ສ.ເກົາຫລີ ຈະຫລຸດລະດັບເຕືອນໄພໄຂ້ຫວັດສັດປີກຈາກລະດັບສູງສຸດ
ເຊອຸນ 18 ເມສາ: ກະຊວງກະສິກຳ ສ.ເກົາຫລີ ແຈ້ງວ່າ: ຈະຫລຸດລະດັບການເຕືອນໄພໄຂ້ຫວັດສັດປີກລົງໜຶ່ງລະດັບຈາກລະດັບສູງສຸດ ເລີ່ມແຕ່ວັນທີ 19 ເມສານີ້ ເນື່ອງຈາກບໍ່ພົບສັດປີກຕິດເຊື້ອເທື່ອໃໝ່ໃນໄລຍະ 2 ອາທິດຜ່ານມາ.
ສ.ເກົາຫລີ ຜະເຊີນໄຂ້ຫວັດສັດປີກລະບາດຄັ້ງຮຸນແຮງທີ່ສຸດພາຍຫລັງພົບການລະບາດໃນເດືອນພະຈິກ ຕ້ອງກຳຈັດສັດປີກຫລາຍກວ່າ 37 ລ້ານໂຕ ຄິດເປັນ 1 ໃນ 5 ຂອງຈຳນວນສັດປີກທົ່ວປະເທດ. ຫລັງສຸດກະຊວງກະສິກຳ, ອາຫານ ແລະ ກິດຈະການຊົນນະບົດ ຖະແຫລງວ່າ: ສະຖານະການໄຂ້ຫວັດສັດປີກລະບາດອາດຈະບັນເທົາລົງແລ້ວ ເນື່ອງຈາກບໍ່ພົບການລະບາດເທື່ອໃໝ່ນັບແຕ່ວັນທີ 4 ເມສາ. ດັ່ງນັ້ນ ກະຊວງຈະຫລຸດລະດັບການເຕືອນໄພລົງໜຶ່ງລະດັບຈາກລະດັບສູງສຸດເລີ່ມແຕ່ວັນທີ 19 ເມສານີ້ ແລະ ຈະເຝົ້າຕິດຕາມສະຖານະການ ລວມທັງສີດຢາຂ້າເຊື້ອຈົນກວ່າ ສ.ເກົາຫລີ ຈະປອດຈາກໄຂ້ຫວັດສັດປີກ.
