ງານສະແດງສິນຄ້າເຟີນີເຈີວຽງຈັນ ຄັ້ງທີ 3 ຈະຈັດຂຶ້ນໃນທ້າຍເດືອນມີນານີ້
ພິທີຖະແຫລງຂ່າວຈັດງານວາງສະແດງສິນຄ້າເຟີນີເຈີວຽງຈັນ ຄັ້ງທີ 3 ໄດ້ມີຂຶ້ນໃນວັນທີ 7 ກຸມພານີ້, ທ່ານ ກອງມາລາ ພົມມາໄລ ຮອງປະທານສະມາຄົມເຟີນີເຈີລາວ ໃຫ້ຮູ້ວ່າ: ສະມາຄົມເຟີນີເຈີລາວໄດ້ມີການກະກຽມຈະເປີດງານວາງສະແດງເຟີນີເຈີວຽງຈັນ ຄັ້ງທີ 3 ຂຶ້ນໃນທ້າຍເດືອນມີນາ 2018 ນີ້, ທີ່ນະຄອນຫລວງວຽງຈັນ, ນອກຈາກເປັນການສົ່ງເສີມການຕະຫລາດ ແລະ ການແລກປ່ຽນບົດຮຽນປະສົບການຕ່າງໆກັນແລ້ວດ ຍັງເປັນການຕ້ອນຮັບປີທ່ອງທ໋ຽວລາວອີກດ້ວຍ ເພື່ອໃຫ້ສັງຄົມໄດ້ຮັບຮູ້ຜະລິດຕະພັນໄມ້ລາວຫລາຍຂຶ້ນ ແລະ ກະຕຸກຊຸກຍູ້ ໃຫ້ຫົວໜ່ວຍທຸລະກິດເຟີນີເຈີໄມ້ລາວໄດ້ເຕີບໃຫຍ່ຂະຫຍາຍໂຕ ແລະ ສາມາດເຂົ້າສູ່ຕະຫລາດພາກພຶ້ນ ແລະ ສາກົນໄດ້, ຊຶ່ງໃນງານວາງສະແດງຄັ້ງນີ້ຄາດວ່າຈະມີຫົວໜ່ວຍທຸລະກິດ ແລະ ປຸງແຕ່ງໄມ້ສຳເລັດຮູບທັງພາຍໃນ ແລະ ຕ່າງປະເທດເຂົ້າຮ່ວມຫລາຍກວ່າ 200 ຫ້ອງ.
ທ່ານ ຫລ້າສາຍ ນວນທາສິງ ຫົວໜ້າພະແນກກະສິກຳ ແລະ ປ່າໄມ້ ນະຄອນ ຫລວງວຽງຈັນ ໃຫ້ຮູ້ວ່າ: ງານວາງສະແດງເຟີນີເຈີວຽງຈັນ ຄັ້ງນີ້ ໄດ້ສະແດງໃຫ້ເຫັນເຖິງການເອົາໃຈໃສ່ປະຕິບັດຄຳສັ່ງເລກທີ 15/ນຍ, ເພື່ອຊົມໃຊ້ຊັບພະຍາກອນປ່າໄມ້ ໃຫ້ເກີດຜົນປະໂຫຍດສູງສຸດ, ປັດຈຸບັນ ຢູ່ ນະຄອນຫລວງວຽງຈັນ ມີເນື້ອທີ່ປ່າໄມ້ປ່ອງ ແລະ ເຂດປ່າສະຫງວນ ຫລາຍກວ່າ 1 ແສນເຮັກຕາ, ເນື້ອທີ່ປ່າປູກ 1900 ເຮັກຕາ, ແລະ ນະຄອນຫລວງວຽງຈັນ ໄດ້ມີແຜນເພີ່ມອັດຕາປົກຫຸ່ມປ່າໄມ້ໃຫ້ໄດ້ 70% ໃນອານາຄົດອັນໃກ້ໆນີ້.
