ເກີດເຫດໄຟໄໝ້ຕະຫລາດພັດທະນາເຊໂນ.
February 16, 2018 - 6:05 PM
ເຈົ້າໜ້າທີ່ສະກັດກັ້ນ ແລະ ມອດໄຟແຂວງສະຫວັນນະເຂດ ໃຫ້ຮູ້ວ່າ: ເວລາປະມານ 19:00 ໂມງຂອງວັນທີ 15 ກຸມພາຜ່ານມາ, ໄດ້ເກີດເຫດໄຟໄໝ້ຢູ່ໃນຕະຫລາດພັດທະນາຄົບວົງຈອນເຊໂນ, ເມືອງອຸທຸມພອນແຂວງສະຫວັນນະເຂດໄດ້ຮັບຄວາມເສຍຫາຍສົມຄວນ. ຕະຫລາດດັ່ງກ່າວສ້າງຂຶ້ນມາໄດ້ 5 ປີແລ້ວ, ໂດຍແມ່ນບໍລິສັດມິດຕະພາບເປັນເຈົ້າຂອງ ແລະ ເປັນຕະຫລາດຂະໜາດໃຫຍ່ ແລະ ກວ້າງຂວາງ, ເຊິ່ງຈຸດຕົ້ນເພີງແມ່ນຢູ່ເບື້ອງຫລັງຂອງອາຄານຕະຫລາດທີ່ຂາຍສິນຄ້າປະເພດເສື້ອຜ້າ ແລະ ເຄື່ອງອຸປະໂພກ-ບໍລິໂພກທົ່ວໄປ, ໂດຍໄດ້ລະດົມກໍາລັງເຈົ້າໜ້າທີ່ ແລະ ລົດນໍ້າຫລາຍຄັນເຂົ້າດັບມອດໄຟຫລາຍຊົ່ວໂມງ ຈຶ່ງສາມາດຄວບຄຸມໄຟບໍ່ໃຫ້ລຸກໄໝ້ຂະຫຍາຍວົງກວ້າງ, ສ່ວນສາເຫດ ແລະ ຜົນເສຍຫາຍຈາກເຫດໄຟໃໝ້ຄັ້ງນີ້ເຈົ້າໜ້າທີ່ກຳລັງເລັ່ງສືບສວນ-ສອບສວນ.
