ຟີລິບປິນກຽມລາອອກ ຈາກສານອາຍາສາກົນ
ປະທານາທິບໍດີ ໂຣດຣິໂກ ດູເຕີເຕ ປະກາດວ່າຟີລິບປິນຈະຖອນຕົວຈາກການເປັນໜຶ່ງໃນລັດພາຄີຂອງສົນທິສັນຍາຈັດຕັ້ງສານອາຍາສາກົນ.
ສຳນັກຂ່າວຕ່າງປະເທດລາຍງານຈາກນະຄອນຫລວງມະນິລາ ປະເທດຟີລິບປິນ ໃນວັນທີ 14 ມີນາວ່າ: ທຳນຽບມາລາກັນຍັງອອກຖະແຫລງການໃນວັນທີ 14 ມີນາວ່າ: ປະທານາທິບໍດີ ໂຣດຣິໂກ ດູເຕີເຕ ຂໍນຳຟີລິບປິນຖອນຕົວອອກຈາກການເປັນລັດຮ່ວມພາຄີລັດຖະທຳມະນູນນະຄອນຫລວງໂຣມ ເຊິ່ງເປັນສົນທິສັນຍາສາກົນວ່າດ້ວຍການຈັດຕັ້ງສານອາຍາສາກົນ (ICC) ໂດຍການລາອອກ “ມີຜົນທັນທີ” ເນື່ອງຈາກ ICC ເປັນອົງການທີ່ໃຫ້ຮ້າຍຜູ້ນຳຟີລິບປິນ ແລະ ລັດຖະບານມະນິລາ ດ້ວຍຂໍ້ກ່າວຫາທີ່ບໍ່ມີມູນຄວາມຈິງ ແລະ ການໂຈມຕີທີ່ເກີດຂຶ້ນຕະຫລອດໄລຍະເວລາຜ່ານມາລ້ວນຢູ່ພາຍໃຕ້ການຊີ້ນຳຂອງສະຫະປະຊາຊາດ (UN).
JUST IN: Statement of President Rodrigo Duterte on the ICC’s preliminary examination | @JhoannaBINQ pic.twitter.com/R4KWHO5GYi
— Inquirer (@inquirerdotnet) March 14, 2018
ເຖິງຢ່າງໃດກໍຕາມ, ຂະບວນການລາອອກຈາກການເປັນສະມາຊິກຂອງ ICC ອາດໃຊ້ເວລາເຖິງ 1 ປີ ເລີ່ມຈາກການທີ່ຜູ້ນຳລັດຖະບານຂອງປະເທດນັ້ນຕ້ອງຍື່ນໜັງສືຢ່າງເປັນທາງການເຖິງເລຂາທິການ UN ທີ່ສຳນັກງານໃຫຍ່ໃນນະຄອນນິວຢອກ ເຊິ່ງຄົນປັດຈຸບັນຄືທ່ານ ອັນໂຕນິໂອ ກູເຕີເຣສ.
BREAKING: Duterte announces PH withdrawal from ICC treaty | @jhoannabinq https://t.co/pFTVyLeFWU
— Inquirer (@inquirerdotnet) March 14, 2018
ການເຄື່ອນໄຫວດັ່ງກ່າວຂອງລັດຖະບານມະນິລາມີຂຶ້ນ ຫລັງ ICC ເຊິ່ງມີສຳນັກງານໃຫຍ່ຢູ່ນະຄອນຫລວງເຮກ ປະກາດໃນຕົ້ນເດືອນກຸມພາຜ່ານມາ ເລີ່ມດຳເນີນການສອບສວນເບື້ອງຕົ້ນການຮ້ອງຮຽນວ່າ: ທ່ານ ດູເຕີເຕ “ມີສ່ວນກ່ຽວຂ້ອງ” ກັບ “ການເສຍຊີວິດຢ່າງຜິດກົດໝາຍ” ຂອງປະຊາຊົນຫລາຍກວ່າ 4.100 ຄົນ ນັບແຕ່ເຈົ້າໜ້າທີ່ຝ່າຍຄວາມໝັ້ນຄົງຂອງຟີລິບປິນປະຕິບັດການສົງຄາມຢາເສບຕິດໃນກາງປີ 2016.
