ໜຶ່ງບົດຮຽນດີໆຈາກຊ່າງໄມ້

ໜຶ່ງບົດຮຽນດີໆຈາກຊ່າງໄມ້ - 042702 2018 - ໜຶ່ງບົດຮຽນດີໆຈາກຊ່າງໄມ້
ໜຶ່ງບົດຮຽນດີໆຈາກຊ່າງໄມ້ - kitchen vibe - ໜຶ່ງບົດຮຽນດີໆຈາກຊ່າງໄມ້

ທ່ານຊ່າງໄມ້ອາຍຸສູງທ່ານໜຶ່ງຢາກຈະກະສຽນໂຕເອງ ແລະ ໃຊ້ຊີວິດທີ່ຫລູຫລາກັບເມຍ ຈຶ່ງບອກຄວາມຕ້ອງການດັ່ງກ່າວກັບນາຍຈ້າງທີ່ລາວເຮັດວຽກໃຫ້ມາທັງຊີວິດ, ນາຍຈ້າງຈົ່ມວ່າເສຍດາຍທີ່ຈະຕ້ອງເສຍຊ່າງສີມືດີໄປ ຫວັງຈະໃຫ້ລາວເຮັດວຽກຕໍ່, ແຕ່ຊ່າງໄມ້ກໍຍັງມີຢືນຢັນການຂໍກະສຽນໂຕເອງຄືເກົ່າ ຈຶ່ງໄດ້ຂໍຮ້ອງໃຫ້ຊ່າງຄົນນີ້ຊ່ວຍສ້າງເຮືອນໃຫ້ອີກ 1 ຫລັງ.

ນາຍຈ້າງຈຶ່ງເວົ້າວ່າ : ເອົາຈັ່ງຊີ້ ຂ້ອຍມີດິນວ່າງຢູ່ຕິດທະເລສາບຢູ່ຕອນໜຶ່ງ ທິວທັດງົດງາມຫລາຍ, ແຕ່ຂາດເຮືອນພັກຕາກ ອາກາດ, ຂ້ອຍຢາກໃຫ້ເຈົ້າສ້າງເຮືອນຫລັງສຸດທ້າຍ ໂດຍທີ່ເຈົ້າຕ້ອງໃຊ້ວັດສະດຸໄມ້ທີ່ດີທີ່ສຸດ ແລະ  ໃຊ້ສີຝືທີ່ປານີດທີ່ສຸດໃນການສ້າງມັນ. ເມື່ອໄດ້ຍິນແນວນັ້ນ ຊ່າງໄມ້ກໍຝືນໃຈຕອບຕົກລົງ.

ໜຶ່ງບົດຮຽນດີໆຈາກຊ່າງໄມ້ - Visit Laos Visit SALANA BOUTIQUE HOTEL - ໜຶ່ງບົດຮຽນດີໆຈາກຊ່າງໄມ້

ຈາກນັ້ນ ຊ່າງໄມ້ກໍລົງມືສ້າງເຮືອນໄມ້ຫລັງສຸດທ້າຍຂອງຕົນເອງ, ແຕ່ໃນໃຈກໍຄິດວ່າ ແນວໃດເຮົາກໍກະສຽນແລ້ວ ຖ້າເຮັດອອກມາບໍ່ດີ ນາຍຈ້າງໄລ່ອອກກໍບໍ່ມີຫຍັງເສຍຫາຍຢູ່ແລ້ວ ແລ້ວເປັນຫຍັງຈຶ່ງຕ້ອງຕັ້ງໃຈເຮັດມັນ. ດັ່ງນັ້ນ, ຊ່າງໄມ້ກໍບໍ່ໄດ້ຄັດເລືອກໄມ້ທີ່ແຂງແຮງມາສ້າງເຮືອນ, ແຕ່ເລືອກໄມ້ທຳມະດາ ເປັນໄມ້ຄຸນນະພາບຕໍ່າຈາກພູ ລາວບໍ່ໄດ້ເອົາໃຈໃສ່ວ່າເຮືອນຈະແຂງແຮງຫລືບໍ່ ພຽງແຕ່ວ່າສ້າງໃຫ້ແລ້ວໄວໆ ຈົນໃນທີ່ສຸດລາວກໍທາສີເພື່ອໃຫ້ພາຍນອກເບິ່ງງາມ ແລະ ປົກປິດຄວາມບໍ່ງາມໄວ້, ລາວຄິດໃນໃຈວ່າຂໍໃຫ້ທາງນອກງາມໄວ້ກ່ອນ ໂຄງສ້າງພາຍໃນຈະເປັນແນວໃດກໍຕາມ ນາຍຈ້າງກໍເບິ່ງບໍ່ອອກດອກ. ເມື່ອເຮືອນສ້າງແລ້ວກໍພົບວ່າມັນບໍ່ຄືກັບເຮືອນທີ່ເປັນສີມືຂອງຊ່າງຜູ້ນີ້ເລີຍແມ່ນແຕ່ໜ້ອຍດຽວ ເຮືອນທີ່ສ້າງມາກໍມີຕຳໜິ ບໍ່ລະອຽດ, ວັດຖຸດິບທີ່ໃຊ້ກໍດ້ອຍຄຸນນະພາບ ມັນເປັນການຈົບຊີວິດຊ່າງສີມືດີທີ່ບໍ່ງົດງາມເລີຍ.

ມື້ທີ່ວຽກສຳເລັດ ນາຍຈ້າງກໍມາດກວດເບິ່ງ ຜົນປະກົດວ່າເປັນທີ່ພໍໃຈຫລາຍ ນາຍຈ້າງເບິ່ງບໍ່ອອກວ່າຂາດຕົກບົກພ່ອງຫຍັງ ກ່ອນທີ່ນາຍຈ້າງຈະຕົບບ່າໄຫລ່ຊ່າງໄມ້ຄ່ອຍໆ ແລະ ຈົກກຸນແຈອອກມາພວງໜຶ່ງຍື່ນສົ່ງໃຫ້ຊ່າງໄມ້ ແລ້ວບອກວ່າ : “ຕອນນີ້ເຮືອນຫລັງນີ້ເປັນຂອງເຈົ້າແລ້ວ ຂ້ອຍຂອບໃຈເຈົ້າຫລາຍທີ່ເຈົ້າຢູ່ເຮັດວຽກກັບຂ້ອຍມາດົນຫລາຍປີ ນີ້ຖືເປັນຂອງຂວັນກະສຽນທີ່ຂ້ອຍຕັ້ງໃຈຈະມອບໃຫ້ເຈົ້າ”.

ເມື່ອຊ່າງໄມ້ໄດ້ຍິນແນວນັ້ນ ເຖິງກັບຕົກໃຈ ແລະ ອຸທານກັບໂຕເອງວ່າ : ໜ້າລະອາຍແທ້ໆ ຖ້າລາວຮູ້ຈັກໜ້ອຍວ່າກຳລັງສ້າງເຮືອນຂອງໂຕເອງຢູ່ ລາວກໍຄົງຕັ້ງໃຈສ້າງໃຫ້ດີກ່ວານີ້.

ທ່ານໄດ້ຮຽນຮູ້ຫຍັງຈາກນິທານເລື່ອງນີ້ ?  ຄືກັນກັບພວກເຮົາທີ່ກຳລັງສ້າງຊີວິດຂອງໂຕເອງດ້ວຍການສັ່ງສົມສິ່ງຕ່າງໆມື້ ລະເລັກລະໜ້ອຍ ແລະ ມີຫລາຍໆເທື່ອທີ່ເຮົາບໍ່ໄດ້ໃຊ້ຄວາມພະຍາ ຍາມຢ່າງທີ່ສຸດໃນການສັນສ້າງຊີວິດຂອງໂຕເອງ ແລະ ເມື່ອມື້ໜຶ່ງມາເຖິງ ເຮົາກໍຈະຄິດນຳວ່າເຮົາຕ້ອງໃຊ້ຊີວິດຢູ່ກັບທຸກສິ່ງທຸກຢ່າງທີ່ເຮົາເປັນຜູ້ສ້າງຂຶ້ນມາທັງໝົດ ແລະ ເມື່ອເຖິງມື້ນັ້ນ ເຮົາມັກຈະເວົ້າສະເໝີວ່າ ຖ້າເຮົາສາມາດຍ້ອນກັບໄປໄດ້ ເຮົາຈະເຮັດທຸກຢ່າງໃຫ້ດີຂຶ້ນ ເຊິ່ງເປັນສິ່ງທີ່ເປັນໄປບໍ່ໄດ້ແລ້ວ. ດັ່ງນັ້ນ, ຈົ່ງສ້າງເຮືອນດ້ວຍຄວາມສະຫລາດ ແລະ ຈົ່ງຈື່ໄວ້ວ່າ : ຈົ່ງເຮັດວຽກຄືກັບວ່າເຮົາບໍ່ຕ້ອງການເງິນຄຳ,  ຈົ່ງຮັກຄືກັບວ່າເຮົາບໍ່ເຄີຍເຈັບ, ຈົ່ງເຕັ້ນລຳວົງຢ່າງມ່ວນຊື່ນຄືກັບວ່າບໍ່ມີໃຜແນວເບິ່ງເຮົາຢູ່.

ໜຶ່ງບົດຮຽນດີໆຈາກຊ່າງໄມ້ - 4 - ໜຶ່ງບົດຮຽນດີໆຈາກຊ່າງໄມ້
ໜຶ່ງບົດຮຽນດີໆຈາກຊ່າງໄມ້ - 5 - ໜຶ່ງບົດຮຽນດີໆຈາກຊ່າງໄມ້
ໜຶ່ງບົດຮຽນດີໆຈາກຊ່າງໄມ້ - 3 - ໜຶ່ງບົດຮຽນດີໆຈາກຊ່າງໄມ້