ລັດຖະມົນຕີຕ່າງປະເທດ ສຳ​ເລັດ​ການເຂົ້າຮ່ວມກອງປະຊຸມ OECD ​ແລະ ຢ້ຽມຢາມຍີ່ປຸ່ນ

- 28870290 778256285711487 1180723974648818298 n - ລັດຖະມົນຕີຕ່າງປະເທດ ສຳ​ເລັດ​ການເຂົ້າຮ່ວມກອງປະຊຸມ OECD ​ແລະ ຢ້ຽມຢາມຍີ່ປຸ່ນ
- Untitled design - ລັດຖະມົນຕີຕ່າງປະເທດ ສຳ​ເລັດ​ການເຂົ້າຮ່ວມກອງປະຊຸມ OECD ​ແລະ ຢ້ຽມຢາມຍີ່ປຸ່ນ

ທ່ານ ສະເຫລີມໄຊ ກົມມະສິດ ລັດຖະມົນຕີກະຊວງການຕ່າງປະເທດແຫ່ງ ສປປ ລາວ ໄດ້ນໍາພາ ຄະນະຜູ້ແທນລາວເດີນທາງເຂົ້າຮ່ວມກອງປະຊຸມລັດຖະມົນຕີຕ່າງປະເທດກ່ຽວກັບແຜນງານຂອງ​ການ​ຮ່ວມ​ມື​ດ້ານ​ເສດຖະກິດ ​ແລະ ການ​ພັດທະນາ (OECD) ສຳລັບພາກພື້ນຕາເວັນອອກສຽງໃຕ້ ໃນລະຫວ່າງວັນທີ 8-9 ມີນາ 2018 ທີ່ໂຕກຽວ ເຊິ່ງເປັນກອງປະຊຸມຄັ້ງທຳອິດໃນລະດັບລະດັບລັດຖະມົນຕີ ນັບ​ແຕ່ແຜນງານດັ່ງກ່າວໄດ້ຈັດຕັ້ງຂຶ້ນໃນປີ 2014.

ກອງປະຊຸມຄັ້ງນີ້, ເປັນເວທີສຳຄັນໃນການເຕົ້າໂຮມບັນດາລັດຖະມົນຕີ ແລະ ເຈົ້າໜ້າທີ່ລະດັບສູງ ຈາກປະເທດອາຊີຕາເວັນອອກສຽງໃຕ້ ແລະ ປະເທດສະມາຊິກ OECD ເພື່ຶອມາປຶກສາຫາລື ແລະ ແລກ ປ່ຽນນະໂຍບາຍການພັດທະນາຂອງປະເທດຕົນ ກໍຄືການມີສ່ວນຮ່ວມໃນການເຊື່ອມໂຍງ ແລະ ການພັດທະ ນາໃນພາກພື້ນອາຊີຕາເວັນອອກສຽງໃຕ້ ໂດຍສະເພາະໃນພາກພື້ນອາຊຽນ ພາຍໃຕ້ຫົວຂໍ້ “ການມີສ່ວນຮ່ວມ ຂອງອາຊຽນ (Inclusive ASEAN)” ໂດຍການເປັນປະທານຮ່ວມຂອງທ່ານລັດຖະມົນຕີຕ່າງປະເທດຍີ່ປຸ່ນ, ທ່ານລັດຖະມົນຕີກະຊວງການເງິນອິນໂດເນເຊຍ ແລະ ທ່ານເລຂາທິການໃຫຍ່ OECD ໂດຍເນັ້ນໃສ່ 2 ບັນຫາສໍາຄັນຄື: ການມີສ່ວນຮ່ວມຜ່ານການເຊື່ອມຈອດ ແລະ ການມີສ່ວນຮ່ວມຜ່ານການເຂົ້າຮ່ວມ  ແນໃສ່ສົ່ງເສີມ ແລະ ເພີ່ມທະວີການຮ່ວມມືຫລາຍດ້ານ ເປັນຕົ້ນແມ່ນການເຊື່ອມໂຍງພື້ນຖານໂຄງລ່າງ, ແລກ ປ່ຽນຂໍ້ກຳນົດລະບຽບການໃນການອຳນວຍຄວາມສະດວກ ແລະ ຫລຸດຜ່ອນສິ່ງກີດຂວາງທາງດ້ານການຄ້າ ແລະ ການລົງທຶນ, ການສົ່ງເສີມບົດບາດຍິງຊາຍ, ການພັດທະນາຊັບພະຍາກອນມະນຸດ, ການສົ່ງເສີມທຸລະ ກິດຂະໜາດນ້ອຍ ແລະ ຂະໜາດກາງ ລວມທັງການມີສ່ວນຮ່ວມຂອງພາກເອກະຊົນ ເຊິ່ງບັນດາລັດຖະ ມົນຕີ ແລະ ຜູ້ແທນຂັ້ນສູງຈາກປະເທດອາຊີຕາເວັນອອກສຽງໃຕ້ ແລະ ປະເທດສະມາຊິກ OECD ໄດ້ແລກ ປ່ຽນປະສົບການ, ບົດຮຽນ ແລະ ຮ່ວມກັນກຳນົດທິດທາງນະໂຍບາຍລວມທີ່ຈຳເປັນຕໍ່ການເສີມສ້າງຄວາມ ເຂັ້ມແຂງໃນພາກພື້ນອາຊີຕາເວັນອອກສຽງໃຕ້ ໂດຍສະເພາະພາກພື້ນອາຊຽນ.

ກອງປະຊຸມຍັງໄດ້ມີການມອບ-ຮັບໜ້າທີ່ຂອງປະທານຮ່ວມຜູ້ເກົ່າ (ຍີ່ປຸ່ນ ແລະ ອິນໂດເນເຊຍ) ໃຫ້ປະທານຮ່ວມຜູ້ໃໝ່ (ສ.ເກົາຫລີ ແລະ ໄທ) ເພື່ອໃຫ້ປະທານຮ່ວມຜູ້ໃໝ່ສາມາດປະຕິບັດໜ້າທີ່ໄດ້ໃນເດືອນເມສາ. ພ້ອມດຽວກັນ, ກອງປະຊຸມດັ່ງກ່າວໄດ້ດຳເນີນຄວບຄູ່ໄປກັບກອງປະຊຸມຄະນະຊີ້ນຳແຜນງານ ຄັ້ງທີ 4 ​ເຊິ່ງມີເຈົ້າໜ້າທີ່ລະດັບສູງ ແລະ ບັນດາລັດຖະມົນຕີຂອງປະເທດອາຊຽນ ພ້ອມດ້ວຍຜູ້ຕາງໜ້າຂອງປະເທດສະມາຊິກ OECD ຖືກເຊີນເຂົ້າຮ່ວມ ເພື່ອເພີ່ມທະວີຮັດແໜ້ນສາຍພົວພັນມິດຕະພາບ ແລະ ການຮ່ວມມືລະຫວ່າງ ສປປ ລາວ ແລະ ຍີ່ປຸ່ນ ໃນຖານະຄູ່ຮ່ວມຍຸດທະສາດໃຫ້ນັບມື້ກວ້າງຂວາງ ແລະ ເລິກເຊິ່ງ. ທ່ານ ສະເຫລີມໄຊ ກົມມະສິດ ລັດຖະມົນຕີກະຊວງການຕ່າງປະເທດແຫ່ງ ສປປ ລາວ ໄດ້ຢ້ຽມຢາມສອງຝ່າຍ ເຊິ່ງໄດ້ພົບປະກັບການນຳທີ່ສໍາຄັນຂອງຝ່າຍຍີ່ປຸ່ນຄື: ວັນທີ 7 ມີນາ 2018, ໄດ້ພົບປະ (ຮັບປະທານອາຫານຄໍ່າແບບເຮັດວຽກ) ກັບຄູ່ຮ່ວມຕຳແໜ່ງ ທ່ານ ທະໂຣໂຄໂນະ (Mr. Taro KONO) ລັດຖະມົນຕີຕ່າງປະເທດຍີ່ປຸ່ນ ເຊິ່ງກ່ອນຈະພົບປະສອງທ່ານລັດຖະມົນຕີຕ່າງປະເທດລາວ ແລະ ຍີ່ປຸ່ນໄດ້ຖະແຫລງຂ່າວຮ່ວມກັນ ​ໂດຍສອງຝ່າຍໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືອັນດີງາມລະຫວ່າງສອງປະເທດທີ່ໄດ້ຮັບການຂະຫຍາຍຕົວຢ່າງບໍ່ຢຸດຢັ້ງຕະຫລອດໄລຍະທີ່ຜ່ານມາ.

ສອງຝ່າຍໄດ້ປຶກສາຫາລື ແລະ ແລກປ່ຽນຄຳຄິດຄຳເຫັນນຳກັນກ່ຽວກັບການຮ່ວມມືດ້ານຕ່າງໆ, ສະແດງຄວາມຊົມເຊີຍຕໍ່ພາກສ່ວນກ່ຽວຂ້ອງຂອງສອງປະເທດທີ່ໄດ້ພ້ອມກັນຜັນຂະຫຍາຍຜົນການຢ້ຽມຢາມ ຍີ່ປຸ່ນຢ່າງເປັນທາງການ ຂອງພະນະທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ໃນ ເດືອນມິຖຸນາ 2017.​ ພ້ອມນີ້, ສອງຝ່າຍໄດ້ເຫັນດີເປັນເອກະພາບກັນຕໍ່ທິດທາງການຮ່ວມມືໃນຕໍ່ໜ້າ ເປັນ ຕົ້ນການພັດທະນາພຶ້ນຖານໂຄງລ່າງຂອງ ສປປ ລາວ ເພື່ອເຊື່ອມໂຍງກັບພາກພຶ້ນ ແລະ ສາກົນ, ການພັດ ທະນາຊັບພະຍາກອນມະນຸດ, ການສຶກສາ, ວັດທະນະທຳ, ທ່ອງທ່ຽວ, ການພົວພັນຮ່ວມມືໃນຂອບພາກພື້ນ ແລະ ສາກົນ ແລະ ດ້ານອື່ນໆ. ໃນໂອກາດດັ່ງກ່າວນີ້, ທ່ານລັດຖະມົນຕີ ສະເຫລີມໄຊ ກົມມະສິດ ໄດ້ສະແດງຄວາມຂອບໃຈຕໍ່ລັດຖະບານ ແລະ ປະຊາຊົນຍີ່ປຸ່ນ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫລືອ ສປປ ລາວ ໂດຍຕະຫລອດມາ, ເຫັນວ່າການຊ່ວຍເຫລືອຂອງຍີ່ປຸ່ນແມ່ນມີປະສິດທິພາບສູງ​ ເຊິ່ງໄດ້ປະກອບສ່ວນສຳຄັນເຂົ້າໃນການພັດທະນາເສດຖະກິດ-ສັງຄົມຂອງ ສປປ ລາວ ໃນແຕ່ລະໄລຍະ.

- Wave100S AD to Website 2020 0 - ລັດຖະມົນຕີຕ່າງປະເທດ ສຳ​ເລັດ​ການເຂົ້າຮ່ວມກອງປະຊຸມ OECD ​ແລະ ຢ້ຽມຢາມຍີ່ປຸ່ນ

ໃນໂອກາດຢ້ຽມຄັ້ງນີ້, ທ່ານລັດຖະມົນຕີ ສະເຫລີມໄຊ ກົມມະສິດ ພ້ອມດ້ວຍຄະນະ ຍັງໄດ້ເຂົ້າຢ້ຽມຂໍ່ານັບພະນະທ່ານ ຊິນໂຊ ອາເບະ (H.E. Mr. Shinzo ABE) ນາຍົກລັດຖະມົນຕີຍີ່ປຸ່ນ; ໄດ້ພົບປະກັບທ່ານ ຄາຊູຢູກິ ນາກາເນະ (Mr. Kazuyuki NAKANE) ຮອງລັດຖະມົນຕີກະຊວງການຕ່າງປະເທດຍີ່ປຸ່ນ; ທ່ານ ຟູມິໂອະ ກິຊິດະ (Mr. Fumio KISHIDA) ປະທານຄະນະກຳມະການຄົ້ນຄວ້ານະໂຍບາຍຂອງພັກເສລີປະຊາທິປະໄຕຍີ່ປຸ່ນ, ອະດີດລັດຖະມົນຕີຕ່າງປະເທດຍີ່ປຸ່ນ; ທ່ານ ຕາເກໂອະ ຄາວາມູຣະ (Mr. Takeo KAWAMURA) ປະທານສະມາຄົມມິດຕະພາບ ຍີ່ປຸ່ນ-ລາວ ຝ່າຍລັດຖະສະພາ ແລະ ຄະນະ; ທ່ານ ຊິນອິຈິ ຄິຕາໂອກະ (Mr. Shinichi KITAOKA) ປະທານອົງການຮ່ວມມືສາກົນຍີ່ປຸ່ນ (ອົງການໄຈກາ). ການຢ້ຽມຢາມຍີ່ປຸ່ນຄັ້ງນີ້, ຄະນະຝ່າຍລາວໄດ້ຮັບການຕ້ອນຮັບອັນອົບອຸ່ນຈາກຝ່າຍຍີ່ປຸ່ນ ແລະ ປະສົບຜົນສຳເລັດຢ່າງຈົບງາມ.

- WhatsApp Image 2020 05 27 at 5 - ລັດຖະມົນຕີຕ່າງປະເທດ ສຳ​ເລັດ​ການເຂົ້າຮ່ວມກອງປະຊຸມ OECD ​ແລະ ຢ້ຽມຢາມຍີ່ປຸ່ນ
- WhatsApp Image 2020 05 27 at 5 - ລັດຖະມົນຕີຕ່າງປະເທດ ສຳ​ເລັດ​ການເຂົ້າຮ່ວມກອງປະຊຸມ OECD ​ແລະ ຢ້ຽມຢາມຍີ່ປຸ່ນ
error: Alert: ເນື້ອຫາຂ່າວມີລິຂະສິດ !!