ທ່ານ ທຣຳ ຂູ່ຂຶ້ນພາສີລົດຍົນ ນຳເຂົ້າຈາກເອີຣົບ
ປະທານາທິບໍດີ ໂດນັນ ທຣຳ ກ່າວວ່າອາເມລິກາຈະເພີ່ມການຕັ້ງກຳແພງພາສີລົດຍົນນຳເຂົ້າຈາກເອີຣົບ ຖ້າອີກຝ່າຍຂຶ້ນພາສີອາກອນສິນຄ້ານຳເຂົ້າຈາກອາເມລິກາ.
ສຳນັກຂ່າວຕ່າງປະເທດລາຍງານຈາກນະຄອນຫລວງວໍຊິງຕັນ ປະເທດສະຫະລັດອາເມລິກາ ໃນວັນທີ 3 ມີນາວ່າ: ປະທານາທິບໍດີ ໂດນັນ ທຣຳ ກ່າວວ່າ: ຖ້າ EU ຕ້ອງການຂຶ້ນພາສີ ແລະ ສ້າງກຳແພງການຄ້າກັບບໍລິສັດຂອງອາເມລິກາທີ່ເຮັດທຸລະກິດຢູ່ໃນເອີຣົບ, ທ່ານຈະຕອບໂຕ້ດ້ວຍການຂຶ້ນພາສີລົດຍົນເອີຣົບທຸກຍີ່ຫໍ້ ເຊິ່ງນຳເຂົ້າມາໃນອາເມລິກາຈົນຜູ້ຜະລິດໃນທ້ອງຖິ່ນບໍ່ສາມາດຈຳໜ່າຍສິນຄ້າຂອງຕົນເອງໄດ້.
If the E.U. wants to further increase their already massive tariffs and barriers on U.S. companies doing business there, we will simply apply a Tax on their Cars which freely pour into the U.S. They make it impossible for our cars (and more) to sell there. Big trade imbalance!
— Donald J. Trump (@realDonaldTrump) March 3, 2018
ປັດຈຸບັນກະຊວງການຄ້າຂອງອາເມລິກາກຳນົດອັດຕາພາສີລົດຍົນສ່ວນບຸກຄົນນຳເຂົ້າຈາກເອີຣົບໄວ້ທີ່ 2,5% ແລະ 25% ສຳລັບລົດຕູ້, ລົດກະບະ ແລະ ລົດບັນທຸກ. ຂະນະທີ່ຄະນະກຳມາທິການເອີຣົບ (EC) ກຳນົດອັດຕາພາສີລົດຍົນທຸກປະເພດທີ່ນຳເຂົ້າຈາກອາເມລິກາໄວ້ທີ່ 10%. ສ່ວນບໍລິສັດໂຟກສວາເກນ ຜູ້ຜະລິດລົດລາຍໃຫຍ່ທີ່ສຸດຂອງເອີຣົບຈາກເຢຍລະມັນ ມີໂຮງງານຂະໜາດໃຫຍ່ຕັ້ງຢູ່ໃນລັດເຊົາແຄໂຣໄລນາ ແລະ ມີພະນັກງານປະຕິບັດໜ້າທີ່ຫລາຍກວ່າ 9.000 ຄົນ. ນອກຈາກນີ້ ອາເມລິກາຍັງຖືເປັນຕະຫລາດໃຫຍ່ຂອງລົດຍົນຈາກເຢຍລະມັນ ທັງ BMW ແລະ ເມີເຊເດສ-ເບນ ດ້ວຍອັດຕາສ່ວນ 15% ຂອງສິນຄ້າທັງໝົດທີ່ບໍລິສັດທັງສອງແຫ່ງສົ່ງອອກໄປຈຳໜ່າຍທົ່ວໂລກ.
ທ່າທີດັ່ງກ່າວຂອງທ່ານ ທຣຳ ມີຂຶ້ນຫລັງທ່ານ ມອງ ໂຄດ ຍຸງເກີ ປະທານ EC ກ່າວໃນວັນທີ 2 ມີນາວ່າ: ເອີຣົບກຳລັງພິຈາລະນາມາດຕະການຕອບໂຕ້ກໍລະນີທີ່ອາເມລິກາກຽມຂຶ້ນພາສີສິນຄ້ານຳເຂົ້າປະເພດເຫລັກ ແລະ ອາລູມີນຽມເປັນ 25% ແລະ 10% ຕາມລຳດັບ ໂດຍແນວທາງຂອງ EC ລວມທັງການຂຶ້ນພາສີສິນຄ້າຂອງອາເມລິກາຫລາຍລາຍການ.
