ອາຣັບບີ ຊາອຸດິດ ຫລຸດຜ່ອນກົດ ຊຸດແຕ່ງກາຍຜູ້ຍິງ
ອົງການທາງສາສະໜາຂອງອາຣັບບີ ຊາອຸດິດ ປະກາດໃນວັນທີ 10 ກຸມພາວ່າ: ຜູ້ຍິງອາຣັບບີ ຊາອຸດິດ ບໍ່ຈຳເປັນຕ້ອງໃສ່ອາບາຍະ, ຊຸດຄຸມ ແລະ ຍາວ ທີ່ເປັນສັນຍາລັກຂອງຄວາມສັດທາຕໍ່ສາສະໜາ.
ສຳນັກຂ່າວຣອຍເຕີລາຍງານຈາກເມືອງດູໄບ ປະເທດສະຫະນະຄອນ ເອເມຣັດ ອາຣັບ (UAE) ໃນວັນທີ 10 ກຸມພາວ່າ: ການເຄື່ອນໄຫວທີ່ເປັນອີກສິ່ງບົ່ງບອກ ຄວາມພະຍາຍາມຂອງລາຊະອານາຈັກອະນຸລັກນິຍົມ ທີ່ຈະໄປສູ່ຄວາມທັນສະໄໝ. ທ່ານ ຊີກ ອັບດຸນເລາະ ອັດ ມຸກລັກ ສະມາຊິກສະພານັກສາສະໜາອາວຸໂສອາຣັບບີ ຊາອຸດິດ ກ່າວໃນລາຍງານປະຈຳທາງໂທລະພາບວ່າ: ແມ່ຍິງມຸດສະລິມຄວນແຕ່ງກາຍໃຫ້ສຸພາບຮຽບຮ້ອຍ, ແຕ່ບໍ່ຈຳເປັນຈະຕ້ອງໃສ່ອາບາຍະ “ຜູ້ຍິງມຸດສະລິມທີ່ເຄັ່ງສາສະໜາກວ່າ 90% ໃນໂລກມຸດສະລິມບໍ່ໃສ່ອາບາຍະ. ດັ່ງນັ້ນ ເຮົາຈຶ່ງບໍ່ຄວນບັງຄັບປະຊາຊົນໃຫ້ໃສ່ຊຸດນີ້”.
ຄຳຖະແຫລງຖືເປັນເທື່ອທຳອິດທີ່ອອກຈາກບຸກຄົນສຳຄັນໃນອົງການສາສະໜາຂອງປະເທດ ແລະ ມີຂຶ້ນພາຍຫລັງສິດທິເສລີພາບຫລາຍປະການທີ່ເກີດຂຶ້ນໃນປະເທດ. ໃນໄລຍະເວລາບໍ່ດົນມານີ້, ພາຍຫລັງເຈົ້າຊາຍ ໂມຮຳເໝັດ ບິນ ຊັລມານ ໄດ້ຮັບແຕ່ງຕັ້ງໃຫ້ເປັນມົງກຸດລາຊະກຸມານ.
ແມ່ຍິງອາຣັບບີ ຊາອຸດິດ ເລີ່ມໃສ່ຊຸດອາບາຍະທີ່ມີສີສັນງົດງາມຫລາຍກວ່າເກົ່າ ໃນໄລຍະຫລາຍປີຜ່ານມາ ເຊັ່ນສີຟ້າ ຫລື ສີບົວ ເຊິ່ງແຕກຕ່າງກັນຫລາຍກັບສີດຳແບບດັ້ງເດີມ. ນອກຈາກນັ້ນ ການໃສ່ອາບາຍະທັບກະໂປງຍາວ ຫລື ໂສ້ງ ເລີ່ມພົບເຫັນໄດ້ທົ່ວໄປ ໃນບາງສ່ວນຂອງປະເທດ.
