ລາວ-ຈີນ ຫາລືຕ້ານການລັກລອບປູກຝິ່ນຕາມຊາຍແດນ
ເມື່ອທ້າຍອາທິດຜ່ານມານີ້, ຫ້ອງການກວດກາ ແລະ ຄວບຄຸມຢາເສບຕິດລາວ-ຈີນ, ໄດ້ຮ່ວມກັນປຶກສາຫາລືຕ້ານການລັກລອບປູກຝິ່ນຕາມຊາຍແດນຂຶ້ນທີ່ເມືອງຍອດອູແຂວງຜົ້ງສາລີ, ຝ່າຍລາວນໍາໂດຍທ່ານພັນເອກ ອ່ອນພິວ ໂຄ້ງວຽງທອງ ຫົວໜ້າຫ້ອງການກວດກາ ແລະ ຄວບຄຸມຢາເສບຕິດ ແລະ ຝ່າຍຈີນນໍາໂດຍທ່ານພົນໂທ ນິງທຽນສີ ຮອງເລຂາທິການຄະນະກຳມະການກວດກາ ແລະ ຄວບຄຸມຢາເສບຕິດແຫ່ງຊາດຈີນ, ໂດຍສອງຝ່າຍໄດ້ລາຍງານສະພາບການຮ່ວມມືໃນວຽກງານຮັກສາຄວາມສະຫງົບ, ໂດຍສະເພາະການສະກັດກັ້ນ ແລະ ຕ້ານຢາເສບຕິດ ແລະ ການກະທຳຜິດລະບຽບກົດໝາຍຕ່າງໆ ເປັນຕົ້ນ: ການລັກລອບປູກຝິ່ນຂອງປະຊາຊົນຢູ່ລຽບຕາມຊາຍແດນລະຫວ່າງເຂດເມືອງຍອດອູແຂວງຜົ້ງສາລີ ແລະ ເມືອງຈັງເຊິນແຂວງຢູນນານ ສປຈີນ, ເຊິ່ງເຫັນວ່າຍັງມີກຸ່ມຄົນບໍ່ດີຈຳນວນໜຶ່ງໄດ້ພະຍາຍາມລັກລອບປູກຝິ່ນຢູ່ລຽບຕາມຊາຍແດນ, ໂດຍສອງຝ່າຍຈະເພີ່ມທະວີການຮ່ວມມືໃນການແກ້ບັນຫາດັ່ງກ່າວຕາມລະບຽບກົດໝາຍໃຫ້ມີປະສິດທິພາບ, ພ້ອມທັງຍົກສູງຄວາມຮັບຜິດຊອບໃຫ້ໜ່ວຍງານກ່ຽວຂ້ອງ ແລະ ອຳນາດການປົກຄອງທ້ອງຖິ່ນເອົາໃຈໃສ່ຕິດຕາມກວດກາສະກັດກັ້ນ ແລະ ຕ້ານການປູກຝິ່ນ, ໄປຄຽງຄູ່ການຊຸກຍູ້ສົ່ງເສີມໃຫ້ປະຊາຊົນໃນເຂດເປົ້າໝາຍຫັນມາປູກຝັງ-ລ້ຽງສັດຜະລິດເປັນສິນຄ້າ ເພື່ອສ້າງລາຍຮັບໃຫ້ຄອບຄົວດີຂຶ້ນເທື່ອລະກ້າວ ແລະ ພ້ອມກັນປະກອບສ່ວນປົກປັກຮັກສາຊາຍແດນໃຫ້ມີຄວາມສະຫງົບ ແລະ ເປັນລະບຽບຮຽບຮ້ອຍດີ.
