ອິນໂດເນເຊຍລົງນາມສັ່ງຊື້ ເຮືອບິນຮົບຣັດເຊຍ 11 ລຳ
ອິນໂດເນເຊຍລົງນາມໃນຂໍ້ຕົກລົງສັ່ງຊື້ ເຮືອບິນຮົບຊູຄອຍ ຊູ-35 ຈາກຣັດເຊຍຈຳນວນ 11 ລຳ ລວມມູນຄ່າ 1.140 ລ້ານໂດລາສະຫະລັດ. ຈາກການເປີດເຜີຍຂອງໂຄສົກກະຊວງປ້ອງກັນປະເທດອິນໂດເນເຊຍ ໃນວັນທີ 17 ກຸມພາ.
ສຳນັກຂ່າວ AFP ລາຍງານຈາກນະຄອນຫລວງຈາກາຕາ ປະເທດອິນໂດເນເຊຍ ໃນວັນທີ 18 ກຸມພາວ່າ: ທ່ານ ໂຕຕອກ ຊູກິຮາໂຕ ໂຄສົກກະຊວງປ້ອງກັນປະເທດອິນໂດເນເຊຍ ເປີດເຜີຍວ່າ: ຂໍ້ຕົກລົງທີ່ລົງນາມໂດຍຜູ້ແທນຂອງ 2 ປະເທດ ໃນນະຄອນຫລວງຈາກາຕາ ໃນວັນທີ 14 ກຸມພາ ລວມມູນຄ່າ 1.140 ລ້ານໂດລາສະຫະລັດ ໂດຍເຮືອບິນ 2 ລຳທຳອິດຈະສົ່ງມອບໃນເດືອນສິງຫາ 2016 ສ່ວນອີກ 6 ລຳສົ່ງມອບພາຍໃນ 18 ເດືອນ ຫລັງສັນຍາມີຜົນບັງຄັບໃຊ້ ແລະ 3 ລຳສຸດທ້າຍຈະສົ່ງມອບໃນ 5 ເດືອນຫລັງຈາກນັ້ນ.
ອິນໂດເນເຊຍ ແລະ ຣັດເຊຍ ລົງນາມໃນບັນທຶກຄວາມເຂົ້າໃຈ (MOU) ເພື່ອແລກປ່ຽນເຮືອບິນຮົບຊູຄອຍ 11 ລຳຂອງຣັດເຊຍ ກັບສິນຄ້າໂພກກະພັນ ທີ່ນະຄອນຫລວງມົດສະກູ ໃນຕົ້ນເດືອນສິງຫາ.
