ເຜີຍແຜ່ປື້ມຄູ່ມືແຫ່ງຊາດ ການບໍລິການທີ່ເປັນມິດກັບເຍົາວະຊົນ ແລະ ໄວໜຸ່ມ

ໃນວັນທີ 26 ກຸມພານີ້, ກົມປິ່ນປົວ ແລະ ຟື້ນຟູໜ້າທີການ ກະຊວງສາທາລະນະສຸກ, ໄດ້ເຜີຍແຜ່ປື້ມຄູ່ມືແຫ່ງຊາດ ການບໍລິການທີ່ເປັນມິດກັບເຍົາວະຊົນ ແລະ ໄວໜຸ່ມ, ຊຶ່ງໄດ້ຈັດຂຶ້ນພ້ອມກັບກອງປະຊຸມທົບທວນຄືນການຈັດຕັ້ງປະຕິບັດວຽກງານສຸຂະພາບຈະເລີນພັນ, ຂຶ້ນທີ່ນະຄອນຫຼວງວຍງຈັນ, ໂດຍທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ແລະ ທ່ານນາງ ເຟຼດເດີຣີກາ ເມເຢີ ເຂົ້າຮ່ວມ.

ປື້ມຄູ່ມືແຫ່ງຊາດ ການບໍລິການທີ່ເປັນມິດກັບເຍົາວະຊົນ ແລະ ໄວໜຸ່ມ (NAYFS) ແມ່ນໄດ້ພັດທະນາມາຈາກປື້ມຄູ່ມືສຸຂະພາບຂອງໄວໜຸ່ມ ສໍາລັບຜູ້ໃຫ້ບໍລິການດ້ານສຸຂະພາບ ຂອງອົງການອະນາໄມໂລກ (WHO) ແລະ ປື້ມຄູ່ມືດັ່ງກ່າວ ໄດ້ຖືກປັບປຸງໃຫ້ເຂົ້າກັບສະພາບແວດລ້ອມ ແລະ ວັດທະນະທໍາ ໂດຍກະຊວງສາທາລະນະສຸກ ຈາກການສະໜັບສະໜູນຂອງອົງການສະຫະປະຊາຊາດ ກອງທຶນສໍາລັບປະຊາກອນ (UNFPA) ແລະ ບັນດາຄູ່ຮ່ວມພັດທະນາ.

ປື້ມຄູ່ມືດັ່ງກ່າວ ເປັນຄູ່ມືຝຶກອົບຮົມໃຫ້ແກ່ຜູ້ໃຫ້ບໍລິການ ລວມທັງພະດຸງຄັນ, ພະຍາບານ, ພະນັກງານຄລີນິກ ແລະ ໝໍ ຢູ່ທຸກສະຖານທີ່ ໃຫ້ບໍລິການສຸຂະພາບ, ເພື່ອສ້າງທັກສະຄວາມສາມາດຂອງຜູ້ໃຫ້ບໍລິການ, ສາມາດຕອບສະໜອງຄວາມຕ້ອງການສະເພາະໄວໜຸ່ມໄດ້ຢ່າງມີປະສິດທິຜົນ ແລະ ມີຄວາມລະອຽດອ່ອນ, ທັງສາມາດຊ່ວຍເຫຼືອ ແລະ ໃຫ້ຂໍ້ມູນທີ່ເຮັດໃຫ້ໄວໜຸ່ມແກ້ໄຂບັນຫາໄດ້.