ຍຸກ​ຄົນ​ກ້າວ ຢ່າ​ຟ້າວ​ຂ້າ​ພາ​ສາ

- advert banner 728 90 728x90 - ຍຸກ​ຄົນ​ກ້າວ ຢ່າ​ຟ້າວ​ຂ້າ​ພາ​ສາ

ການ​ປ່ຽນ​ແປງ​ທີ່​ເຫັນ​ໄດ້​ດີ​ອັນ​ນຶ່ງ​ໃນ​ການ​ພັດ​ທະ​ນາ​ເສດ​ຖະ​ກິດ​-ສັງ​ຄົ​ມ​ເຮົາ​ຄືການ​ປ່ຽນ​ແປງ​ຄົນ ​ໂດຍ​ສະ​ເພາະ​ລະ​ດັບ​ການ​ສຶກ​ສາ ແຕ່​ຈະ​ເຮັດແນວ​ໃດ​ໃຫ້​ການ​ສຶກ​ສານັ້ນ ອົບ​ຮົມ​ບົ່ມ​ສອນ​ຄົນ​ລາວ ນຳ​ໃຊ້​ພາ​ສາ​ລາວ​ຢ່າງ​ຖືກ​ຕ້ອງ ?.

- lattana 1 - ຍຸກ​ຄົນ​ກ້າວ ຢ່າ​ຟ້າວ​ຂ້າ​ພາ​ສາ

ກ່ອນ​ໜ້ານີ້​ຜູ້​ຂຽນ​ກໍ​ໄດ້​ແລກ​ປ່ຽນ​ນຳ​ຜູ້​ອ່ານ ກ່ຽວ​ກັບ​ເລື່ອງ​ການ​ໃ​ຊ້​ພາ​ສາ​ລາວ​ທີ່​ສອດ​ກະ​ຈາ, ພາ​ສາ​ລາວ​ທີ່​ພິ​ການ ເນື່ອງ​ຈາກ​ຜູ້​ໃຊ້​ເມີນ​ໜ້າ​ໜີ ທີ່​ຈະ​ໃຊ້​ພາ​ສາ​ຕົນ​ເອງ​ໂດຍ​ສະ​ເພາະ​ໃນ​ເວ​ລາ​ເວົ້າ​ໃນ​ທີ່​ສາ​ທາ​ລະ​ນະ, ແລະ​ນີ້​ກໍ​ເປັນ​ອີກ​ເທື່ອ​ນຶ່ງ​ທີ່​ຈະ​ແລກ​ປ່ຽນ​ເລື່ອງ​ນີ​ອີກ ເພາະ​ໜ້າ​ສົງ​ສານ​ພາ​ສາ​ລາວ​ເຮົາ​ແທ້ໆ.

ອາ​ທິດ​ກ່ອນ ຜູ້​ຂຽນ​ໄດ້​ໄປ​ເຂົ້າ​ຮ່ວມກອງ​ປະ​ຊຸມ​ເພື່ອ ຮັບ​ຟັງ​ຄວາມ​ຄືບ​ໜ້າ​ການ​ພັດ​ທະ​ນາ​ແມ່​ຍິງ​ລາວ ຕ້ອນ​ຮັບ​ວັນ​ແມ່​ຍິງ​ສາ​ກົນ ເຊິ່ງ​ໃນ​ກອງ​ປະ​ຊຸມ​ດັ່ງ​ກ່າວ​ໄດ້​ເຊື້ອ​ເຊີນ​ນັກ​ຄົ້ນ​ຄວ້າ, ຜູ້​ພັດ​ທະ​ນາ​ມາ​ນຳ​ສະ​ເໜີ ບົດ ກ່ຽວ​ກັບ​ການ​ພັດ​ທະ​ນາ​ແມ່​ຍິງ ແລະ​ສ້າງ​ຄວາມ​ເຂັ້ມ​ແຂງ​ແກ່​ແມ່​ຍິງ, ບັງ​ເອີນ​ໃນ​ກອງ​ປະ​ຊຸມ​ດັ່ງ​ກ່າວ​ມີ ຍິ່ງ​ໜຸ່ມ​ທີ່​ຫ້າວ​ຫັນ ແລະ​ໝັ່ນ​ໃຈ, ທ່າ​ທາງ​ສະຫຼາດຫຼັກ​ແຫຼມ ຂຶ້ນ​ສະ​ເໜີ​ບົດ​ກ່ຽວ​ກັບ​ໂຄງ​ການ​ພັດ​ທະ​ນາ​ແມ່​ຍິງ ໂດຍ​ຜູ້​ຈັດ​ຕັ້ງ​ກອງ​ປະ​ຊຸມ​ສະ​ເໜີ​ວ່າ “ໃຫ້​ໃຊ້​ພາ​ສາ​ທີ່​ຕົນ​​ເອງຮູ້​ສຶກ​ໝັ້ນ​ໃຈ” ເພາະ​ໃນ​ກອງ​ປະ​ຊຸມ ມີ​ທັງ​ຄົນ​ລາວ ແລະ​ຕ່າງ​ປະ​ເທດ ແລະ​ມີ​ນາຍ​ແປ​ພາ​ສາ ແລະ​ແນ່ນອນ​ຍິງ​ໜຸ່ມ​ທີ່​ວ່ານີ້​ກໍ​ແມ່ນ​ຄົນ​ລາວ.

ພໍ​ອະ​ທິ​ບາຍ​ໄປ​ໄດ້​ຍາວ​ເຕີບ ຜູ້​ທີ່​ນັ່ງ​ຂ້າງ​ຜູ້​ຂຽນເຊິ່ງ​ກໍ​ແມ່ນ​ຄົນ​ຕ່າງ​ປະ​ເທດ​ເລີຍ​ຂວາກ​ຂ້າງ ແລະ​ ຖາມ​ວ່າ ຄຳ​ວ່າ ພາ​ຕິ​ຊີ​ແພນ​ສ໌ (participants), ເບ​ເນ​ຟິ​ເຊີ​ຣີ (beneficiary)…​ໃນ​ພາ​ສາ​ລາວ​ກໍ​ມີ​ບໍ່? ໂອຍ​ຕາຍ​ແທ້​ຜູ້​ຂຽນ​ຕື່ນ​ຍຸບບາດ​ໜຶ່ງ ກໍ​ເລີຍ​ຕອບ​ວ່າ “ກໍ​ມີ​ແທ້​ມີ​​ວ່າ​ລະເນາະ” ເຊິ່ງ​ບັນ​ດາ​ຄຳ​ສັບ​ທີ່​ວ່ານີ້ ແມ່ນ​ຍິງ​ໜຸ່ມ​ດັ່ງ​ກ່າວໃຊ້​ແທນ​ພາ​ສາ​ລາວ.

ແຕ່​ກົງ​ກັນ​ຂ້າມ​, ເມື່ອ​ບົດ​ນຳ​ສະ​ເໜີ​ຕໍ່​ມາ​ແມ່ນ​​ຄົນ​ຕ່າງ​ປະ​ເທດ​ທີ່​ເວົ້າ​ພາ​ສາ​ລາວ ເຊິ່ງ​ເພິ່ນ​ຜູ້ນີ້​ເວົ້າ​ມີ​ວັກ​ມີ​ຕອນ, ເປັນ​ປະ​ໂຫຍກ​ທີ່​ລຽບ​ງ່າຍ ແລະ​ເຂົ້າ​ໃຈ​ຈະ​ແຈ້ງ ທັງ​ສຳ​ນຽງ​ສຽງ​ເວົ້າ​ກໍ​ມ່ວນ​ອອນ​ຊອນ ຮູ້​ເວົ້າ​ຮອດ​ວ່າ  “…ເລື່ອງນີ້​ກໍ​ບໍ​ແມ່ນ​ເວົ້າ​ງ່າຍ ເຮັດ​ງ່າຍ​ເນາະ…” ເຊິ່ງ​ເຮັດ​ໃຫ້​ຄົນ​ຕ່າງ​ປະ​ເທດ​ຜູ້​ເກົ່າ​ຊິມ​ໃສ່​ຫູ​ຜູ້​ຂຽນ​ອີກ​ວ່າ “ນາງນີ້​ເວົ້າ​ພາ​ສາ​ລາວ​ເກັ່ງ​ກວ່າ​ຄົນ​ລາວຫຼາຍ​ຄົນ​ຢູ່ນີ້​ເນາະ” ​ເຊິ່ງມັນ​ປານ​ກັບ​ຟ້າ​ຜ່າ​ມາ​ກາງ​ໃຈ​ຜູ້​ຂຽນ​ແທ້ໆ.

- 1 1 - ຍຸກ​ຄົນ​ກ້າວ ຢ່າ​ຟ້າວ​ຂ້າ​ພາ​ສາ
- Tiger Head 728x90 - ຍຸກ​ຄົນ​ກ້າວ ຢ່າ​ຟ້າວ​ຂ້າ​ພາ​ສາ

​ເພາະ​ສະ​ນັ້ນ, ກໍ​ລະ​ນີ​ການ​ໃຊ້​ພາ​ສາລາວ​ຂອງ​ຍິງ​ໜຸ່ມ​ຜູ້ນັ້ນ ມັນ​ໄດ້​ກາຍ​ເປັນ​ສັນ​ຍານ​ເຕືອນ​ພວກ​ເຮົາ​ວ່າ ປະ​ກົດ​ການນີ້​ກຳ​ລັງ​ແຜ່​ລາມ​ໃນ​ສັງ​ຄົມ​ເຮົາ ໂດຍ​ສະ​ເພາະ​ໄວ​ໜຸ່ມຈຳ​ນວນ​ໜຶ່ງ​ທີ່​ໄດ້​ຮັບ​ການ​ສຶກ​ສາພາ​ສາ​ຕ່າງ​ປະ​ເທດ​ (ຫຼາຍ​ພາ​ສາ) ເຊິ່ງ​ຂໍ​ຮຽກ​ຮ້ອງ​ໃຫ້​ນຳ​ໃຊ້​ພາ​ສາ​ແຕ່​ລະ​ພາ​ສາ​ທີ່​ພວກ​ເຮົາ​ຮູ້​ເຮົາ​ຮຽນ​ນັ້ນ ຖືກ​ຕາມ​ກາ​ລະ​ເທ​ສະ ຈະ​ເປັນ​ທີ່​ຍ້ອງ​ຍໍ​ທີ່​ສຸດ, ຮຽນ​ຮູ້​ພາ​ສາ​ເພິ່ນ​ກໍ​ຢ່າ​ລຶມ​ພາ​ສາ​ເຮົາ​, ເຮົາ​ຄົນ​ລາວບໍ່​ເວົ້າພາ​ສາ​ລາວ ຊິ​ປະ​ໃຫ້​ຄົນ​ຕ່າງ​ປະ​ເທດ ມາ​ເວົ້າ​ແທນ​ພວກ​ເຮົາບໍ່​ເປັນ​ຕີ!

 

error: Content is protected !!