ຍີ່ປຸ່ນຊ່ວຍລາວຫລາຍກວ່າ 2 ແສນໂດລາໃນໂຄງການຄ້ຳປະກັນສະບຽງອາຫານ
ລັດຖະບານຍີ່ປຸ່ນໄດ້ໃຫ້ການຊ່ວຍເຫລືອລ້າແກ່ລາວຕື່ມອີກຫລາຍກວ່າ 270.000 ໂດລາສະ ຫະລັດ ເພື່ອໂຄງການຄ້ຳປະກັນສະບຽງອາຫານ ຕິດພັນກັບການເຮັດກະສິກຳ ແລະ ບໍລິຫານຊັບພະຍາກອນທຳມະຊາດຢູ່ 10 ບ້ານໃນເຂດຊົນນະບົດແຂວງສະຫວັນນະເຂດ ເປັນໄລຍະ 3 ປີ.
ພິທີເຊັນສັນຍາດັ່ງກ່າວ ໄດ້ມີຂຶ້ນໃນວັນທີ 6 ມີນານີ້ ທີ່ສະຖານຍີ່ປຸ່ນ ປະຈຳ ສປປ ລາວ ລະຫວ່າງທ່ານ ທາເຄຊິ ຣິຄິຮາຣະ ເອກອັກຄະລັດຖະທູດຍີ່ປຸ່ນ ປະຈຳ ສປປ ລາວ ແລະ ທ່ານ ທາຄາໂທຊິ ຮາເຊເບະ ເລຂາທິການຂອງສູນອາສາສະໝັກສາກົນຍີ່ປຸ່ນ ເປັນອົງການຈັດຕັ້ງທີ່ບໍ່ຂຶ້ນກັບລັດຖະບານຍີ່ປຸ່ນ, ມີຜູ້ຕາງໜ້າຈາກກະຊວງກະສິກຳ ແລະ ປ່າໄມ້, ຜູ້ຕາງໜ້າກົມແຜນການ ແລະ ການການເງິນເຂົ້າຮ່ວມນຳດ້ວຍ.
ໂຄງການດັ່ງກ່າວຈະຊ່ວຍຍົກລະດັບຊີວິດການເປັນຢູ່ຂອງຊາວນາ ຜ່ານການຊ່ວຍເຫລືອ ການເຮັດກະສິກຳຢ່າງມີລະບົບໃນແຕ່ລະບ້ານ ແລະ ສ້າງຕັ້ງລະບົບການບໍລິຫານຊັບພະຍາກອນທຳມະຊາດຢ່າງຍືນຍົງ ໂດຍການສ້າງປ່າຊຸມຊົນ ແລະ ວັງສະຫງວນ. ນອກຈາກນີ້, ໂຄງການຍັງຈະຊ່ວຍກໍ່ສ້າງສູນບໍລິການຄວາມຮູ້ດ້ານກະສິກຳ ແລະ ໂຮງຮຽນສຳລັບຊາວນາ ໃນຂົງເຂດເປົ້າໝາຍ ເພື່ອໃຫ້ເປັນສະຖານທີ່ຝຶກອົບຮົມ ທາງດ້ານເຕັກນິກ ແລະ ແລກປ່ຽນຂໍ້ມູນຢ່າງສະໝ່ຳສະເໝີ.
ສູນອາສາສະໝັກສາກົນຍີ່ປຸ່ນ (JVC) ໄດ້ຮັບການສ້າງຕັ້ງຂຶ້ນໃນປີ 1980, ແລະ ໄດ້ມາເຮັດວຽກຢູ່ ສປປ ລາວ ນັບແຕ່ປີ 1989 ຊຶ່ງໄດ້ເຮັດວຽກກ່ຽວກັບກະສິກຳ ແລະ ການພັດທະນາຊົນນະບົດທີ່ແຂວງຄຳມ່ວນ ໃນປີ 1993 ແລະ ສະຫວັນນະເຂດ ປີ 2008 ກິດຈະກຳຕົ້ນຕໍແມ່ນ ການຮັກສາປ່າໄມ້ ແລະ ດ້ານກະສິກຳ.
