ລົດໂດຍສານຜົ້ງສາລີ-ວຽງຈັນຕົກເຫວເລິກຢູ່ເສັ້ນທາງເມືອງນານ-ກາສີ ມີຜູ້ເສຍຊີວິດ 7 ແລະ ບາດເຈັບ 20 ຄົນ ຍ້ອນເບກແຕກ

ກົມຕຳຫລວດຈະລາຈອນ ໃຫ້ຮູ້ວ່າ: ໃນຄ່ຳຄືນວັນທີ 25 ກຸມພານີ້, ໄດ້ເກີດອຸປະຕິເຫດລົດໂດຍສານຜົ້ງສາລີ-ວຽງຈັນ ໝາຍເລກທະບຽນ 1919 ປິ້ນຕົກລົງພູເຂດເສັ້ນທາງເມືອງນານ-ກາສີ, ຢູ່ບໍລິເວນບ້ານທົ່ງເຫມືອດເມືອງກາສີ ແຂວງວຽງຈັນ, ສົ່ງຜົນເຮັດໃຫ້ມີຜູ້ເສຍຊີວິດຄາທີ່ 7 ຄົນ (ຍິງ 2 ຄົນ), ພ້ອມມີຜູ້ໄດ້ຮັບບາດເຈັບ 20 ກວ່າຄົນ.
ຈາກການສືບສວນ-ສອບສວນເບື້ອງຕົ້ນຂອງເຈົ້າໜ້າທີ່ຮູ້ສາເຫດຂອງການເກີດອຸປະຕິເຫດແມ່ນຍ້ອນເບກແຕກ, ເຮັດໃຫ້ຜູ້ຂັບຂີ່ຊຶ່ທ້າວ ກ້າງ ອາຍຸ 35 ປີ ຢູ່ບ້ານໜອງແຕ່ງ ເມືອງສີໂຄດຕະບອງນະຄອນຫລວງວຽງຈັນ ບໍ່ສາມາດຄວບຄຸມລົດໄດ້ເພາະເປັນເສັ້ນທາງຄ້ອຍຊັນ, ຈຶ່ງເຮັດໃຫ້ລົດເສຍຫລັກປີ້ນຕົກລົງເຫວເລິກປະມານ 50-60 ແມັດຢ່າວຮຸນແຮງ, ເຮັດໃຫ້ມີຜູ້ເສຍຊີວິດ ແລະ ບາດເຈັບເປັນຈຳນວນຫລາຍ.
ເຈົ້າໜ້າທີ່ຍັງໃຫ້ຮູ້ວ່າ: ໃນວັນທີ 24 ກຸມພານີ້, ຢູ່ເຂດບ້ານໃໝ່ເມືອງຄູນ ແຂວງຊຽງຂວາງ, ໄດ້ເກີດອຸປະຕິເຫດລົດຕູ້ໂດຍສານຕຳກັບລົດຈັກເສຍຫລັກ ພິກປິ້ນລົງແຄມທາງ, ເຮັດໃຫ້ຜູ້ໂດຍສານທີ່ຂີ່ມາໃນລົດຄັນດັ່ງກ່າວເສຍຊີວິດຄາທີ່ 3 ຄົນ, ສາເຫດແມ່ນຍ້ອນຂັບຂີ່ລົດໄວ.