ກະຊວງການເງິນ ດຳເນີນກອງປະຊຸມຄົບຄະນະບໍລິຫານງານພັກ ຄັ້ງທີ 5 ສະໄໝທີ II

ໃນລະຫວ່າງວັນທີ 5-6 ກຸມພານີ້ ກະຊວງການເງິນ, ໄດ້ຈັດກອງປະຊຸມຄົບຄະນະບໍລິຫານງານພັກ ຄັ້ງທີ 5 ສະໄໝທີ II ຂອງ​ຕົນຂຶ້ນໂດຍການເປັນປະທານຂອງ ສະຫາຍ ສົມດີ ດວງດີ ກໍາມະການສູນກາງພັກ  ຮອງນາຍົກລັດຖະມົນຕີ ລັດຖະມົນຕີກະຊວງການເງິນ  ຄະນະບໍລິຫານງານພັກກະຊວງ, ຄະນະພັກຮາກຖານ, ຄະນະໜ່ວຍພັກເຂົ້າຮ່ວມຢ່າງ​ພ້ອມພຽງ ​ເພື່ອຈະໄດ້ພ້ອມກັນສຸມໃສ່ສະຫລຸບຕີລາຄາຄືນການຊີ້ນໍາໆພາວຽກງານຂອງຄະນະພັກໃນໄລຍະປີຜ່ານມາ ແລະ ວາງທິດທາງແຜນການໃນຕໍ່ໜ້າ, ໂດຍສະເພາະແມ່ນດ້ານລະ ບຽບການຕ່າງໆທີ່ຄະນະບໍລິຫານງານໄດ້ເອົາໃຈໃສ່ຊີ້ນໍາໆພາ ແລະ ເພື່ອເປັນການຈັດຕັ້ງຜັນຂະຫຍາຍກອງປະຊຸມໃຫຍ່ ຄັ້ງທີ X ຂອງພັກ​ເຂົ້າສູ່​ລ່ວງ​ເລິກ.

ພ້ອມດຽວກັນນີ້, ໃນກອງປະຊຸມຄົບຄະນະບໍລິຫານງານດັ່ງກ່າວຍັງໄດ້ພ້ອມກັນ, ປຶກສາຫາລື,   ແລະ ປະກອບຄໍາຄິດເຫັນໃສ່ເອກະສານສຳຄັນຕ່າງໆຄື: ຮ່າງແຜນກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນຂອງອົງຄະນະພັກກະຊວງການເງິນ, ຮ່າງບົດສະຫລຸບ ແລະ ແຜນການຈັດຕັ້ງຜັນຂະຫຍາຍຜົນການດໍາເນີນຊີວິດການເມືອງປັບປຸງປົວແປງພັກໃນປີ 2017, ແຜນພັດທະນາຂະແໜງສ່ວຍສາອາກອນໄລຍະປີ 2018-2020 ແລະ ເອກະສານສຳຄັນຈໍານວນໜຶ່ງເພື່ອຄວາມເປັນເອກະພາບໃນການຈັດຕັ້ງປະຕິບັດໜ້າທີ່ວຽກງານຂອງຂະແໜງ ການເງິນ ແລະ ສືບຕໍ່ຜັນຂະຫຍາຍຈຸດດີ, ປັບປຸງຂໍ້ຄົງຄ້າງໃນໄລຍະຜ່ານມາໃຫ້ມີປະສິດທິຜົນສູງ.