ສ.ເກົາຫລີ ປະກາດໃຫ້ເມືອງກຸນຊັນເປັນເຂດ ວິກິດເສດຖະກິດຫລັງຈີເອັມປິດໂຮງງານ
February 20, 2018 - 6:34 PM
ໂຄສົກປະທານາທິບໍດີ ສ.ເກົາຫລີ ຖະແຫລງວ່າ: ລັດຖະບານໄດ້ປະກາດໃຫ້ເມືອງກຸນຊັນເປັນເຂດວິກິດທາງອຸດສາຫະກຳ ແລະ ການຈ້າງງານ ພາຍຫລັງບໍລິສັດ ເຈເນີຣັລມໍເຕີ ຖະແຫລງໃນອາທິດຜ່ານມາວ່າ: ຈະປິດໂຮງງານໃນເມືອງດັ່ງກ່າວ.
ການປະກາດໃຫ້ເປັນເຂດວິກິດເສດຖະກິດຈະເຮັດໃຫ້ລັດຖະບານ ສ.ເກົາຫລີ ສາມາດຈັດສັນການຊ່ວຍເຫລືອທາງການເງິນແບບພິເສດເຊັ່ນ: ເງິນກູ້ດອກເບ້ຍຕໍ່າ ແລະ ການສະໜັບສະໜູນທາງການເງິນສຳລັບຜູ້ຖືກເລີກຈ້າງ. ກ່ອນໜ້ານີ້ ບໍລິສັດ ຈີເອັມ ຜູ້ຜະລິດລົດທີ່ມີສຳນັກງານຢູ່ເມືອງດີທຣອຍ ໄດ້ປະກາດໃນອາທິດຜ່ານມາວ່າ: ຈີເອັມ ຈະປິດໂຮງງານໃນເມືອງກຸນຊັນ ທາງຕາເວັນຕົກສຽງໃຕ້ຂອງນະຄອນຫລວງເຊອຸນ ໃນເດືອນພຶດສະພານີ້ ແລະ ຈະຕັດສິນໃຈອະນາຄົດໂຮງງານສ່ວນທີ່ເຫລືອອີກ 3 ແຫ່ງໃນ ສ.ເກົາຫລີ ພາຍໃນອາທິດນີ້.
