ສະຫລອງວັນສ້າງຕັ້ງກອງສິລະປະກອນກອງທັບຄົບຮອບ 50 ປີ

ສະຫລອງວັນສ້າງຕັ້ງກອງສິລະປະກອນກອງທັບຄົບຮອບ 50 ປີ - celebration arrmy artist day - ສະຫລອງວັນສ້າງຕັ້ງກອງສິລະປະກອນກອງທັບຄົບຮອບ 50 ປີ
ສະຫລອງວັນສ້າງຕັ້ງກອງສິລະປະກອນກອງທັບຄົບຮອບ 50 ປີ - Untitled design - ສະຫລອງວັນສ້າງຕັ້ງກອງສິລະປະກອນກອງທັບຄົບຮອບ 50 ປີ

ສະຫລອງວັນສ້າງຕັ້ງ ກອງສິລະປະກອນກອງທັບ ຄົບຮອບ 50 ປີ (20/01/1968-20/01/2018) ເພື່ອຫວນຄືນເຖິງມູນເຊື້ອ, ຜົນງານ ແລະ ໄຊຊະນະອັນໃຫຍ່ຫລວງ ທີ່ກອງສິລະປະກອນກອງທັບສ້າງມາໄດ້ ໃນໄລະຍະ 50 ທີ່ຜ່ານມາ, ພ້ອມຍ້ອງຍໍສັນລະເສີນຜົນງານ ໃຫ້ແກ່ກົມກອງລວມໝູ່.

ໃນໂອກາດນີ້, ພັນເອກ ພິມພາ ບຸນນະພາ ຫົວໜ້າການທະຫານກອງສິລະປະກອນກອງທັບ ໄດ້ກ່າວວ່າ: ກ່ອນໜ້ານີ້ 50​ ປີ ເພື່ອຕອບສະໜອງກັບຄວາມຮຽກຮ້ອງຕ້ອງການ ທາງການເມືອງຂອງໄລຍະການປະຕິວັດ ຕໍ່ສູ່ປົດປ່ອຍຊາດທີ່ກຳລັງດຳເນີນຢ່າງດຸເດືອດຂ້ຽວຂາດ ກໍຄື ການປັບປຸງກໍ່ສ້າງກອງທັບເຮົາໃຫ້ເຕີບໃຫຍ່ເຂັ້ມແຂງ ໂດຍສະເພາະແມ່ນວຽກງານ ສິລະປະວັດທະນະທຳໃນກອງທັບ, ກອງສິລະປະ ກອນກອງທັບປົດປ່ອຍປະຊາຊົນລາວ ໄດ້ຮັບການສ້າງຕັ້ງຂຶ້ນຢ່າງເປັນທາງການໃນວັນທີ 20 ມັງກອນ 1968 ຢູ່ຖານທີ່ໝັ້ນ ເມືອງວຽງໄຊ, ແຂວງຫົວພັນ ໂດຍສືບທອດຈາກກອງສິລະປະກອນກຳລັງປະກອບອາວຸດປະເທດລາວໃນເມື່ອກ່ອນ. ມາໃນວັນທີ 16 ກໍລະກົດ 1982, ກອງສິລະປະກອນກອງທັບປົດປ່ອຍປະຊາຊົນລາວ ກໍໄດ້ປ່ຽນຊື່ມາເປັນ ກອງສິລະປະກອນກອງທັບປະຊາຊົນລາວ ຈົນຮອດປັດຈຸບັນ.

ໃນໄລຍະປົກປັກຮັກສາ ແລະ ສ້າງສາພັດທະນາປະເທດຊາດ, ກອງສິລະປະກອນກອງທັບ ກໍໄດ້ຕັ້ງໜ້າປະຕິບັດສະແດງຮັບໃຊ້ໜ້າທີ່ການເມືອງຕໍ່ກອງທັບ ແລະ ປະຊາຊົນບັນດາເຜົ່າໃນຂອບເຂດທົ່ວປະ ເທດ ດ້ວຍຄວາມຫ້າວຫັນ ແລະ ມີຄວາມຮັບຜິດຊອບສູງ ອັນທີ່ພົ້ນເດັ່ນແມ່ນ ເຂົ້າຮ່ວມການສະແດງຮັບໃຊ້ກອງປະຊຸມສຸດຍອດອາຊຽນ ຄັ້ງທີ 10, ຊີເກມ ຄັ້ງທີ 25, ງານສະເຫລີມສະຫລອງນະຄອນຫລວງວຽງຈັນ ຄົບຮອບ 450 ປີ, ກອງປະຊຸມອາເຊັບ 7, ອາເຊັມ 9, ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 60 ປີ ແລະ ວັນສ້າງຕັ້ງ ສປປ ລາວ ຄົບຮອບ 40 ປີ. ມາຮອດປັດຈຸບັນ ພະນັກງານວິຊາການ ແລະ ນັກສະແດງກອງສິລະປະກອນກອງທັບປະຊາຊົນລາວ ໄດ້ເຕີບໃຫຍ່ຂະຫຍາຍຕົວທາງດ້ານຈຳນວນພົນ ແລະ ຄຸນນະພາບ.

ຜົນງານ ແລະ ໄຊຊະນະອັນໃຫຍ່ຫລວງ ທີ່ກອງສິລະປະກອນກອງທັບສ້າງມາໄດ້ໃນ 50 ປີ ກໍຍ້ອນແນວທາງນະໂຍບາຍອັນຖືກຕ້ອງ ຂອງພັກປະຊາຊົນປະຕິວັດລາວ, ຍ້ອນການຊີ້ນຳ-ນຳພາຢ່າງໃກ້ ຊິດຂອງຄະນະພັກກະຊວງປ້ອງກັນປະເທດ, ກົມໃຫຍ່ການເມືອງກອງທັບ, ຄວາມສາມັກຄີ ເປັນເອກະພາບ, ຄວາມຕັດສິນໃຈບຸກບືນ, ນ້ຳໃຈເສຍສະຫລະ ແລະ ຫົວຄິດປະດິດສ້າງຂອງຄະນະພັກ-ຄະນະບັນ ຊາແຕ່ລະຂັ້ນ ຕະຫລອດຮອດພະນັກງານ, ລວມທັງການອູ້ມຊູສະໜັບສະໜູນຢ່າງຈິງໃຈຂອງປະຊາຊົນບັນດາເຜົ່າໃນທົ່ວປະເທດ.

ສະຫລອງວັນສ້າງຕັ້ງກອງສິລະປະກອນກອງທັບຄົບຮອບ 50 ປີ - Wave100S AD to Website 2020 0 - ສະຫລອງວັນສ້າງຕັ້ງກອງສິລະປະກອນກອງທັບຄົບຮອບ 50 ປີ

ເຖິງຢ່າງໃດກໍຕາມ, ຜົນງານ ແລະ ໄຊຊະນະ ທີ່ກອງສິລະປະກອນກອງທັບຍາດມາໄດ້ນັ້ນ ເມື່ອທຽບໃສ່ຄວາມຮຽກຮ້ອງຕ້ອງການ ຂອງໜ້າທີ່ການເມືອງໃນໄລຍະໃໝ່ຂອງການປະຕິວັດ ແລະ ການປັບ ປຸງກໍ່ສ້າງກອງທັບເຮົາ ເຫັນວ່າຍັງຂະຫຍາຍຕົວຊ້າ ແລະ ຍັງມີຫລາຍດ້ານ ທີ່ຈະຕ້ອງສຸມໃສ່ປັບປຸງແກ້ໄຂ. ສະນັ້ນ, ທ່ານ ພັນເອກ ພິມພາ ບຸນນະພາ ຈຶ່ງໄດ້ຮຽກຮ້ອງມາຍັງພະນັກງານ, ສະມາຊິກພັກ, ນັກ ຮົບ, ນັກສະແດງທຸກຄົນໃນທົ່ວກົມກອງ ຈົ່ງໄດ້ພ້ອມກັນເສີມຂະຫຍາຍມູນເຊື້ອອັນດີງາມ ໃນໄລຍະຜ່ານມາ, ສືບຕໍ່ຜັນຂະຫຍາຍ, ປັບປຸງກອງສິລະປະກອນກອງທັບເຮົາ ໃຫ້ມີອັນຫັນປ່ຽນຢ່າງຕັ້ງໜ້າ ແລະ ເຕີບໃຫຍ່ເຂັ້ມແຂງໃນທຸກດ້ານ ປະກອບສ່ວນຢ່າງຕັ້ງໜ້າເຂົ້າໃນການກໍ່ສ້າງກອງທັບເຮົາ ໃຫ້ເປັນກອງທັບປະ ຕິວັດທີ່ມີແບບແຜນທັນສະໄໝ.

ໃນໂອກາດດຽວກັນ, ທ່ານ ພົນຕີ ສອນທອງ ພົມລາວົງ ຮອງຫົວໜ້າກົມໃຫຍ່ການເມືອງກອງທັບ ກໍໄດ້ຕາງໜ້າໃຫ້ຄະນະນຳກະຊວງປ້ອງກັນປະເທດ ສະແດງຄວາມຍ້ອງຍໍສັນລະເສີນຢ່າງສຸດອົກສຸດໃຈ ມາຍັງຄະນະພັກ-ຄະນະບັນຊາ, ພະນັກງານ-ນັກຮົບໃນທົ່ວກອງສິລະປະກອນກອງທັບ ທີ່ໄດ້ພ້ອມກັນຕັ້ງໜ້າ ເຮັດສຳເລັດໜ້າທີ່ການເມືອງ ອັນມີກຽດສະຫງ່າຂອງຕົນ.

ສະຫລອງວັນສ້າງຕັ້ງກອງສິລະປະກອນກອງທັບຄົບຮອບ 50 ປີ - WhatsApp Image 2020 05 27 at 5 - ສະຫລອງວັນສ້າງຕັ້ງກອງສິລະປະກອນກອງທັບຄົບຮອບ 50 ປີ
ສະຫລອງວັນສ້າງຕັ້ງກອງສິລະປະກອນກອງທັບຄົບຮອບ 50 ປີ - WhatsApp Image 2020 05 27 at 5 - ສະຫລອງວັນສ້າງຕັ້ງກອງສິລະປະກອນກອງທັບຄົບຮອບ 50 ປີ
error: Alert: ເນື້ອຫາຂ່າວມີລິຂະສິດ !!