່​ດີ​ທີ່​ລໍຄອຍ​ຢູ່​ເບື້ອງໜ້າ. ຄົນ​ຟີ​ລິບ​ປິນມີ​ຄວາມ​ເຊື່ອ​ຢ່າງ​ໜັກ​ແໜ້ນວ່າ ​ເສດຖະກິດ​ຂອງ​ປະ​ເທດ​ຈະ​ດີ​ຂຶ້ນ​ໃນ​ປີ 2018 ນີ້. ​ເລື່ອງ​ທີ່​ຈະ​ເວົ້າຕໍ່​ໄປ​ແມ່ນ​ຖອດ​ມາ​ຈາກ​ໜັງສືພິມ “ຜູ້​ແທນ​ປະຊາຊົນ” ຂອງ​ສະພາ​ແຫ່ງ​ຊາດ ກ່ຽວ​ກັບ​ມາດ​ຕະການ​ເດັດໆ​ເພື່ອ​ຜະ​ເດັດ​ເສິກ​ກັບ​ບຸກຄົນ​ບ້າ​ຕັນຫາ​ໜ້າ​ມືດ​ພະຍາຍາມ​ຂົ່ມຂືນ​ຝຶນ​ໃຈ​ຄົນ​ອື່ນ. ​ເລື່ອງ​ມີ​ຢູ່​ວ່າ​ໃນ​ທ້າຍ​ປີ 2017 ລັດຖະສະພາ ສ. ເກົາຫລີ ​ໄດ້​ຕົກລົງ​ເຫັນ​ດີ​ໃຫ້​ປັບປຸງ​ກົດໝາຍ​ກຳນົດ​ໂທດ​ຜູ້​ກະທຳ​ຜິດ​ໃນ​ຄະດີ​ພະຍາຍາມ​ຂົມ​ຂືນ.  ສ. ​ເກົາຫລີ ມີ​ກົດໝາຍ​ລົງ​ໂທດ​ຜູ້​ກະທຳ​ຜິດ​ໃນ​ຄະດີ​ຂົ່ມ​ຂືນທີ່​ປະກາດ​ໃຊ້​ໃນ​ປີ 2011 ​ໂດຍ​ກົດ   ໝາຍ​ໄດ້​ກຳນົດ​ ​ໃຫ້​ເຮັດ​ໝັນ (ຕອນ​ດ້ວຍ​ເຄມີ) ຜູ້​ກະທຳ​ຜິດ​ເພື່ອ​ໃຫ້​ຜູ້ກ່ຽວ​ໝົດ​ຄວາມ​ຕ້ອງການ​ທາງ​ເພດ. ການ​ເຮັດ​ໝັນ​ນັ້ນ​ແມ່ນ​ເຮັດ​ດ້ວຍ​ວິທີ​ການ​ກິນ​ຢາ ຫລື ສິດ​ຢາ​ໃຫ້      ​ເສື່ອ​ມສະມັດ​ຕະພາບ​ທາງ​ເພດ. ​ແຕ່​ສຳລັບ​ກົດໝາຍ​ທີ່​ພວມ​ຈະ​ປັບປຸງ​ໃໝ່​ນີ້​ເຄັ່ງ​ຂັດຮັດກຸມ​ກວ່າ​ເກົ່າ​ຄື​ກຳນົດ​ເຮັດ​ໝັນ​ຜູ້ມີຄວາມ​ຜິດພຽງ​ແຕ່​ມີ​ຄວາມ “ພະຍາຍາມ​ຂົ່ມ​ຂືນ” ກົດໝາຍ​ນີ້​ສົ່ງ​ສັນຍານ​ເຕືອນ​ດີ​ທີ່​ສຸດ​ຄື​ມີ​ໂທດ​ຖືກ​ເຮັດ​ໝັນ​ທັງ​ສຳລັບ​ຄະດີ​ຂົ່ມ​ຂືນ ​ແລະ ພະຍາຍາມ​ຂົ່ມຂືນ.

- Wave100S AD to Website 2020 0 - ໄຂ​ເປືອກ​ຕາ​ເບິ່ງ​ກົດໝາຍ​ບ້ານ​ເພິ່ນ
- WhatsApp Image 2020 05 27 at 5 - ໄຂ​ເປືອກ​ຕາ​ເບິ່ງ​ກົດໝາຍ​ບ້ານ​ເພິ່ນ
- WhatsApp Image 2020 05 27 at 5 - ໄຂ​ເປືອກ​ຕາ​ເບິ່ງ​ກົດໝາຍ​ບ້ານ​ເພິ່ນ
error: Alert: ເນື້ອຫາຂ່າວມີລິຂະສິດ !!