ລະເບີດທະນາຄານໃນມຽນມາ ເສຍຊີວິດ 2 ຄົນ ບາດເຈັບ 22 ຄົນ
ເກີດເຫດລະເບີດຂຶ້ນ ທີ່ສາຂາໜຶ່ງຂອງທະນາຄານໂຍມາ ໃນເມືອງລ່າສຽວ ເມືອງໃຫຍ່ທີ່ສຸດຂອງລັດສານ ທາງຕອນເໜືອຂອງປະເທດມຽນມາ ເຮັດໃຫ້ມີຜູ້ເສຍຊີວິດ 2 ຄົນ ແລະ ໄດ້ຮັບບາດເຈັບອີກ 22 ຄົນ.
ເຈົ້າໜ້າທີ່ມຽນມາກ່າວວ່າ: ຜູ້ເສຍຊີວິດເປັນພະນັກງານຂອງທະນາຄານທັງ 2 ຄົນ ໃນຂະນະທີ່ມີຜູ້ໄດ້ຮັບບາດເຈັບອີກ 22 ຄົນ. ອາຄານຫລາຍຫລັງທີ່ຢູ່ໃນບໍລິເວນໃກ້ຄຽງກໍໄດ້ຮັບຄວາມເສຍຫາຍຈາກແຮງລະເບີດ ເຊິ່ງມີຄວາມຮຸນແຮງຫລາຍ. ປັດຈຸບັນເຈົ້າໜ້າທີ່ກຳລັງເຂົ້າກວດສອບຈຸດເກີດລະເບີດ. ພາບຖ່າຍໃນບໍລິເວນເກີດເຫດສະແດງໃຫ້ເຫັນວ່າ: ແກ້ວແວ່ນຂອງທະນາຄານແຕກເສຍຫາຍ ຂະນະທີ່ລົດທີ່ຈອດຢູ່ກໍໄດ້ຮັບຄວາມເສຍຫາຍເຊັ່ນກັນ. ຈົນເຖິງປັດຈຸບັນນີ້ຍັງບໍ່ມີຜູ້ໃດອອກມາອ້າງວ່າເປັນຜູ້ກໍ່ເຫດໃນຄັ້ງນີ້, ແຕ່ລັດສານເປັນລັດທີ່ມີຫລາຍຊົນຊາດອາໄສຢູ່ ແຕ່ການໂຈມຕີໃນເຂດເມືອງນັ້ນເກີດຂຶ້ນໜ້ອຍທີ່ສຸດ.
ໂຄສົກລັດຖະບານມຽນມາຖະແຫລງຜ່ານເຟສບຸກວ່າ: ຍິງຜູ້ບໍລິສຸດ 2 ຄົນຕ້ອງມາເສຍຊີວິດ ແລະ ພົນລະເຮືອນອີກ 22 ຄົນ ບາດເຈັບ ເພາະເຫດລະເບີດ. ຂະນະທີ່ທະນາຄານໂຍມາອອກຖະແຫລງການສະແດງຄວາມເສຍໃຈຕໍ່ການສູນເສຍທີ່ເກີດຂຶ້ນ. ສ່ວນຕຳຫລວດໃນນະຄອນຫລວງເນປີດໍ ກ່າວຢືນຢັນວ່າ: ມີການເສຍຊີວິດແທ້ ແລະ ຜູ້ບາດເຈັບໄດ້ຮັບການຊ່ວຍເຫລືອສົ່ງໂຮງໝໍແລ້ວ.
