ເຈຟ ເບຊອສ ຜູ້ບໍລິຫານອາເມຊອນ ມະຫາເສດຖີອັນດັບ 1 ໂລກ

- Washington Post Jeff Bezos - ເຈຟ ເບຊອສ ຜູ້ບໍລິຫານອາເມຊອນ ມະຫາເສດຖີອັນດັບ 1 ໂລກ
- Untitled design - ເຈຟ ເບຊອສ ຜູ້ບໍລິຫານອາເມຊອນ ມະຫາເສດຖີອັນດັບ 1 ໂລກ

​ເຈ​ຟ ​ເບ​ຊອສ ຊາວ​ອາ​ເມ​ລິ​ກາ ຜູ້​ບໍລິຫານ ​ແລະ ຜູ້​ສ້າງຕັ້ງບໍລິສັດ​ຂາຍຍ່ອຍ​ອອນ​ລາຍ​ຍັກ​ໃຫຍ່ “ອາ​ເມ​ຊອນ” ຂຶ້ນ​ແທ່ນ​ມະຫາ​ເສດຖີ​ອັນ​ດັບ 1 ຂອງ​ໂລກ​ປະຈຳ​ປີ 2018 ​ເຂ່ຍ​ແຊ້ມ​ເກົ່າ ບິ​ລ ​ເກດສ໌ ຊາວ​ອາ​ເມ​ລິ​ກາ ຜູ້​ສ້າງຕັ້ງບໍລິສັດ​ໄມ​ໂຄຣຊອບ​ລົງ​ໄປ​ຢູ່​ອັນ​ດັບ 2 ຈາກ​ການ​ປະກາດ​ຜົນ​ການຈັດ​ອັນ​ດັບ​ມະຫາ​ເສດຖີ​ໂລກ​ປະຈຳ​ປີ ​ໂດຍ​ວາລະສານ​ຟອບ ​ເຜີຍ​ແຜ່​ໃນ​ວັນ​ທີ 6 ມີນາ.

ສຳນັກ​ຂ່າວ AFP ລາຍ​ງານ​ຈາກ​ນະຄອນຫລວງ​ປາຣີ ປະ​ເທດ​ຝຣັ່ງ ​ໃນ​ວັນ​ທີ 6 ມີນາ​ວ່າ: ຈາກ​ການ​ທີ່​ມູນ​ຄ່າ​ຫຸ້ນ​ຂອງ​ອາ​ເມ​ຊອນ​ສູງ​ຂຶ້ນ 59% ​ໃນ​ໄລຍະ 12 ​ເດືອນ​ຜ່ານ​ມາ ​ເຮັດ​ໃຫ້ຄວາມ​ຮັ່ງມີ​ຂອງ ​ເບ​ຊອສ ອາຍຸ 54 ປີ​ເພີ່ມ​ຂຶ້ນ​ເກືອບ 2 ​ເທົ່າ​ ​ແລະ ຫລ້າ​ສຸດ​ສິນ​ຊັບ​ສຸດທິ​ຕາມ​ຕີ​ລາຄາ​ມີ​ປະມານ 112.000 ລ້ານ​ໂດ​ລາ​ສະຫະລັດ ຫ່າງ ​ເກດ ອາຍຸ 62 ປີ ທີ່​ມີ​ຈຳນວນ​ສິນ​ຊັບ​ຫລ້າ​ສຸດ​ປະມານ 90.000 ລ້ານ​ໂດ​ລາ ຖື​ເປັນ​ຊ່ອງ​ຫວ່າງ​ທີ່​ຫ່າງ​ທີ່​ສຸດ​ເທົ່າ​ທີ່​ເຄີຍ​ມີ​ມາ ລະຫວ່າງ​ມະຫາ​ເສດຖີ​ອັນ​ດັບ 1 ​ແລະ 2 ຂອງ​ໂລກ.

ມະຫາ​ເສດຖີ​ອັນ​ດັບ 3 ຂອງ​ໂລກ​ໃນ​ປີ​ນີ້ ຍັງ​ຄົງ​ເປັນ​ນັກທຸລະກິດ​ລະດັບ​ຕຳນານ​ຊາວ​ອາ​ເມ​ລິ​ກາ ອາຍຸ 87 ປີ ວໍ​ເຣນ ບັຟ​ເຟດ ດ້ວຍ​ສິນ​ຊັບ 84.000 ລ້ານ​ໂດ​ລາ, ຕາມ​ມາ​ອັນ​ດັບ 4 ​ແບຣນາດ ອາຣ​ໂນ​ລ ຊາວ​ຝຣັ່ງ ອາຍຸ 69 ປີ ​ເຈົ້າຂອງ​ບໍລິສັດ ​ແອ​ລວີ​ເອັມ​ເອຊ 72.000 ລ້ານ​ໂດ​ລາ ​ເຊິ່ງຂຶ້ນຈາກ​ອັນ​ດັບ 11 ​ໃນ​ປີຜ່ານມາ ຈາກ​ຜົນ​ຂອງ​ຄ່າ​ເງິນ​ເອີ​ໂຣ​ແຂງ ​ເມື່ອ​ທຽບ​ໃສ່​ໂດ​ລາ​ສະຫະລັດ ​ແລະ ມາຣ໌ກ ຊັກ​ເຄີ​ເບິ​ຣກ ຊາວ​ອາ​ເມ​ລິ​ກາ ອາຍຸ 33 ປີ ​ເຈົ້າຂອງ​ບໍລິສັດ ​ເຟສບຸກ ຢູ່​ອັນ​ດັບ 5 ດ້ວຍ​ສິນ​ຊັບ 71.000 ລ້ານ​ໂດ​ລາ.

ສ່ວນ​ປະທານາທິບໍດີ ​ໂດ​ນັນ ທຣຳ ຜູ້ນຳ​ອາ​ເມ​ລິ​ກາ ອັນ​ດັບ​ຫລຸດ​ລົງ​ຈາກ 544 ​ໃນ​ປີຜ່ານມາ ລົງ​ມາ​ຢູ່​ອັນ​ດັບ 766 ​ໃນ​ປີ​ນີ້ ດ້ວຍ​ຈຳນວນ​ສິນ​ຊັບ​ສຸດທິ​ຕາມ​ຕີ​ລາຄາ 3.100 ລ້ານ​ໂດ​ລາ ໜ້ອຍ​ກວ່າ​ປີຜ່ານມາ 400 ລ້ານ​ໂດ​ລາ.

ປີ​ນີ້​ມີ​ຊາວ​ອາຊີ​ຕິດ​ອັນ​ດັບ 20 ທຳ​ອິດ 3 ຄົນ​ຄື ອັນ​ດັບ 17 ທ່ານ ມ່າ ຮົວ​ເຖິງ ຫລື ​ໂພ​ນີ ມ່າ ຊາວ​ຈີນ ອາຍຸ 46 ປີ ຜູ້​ບໍລິຫານ​ບໍລິສັດ​ອິນ​ເຕີ​ເນັດ​ຍັກ​ໃຫຍ່ ​ເທ​ນ​ເຊັນ ມີ​ສິນ​ຊັບ 45.300 ລ້ານ​ໂດ​ລາ ​ແລະ ທ່ານ​ຍັງ​ເປັນ​ມະຫາ​ເສດຖີ​ອັນ​ດັບ 1 ຂອງ​ທະວີບອາຊີ​ບ​ໃນ​ປີ​ຫລ້າ​ສຸດ. ອັນ​ດັບ 19 ທ່ານ ມູ​ເກ ອຳ​ບາ​ນີ ຊາວ​ອິນ​ເດຍ ອາຍຸ 60 ປີ ​ເຈົ້າຂອງ​ທຸລະ​ກິດ​ປິ​ໂຕຣ​ເຄມີ, ນ້ຳມັນ ​ແລະ ​ແກັສ ມີ​ສິນ​ຊັບ​ຫລ້າ​ສຸດ 40.100 ລ້ານ​ໂດ​ລາ ​ແລະ ອັນ​ດັບ 20 ທ່ານ ​ແຈັກ ມ່າ ຊາວ​ຈີນ ອາຍຸ 53 ປີ ຜູ້​ສ້າງຕັ້ງບໍລິສັດ ອີ-ຄອມ​ເມີດ ອາລີ​ບາ​ບາ ມີ​ສິນ​ຊັບ 39.000 ລ້ານ​ໂດ​ລາ.

- Wave100S AD to Website 2020 0 - ເຈຟ ເບຊອສ ຜູ້ບໍລິຫານອາເມຊອນ ມະຫາເສດຖີອັນດັບ 1 ໂລກ

ປີ​ນີ້​ມີ​ມະຫາ​ເສດຖີ​ທົ່ວ​ໂລກ​ລວມ 2.208 ຄົນ ​ແລະ ມີ​ສິນ​ຊັບ​ລວມກັນ 9,1 ຕື້​ໂດ​ລາ​ສະຫະລັດ ​ເພີ່ມ​ຂຶ້ນ 18% ຈາກ​ປີຜ່ານມາ.

- WhatsApp Image 2020 05 27 at 5 - ເຈຟ ເບຊອສ ຜູ້ບໍລິຫານອາເມຊອນ ມະຫາເສດຖີອັນດັບ 1 ໂລກ
- WhatsApp Image 2020 05 27 at 5 - ເຈຟ ເບຊອສ ຜູ້ບໍລິຫານອາເມຊອນ ມະຫາເສດຖີອັນດັບ 1 ໂລກ
error: Alert: ເນື້ອຫາຂ່າວມີລິຂະສິດ !!