ອາເມລິກາຮຽກຮ້ອງບັນດາປະເທດ ຮ່ວມບູລະນະອີຣັກຫລັງສົງຄາມ IS

ບັນດາປະເທດຮ່ວມຫາລືຢູ່ກູເວດ ວ່າດ້ວຍແຜນບູລະນະຟື້ນຟູອີຣັກ ຫລັງການສູ້ຮົບກັບກຸ່ມ IS ໃນໄລຍະ 3 ປີຜ່ານມາ ສ້າງຄວາມເສຍຫາຍມະຫາສານ.
ສຳນັກຂ່າວຕ່າງປະເທດລາຍງານຈາກນະຄອນຫລວງກູເວດ ປະເທດກູເວດ ໃນວັນທີ 13 ກຸມພາວ່າ: ອົງການສາກົນ ແລະ ບັນດາປະເທດ ຮ່ວມປະຊຸມຫາລືແນວທາງການບູລະນະຟື້ນຟູອີຣັກ ຫລັງສິ້ນສົງຄາມ, ລັດຖະບານແບກແດດປະກາດໄຊຊະນະເໜືອກຸ່ມກໍ່ການຮ້າຍ IS ໃນເດືອນທັນວາປີຜ່ານມາ ຫລັງການສູ້ຮົບດຳເນີນມາ 3 ປີ.
ທ່ານ ເຣັກ ທິລເລີສັນ ລັດຖະມົນຕີກະຊວງການຕ່າງປະເທດອາເມລິກາ ຮຽກຮ້ອງຂໍຄວາມຮ່ວມມືຈາກປະເທດພັນທະມິດແນວຮ່ວມຕໍ່ຕ້ານ IS ໃນການຟື້ນຟູອີຣັກທີ່ໄດ້ຮັບຄວາມເສຍຫາຍຮຸນແຮງຈາກສົງຄາມ ໂດຍເນັ້ນເຖິງຄວາມຈຳເປັນຮີບດ່ວນໃນການບູລະນະເມືອງໃຫ້ກັບສູ່ສະພາບປົກກະຕິສຳລັບການຢູ່ອາໄສຂອງປະຊາຊົນ ບໍ່ວ່າຈະເປັນການກຳຈັດລະເບີດທີ່ອາດຫລົງເຫລືອຢູ່, ການຟື້ນຟູໂຄງລ່າງພື້ນຖານດ້ານຕ່າງໆເຊັ່ນ: ໄຟຟ້າ, ນ້ຳປະປາ, ສາທາລະນະສຸກ ແລະ ການສຶກສາ ບໍ່ສະນັ້ນອາດສ່ຽງທີ່ອີຣັກຈະຖອຍຫລັງກັບສູ່ຫາຍະນະຈາກການສວຍໂອກາດຂອງກຸ່ມຫົວຮຸນແຮງອີກຄັ້ງ.