ຫລາຍທ້ອງຖິ່ນໄດ້ຮັບຄວາມເສຍຫາຍຈາກພາຍຸລະດູຮ້ອນ
ແຫລ່ງຂ່າວ ຂປລ ລາຍງານວ່າ: ປັດຈຸບັນ, ຄະນະນຳຢູ່ແຕ່ລະທ້ອງຖິ່ນພວມຮີບຮ້ອນລົງສຳຫລວດກວດກາ ແລະ ເກັບກຳຂໍ້ມູນຄວາມເສຍຫາຍຈາກຜົນກະທົບຂອງພາຍຸລະດູຮ້ອນເມື່ອວັນທີ 21-22 ກຸມພານີ້, ເຊິ່ງເຮັດໃຫ້ເກີດມີຝົນຕົກລົມແຮງ ແລະ ໝາກເຫັບຕົກຢູ່ຫລາຍທ້ອງຖິ່ນທາງພາກເໜືອຂອງແຂວງຫລວງພະບາງ, ຊຽງຂວາງ, ແຂວງວຽງຈັນ ແລະ ໄຊຍະບູລີ ເພື່ອນຳສະເໜີຂໍການຊ່ວຍເຫລືອບັນເທົາທຸກໃນເບື້ອງຕົ້ນ. ສະເພາະເມືອງວຽງຄຳ ແຂວງຫລວງພະບາງ ໄດ້ເກີດມີຝົນຕົກ ແລະ ໝາກເຫັບຕົກຢ່າງໜັກເຮັດໃຫ້ 17 ບ້ານໄດ້ຮັບຜົນກະທົບ. ໃນນັ້ນມີເຮືອນ, ໂຮງຮຽນ ແລະ ຮົ້ວສວນເສຍຫາຍຢ່າງໜັກ ແລະ ມີຜູ້ໄດ້ຮັບບາດເຈັບ 1 ຄົນ. ສ່ວນເມືອງງອຍເຮັດໃຫ້ບາງພື້ນທີ່ຂອງບ້ານໜອງຂຽວໄດ້ຮັບຜົນກະທົບຢ່າງຮ້າຍແຮງ ເຊັ່ນ: ຕົ້ນໄມ້ໃຫ້ໝາກ, ພືດຜັກຕ່າງໆຂອງປະຊາຊົນໄດ້ຮັບເສຍຫາຍຢ່າງຫລວງຫລາຍ. ນອກຈາກນີ້ຍັງມີປະຊາຊົນຈຳນວນໜຶ່ງຢູ່ເທດສະບານເມືອງນ້ຳບາກ ກໍໄດ້ຮັບຜົນກະທົບຈາກສະພາບການດັ່ງກ່າວເປັນຄັ້ງທຳອິດໃນຮອບຫລາຍສິບປີ, ປັດຈຸບັນຄອບ ຄົວທີ່ຖືກຜົນກະທົບ ແມ່ນພົບຄວາມຫຍຸ້ງຍາກຫລາຍດ້ານ ແລະ ຕ້ອງການຊ່ວຍເຫລືອ.
ສ່ວນບ້ານປາກຍັນ ເມືອງແມດ ແຂວງວຽງຈັນ ມີປະຊາຊົນຈຳນວນ 25 ຄອບຄົວໄດ້ຮັບຜົນກະທົບເຮັດໃຫ້ເຮືອນຊານເປ່ເພ, ພາຍຫລັງເກີດເຫດທາງຄະນະນຳເມືອງໄດ້ລົງເກັບກຳຂໍ້ມູນ ແລະ ຈັດສັນສູນອົບພະຍົບ ໃຫ້ຜູ້ປະສົບໄພໄດ້ອາໄສຊົ່ວຄາວ ແລະ ນຳສະເໜີຂັ້ນເທິງ ເພື່ອໃຫ້ການຊ່ວຍເຫລືອບັນເທົາທຸກໃນເບື້ອງຕົ້ນ.
ໃນຂະນະທີ່ເຫດການຟ້າຜ່າງົວຂອງທ້າວ ຊຽງທັດ ແສນພັນ ປະຊາຊົນບ້ານນາຫີນ ເມືອງແກ່ນທ້າວ ແຂວງໄຊຍະບູລີ ຕາຍ 27 ໂຕ, ເຊິ່ງເປັນງົວໃຫຍ່ 19 ໂຕ ແລະ ງົວນ້ອຍ 8 ໂຕ ລວມມູນ ຄ່າເສຍຫາຍ 100 ກວ່າລ້ານກີບ, ທາງການນຳເມືອງ ໄດ້ສົບທົບອໍານາດການປົກຄອງບ້ານລົງ ກວດກາຕົວຈິງ ພ້ອມທັງປະເມີນມູນຄ່າເສຍຫາຍ ແລະ ນຳໄປລາຍງານຕໍ່ແຂວງ ເພື່ອຊອກຫາທາງຊ່ວຍເຫລືອສຳລັບປະຊາຊົນ 2 ບ້ານ ຄືຶ: ບ້ານຜາຫວາຍ ແລະ ບ້ານຄັງພະນຽນ ເມືອງໜອງແຮດ ແຂວງຊຽງຂວາງກໍໄດ້ຮັບຜົນກະທົບ ຈາກພາຍຸລະດູຮ້ອນຄັ້ງນີ້, ເຊິ່ງເຮັດໃຫ້ຫລັງຄາເຮືອນເປເພກະເບື້ອງແຕກ ແລະ ສັງກະສີຊອດ 60 ກວ່າຫລັງປະເມີນຄວາມເສຍຫາຍປະມານ 30 ລ້ານກວ່າກີບ.
