ປະເທດຜູ້ບໍລິຈາກມອບເງິນ 2.300 ລ້ານໂດລາ ຊ່ວຍການສຶກສາໂລກທີສາມ
ກຸ່ມປະເທດຜູ້ບໍລິຈາກຖະແຫລງວ່າ: ຈະຈັດສັນເງິນ 2.300 ລ້ານໂດລາສະຫະລັດ ເພື່ອເປັນທຶນສະໜັບສະໜູນການສຶກສາສຳລັບປະເທດກຳລັງພັດທະນາ ພາຍຫລັງກອງປະຊຸມລະຫວ່າງປະເທດ ທີ່ນະຄອນຫລວງດາກາ ຂອງເຊເນກັດ.
ກຸ່ມຫຸ້ນສ່ວນໂລກເພື່ອການສຶກສາ (GPE) ປະກອບດ້ວຍປະເທດຜູ້ບໍລິຈາກ, ອົງການສາກົນ ແລະ ພາກເອກະຊົນ ຈະເພີ່ມທຶນສະໜັບສະໜູນ 1.300 ລ້ານໂດລາສະຫະລັດ ຂອງເງິນສະໜັບສະໜູນໃນໄລຍະສາມປີຜ່ານມາ. ທາງດ້ານກຸ່ມປະເທດກຳລັງພັດທະນາຖະແຫລງວ່າ: ຈະຈັດສັນງົບປະມານພາກລັດເພື່ອການສຶກສາເພີ່ມຂຶ້ນເຊັ່ນກັນໃນໄລຍະປີ 2018-2020 ລວມເປັນ 110.000 ລ້ານໂດລາສະຫະລັດ ຈາກ 80.000 ລ້ານໂດລາສະຫະລັດ ໃນໄລຍະສາມປີກ່ອນ. ອະດີດນາຍົກລັດຖະມົນຕີ ຈູເລຍ ກິລາດ ຂອງອົດສະຕຣາລີ ເຊິ່ງເປັນປະທານກຸ່ມ GPE ຖະແຫລງວ່າ: ເພື່ອເປັນຫລັກປະກັນໃຫ້ເດັກ ແລະ ເຍົາວະຊົນທຸກຄົນເຂົ້າເຖິງການສຶກສາຢ່າງມີຄຸນນະພາບ. ປະທານາທິບໍດີ ເອມານູແອລ ມາຄຣົງ ຜູ້ນຳຝຣັ່ງ ເຊິ່ງເປັນປະທານຮ່ວມໃນກອງປະຊຸມກັບປະທານາທິບໍດີເຊເນກັດ ຖະແຫລງວ່າ: ຝຣັ່ງຈະຈັດສັນທຶນເພີ່ມອີກເປັນ 250 ລ້ານໂດລາສະຫະລັດ ໃນໄລຍະ 3 ປີ ໂດຍມີສະຫະລາຊະອານາຈັກເປັນຜູ້ບໍລິຈາກລາຍໃຫຍ່ທີ່ສຸດ 520 ລ້ານໂດລາສະຫະລັດ.
