11 ພຶດຕິກຳຂອງຄົນບໍ່ຮູ້ຈັກບໍລິຫານເວລາ

- advert banner 728 90 728x90 - 11 ພຶດຕິກຳຂອງຄົນບໍ່ຮູ້ຈັກບໍລິຫານເວລາ

ການບໍ່ແບ່ງເວລາສາມາດເຮັດໃຫ້ມື້ທຳມະດາມື້ໜຶ່ງກາຍເປັນມື້ບໍ່ດີໄດ້ ບໍ່ວ່າຈະແມ່ນການລືມເຮັດສິ່ງນັ້ນສິ່ງນີ້ ຫລື ເຖິງຂັ້ນ ສົ່ງວຽກຊ້າກ່ວາກຳນົດ ແຕ່ລະຄົນຈະມີວິທີການແບ່ງເວລາບໍ່ຄືກັນ ເຊິ່ງບາງຄົນສາມາດແບ່ງເວລາໄດ້ດີ ແລະ ບາງຄົນກໍກຳລັງ ຄ່ອຍໆຮຽນຮູ້ ແລະ ປັບປຸງໂຕເອງ, ແຕ່ກໍຍັງມີຄົນຢູ່ບາງກຸ່ມທີ່ມັກເຮັດຫຍັງລົ້ມເຫລວເປັນປະຈຳ ເນື່ອງຈາກບໍ່ຮູ້ຈັກແບ່ງເວລາ.

- lattana 1 - 11 ພຶດຕິກຳຂອງຄົນບໍ່ຮູ້ຈັກບໍລິຫານເວລາ

ຄວາມສຳຄັນຂອງການແບ່ງເວລາແມ່ນມັນເປັນໂຕກຳໜົດຄວາມສຳເລັດຂອງທ່ານ ດັ່ງນັ້ນ ເຮົາຈຶ່ງບໍ່ຄວນເບິ່ງຂ້າມໃນເລື່ອງ ນີ້. ຕໍ່ໄປນີ້ແມ່ນ 11 ພຶດຕິກຳຂອງຄົນທີ່ບໍ່ຍອມແບ່ງເວລາ :

  1. ບໍ່ຈັດຕາຕະລາງເວລາ : ທ່ານອາດຄິດວ່າທ່ານສາມາດຈັດການທຸກຢ່າງໄດ້ໂດຍບໍ່ຕ້ອງມີການວາງແຜນ ຫລື ຈັດເວລາ ໃດໆ ຖ້າທ່ານຄິດແບບນີ້ ຂໍບອກເລີຍວ່າທ່ານກຳລັງຄິດຜິດ ເພາະການຈັດຕາຕະລາງນັ້ນມີຄວາມສຳຄັນຫລາຍ ມັນສາມາດເຮັດໃຫ້ທ່ານໄດ້ວາງແຜນຈັດການສິ່ງຕ່າງໆໂດຍລະອຽດ ລວມທັງບັນທຶກສິ່ງທີ່ທ່ານຕ້ອງເຮັດໃນແຕ່ລະມື້ໂດຍບໍ່ລະເລີຍສິ່ງໃດໄປ ດັ່ງນັ້ນ ຫາກທ່ານບໍ່ຈັດການຕາຕະລາງໃຫ້ດີ ທ່ານກໍຈະເສຍເວລາໃນການເຮັດສິ່ງຕ່າງໆຫລາຍຂຶ້ນ ແລະ ອາດລືມເລື່ອງສຳຄັນບາງຢ່າງໄປໄດ້ງ່າຍໆ.
  2. ບໍ່ຈົດບັນທຶກ : ການຈົດບັນທຶກເປັນສິ່ງທີ່ມັກເຮັດຄຽງຄູ່ກັບການວາງແຜນ ວິທີງ່າຍໆໃນການຈົດບັນທຶກກໍຄື ຈົດບັນທຶກໄວ້ໃນອຸປະກອນທີ່ີຢູ່ອ້ອມໂຕທ່ານ ສິ່ງໃດກໍສາມາດເປັນເຄື່ອງມືຈົດບັນທຶກໃຫ້ກັບທ່ານໄດ້ທັງໝົດ ບໍ່ວ່າຈະເປັນໂທລະສັບ, ປຶ້ມບັນທຶກ, ປະຕິທິນ ຫລື ແມ່ນແຕ່ເຈ້ຍນ້ອຍຕ່າງໆ ແຕ່ທາງທີ່ດີຄວນຈົດໄວ້ບ່ອນດຽວກັນຈະດີກ່ວາ ເພາະເວລາຈະໃຊ້ ຈຶ່ງຫາງ່າຍ ແລະ ບໍ່ລືມວ່າທ່ານຈົດໄວ້ບ່ອນໃດ.
  3. ບໍ່ມີສະມາທິກັບສິ່ງທີ່ເຮັດຢູ່ : ຄົນທີ່ເຮັດຫຍັງບໍ່ສຳເລັດສ່ວນຫລາຍນັ້ນມັກຈະບໍ່ມີສະມາທິກັບສິ່ງທີ່ກຳລັງເຮັດຢູ່ ຫາກທ່ານເປັນຄົນທີ່ໃຈບໍ່ຢູ່ກັບໂຕ ເຊື່ອງຊຶງລະເມີຢູ່ຕະຫລອດ ແລະ ຄິດແຕ່ເລື່ອງອື່ນໆຕະຫລອດ ສິ່ງເຫລົ່ານີ້ຈະເປັນບັນຫາກັບທ່ານໄດ້ ດັ່ງນັ້ນ ທ່ານຕ້ອງຫລີກເວັ້ນສິ່ງທີ່ຈະເຮັດໃຫ້ທ່ານສັບສົນ ແລະ ພະຍາຍາມຕັ້ງສະຕິຈົດຕໍ່ກັບສິ່ງທີ່ທ່ານຕັ້ງໃຈຈະເຮັດໄວ້.
  4. ມັກເລື່ອນມື້ : ມັນກໍເປັນເລື່ອງປົກກະຕິທີ່ຄົນເຮົາມັກຈະເລື່ອນມື້ ແຕ່ການເລື່ອນຈົນຕິດເປັນນິໄສໄປແລ້ວ ແມ່ນສິ່ງທີ່ເປັນ ບັນຫາຫາກທ່ານກຽດຄ້ານ ຫລື ມັກຫາຂໍ້ອ້າງທີ່ຈະບໍ່ເຮັດສິ່ງໃດໆ ແລະ ບອກກັບໂຕເອງວ່າ ແລ້ວຈຶ່ງກັບມາເຮັດ ຫລື ເອົາໄວ້ເຮັດມື້ໜ້າ ເຊິ່ງມັນແມ່ນສັນຍານທີ່ບໍ່ດີປານໃດ ທ່ານຄວນຫາແຮງຈູງໃຈ ແລະ ຟ້າວເຮັດວຽກນັ້ນໃຫ້ສຳເລັດ.
  5. ບໍ່ມີກິດຈະວັດປະຈຳວັນ : ກິດຈະກຳຕ່າງໆທີ່ທ່ານເຮັດເປັນປະຈຳມັກຈະຊ່ວຍກະຕຸ້ນໃຫ້ທ່ານມີແຮງຈູງໃຈໃນການເຮັດວຽກ ບໍ່ວ່າຈະເປັນການດື່ມກາເຟຍາມເຊົ້າ ຕະຫລອດເຖິງການອອກກຳລັງກາຍຍາມແລງ ກິດຈະກຳເຫລົ່ານີ້ລ້ວນຊ່ວຍຈັດການຮູບແບບການໃຊ້ຊີວິດຂອງທ່ານໃຫ້ດີຂຶ້ນໄດ້.
  6. ບໍ່ແບ່ງເວລາໄປເຮັດໃນສິ່ງທີ່ຕົນເອງມັກ : ຊີວິດຈະມີຄວາມໝາຍຍັງຫາກທ່ານເມົາແຕ່ເຮັດວຽກໜັກຢ່າງດຽວ ແຕ່ຊີວິດບໍ່ມີຄວາມສຸກ. ສະນັ້ນການແບ່ງເວລາໃຫ້ກັບກິດຈະກຳທີ່ມັກ ຈຶ່ງເປັນສິ່ງສຳຄັນຢ່າງໜຶ່ງ ເນັ້ນວ່າຕ້ອງແບ່ງເວລາ ເພາະຖ້າຫາກວ່າທ່ານຫຍຸ້ງວຽກຫລາຍຈົນບໍ່ມີເວລາພັກຜ່ອນ ສຸດທ້າຍທ່ານກໍຕ້ອງຢຸດເຮັດກິດຈະກຳເຫລົ່ານີ້ໄປນຳ.
  7. ລືມມື້ພັກທ້າຍອາທິດ : ຢ່າປ່ອຍໃຫ້ມື້ພັກຂອງທ່ານນັ້ນວ່າງເປົ່າ ທ່ານຄວນວາງແຜນວ່າຈະເຮັດຫຍັງແດ່ໃນມື້ພັກເຫລົ່ານີ້ ການວາງແຜນໃຫ້ກັບມື້ພັກຈະ ເຮັດໃຫ້ທ່ານໄດ້ສຳຫລວດການໃຊ້ຊີວິດຂອງໂຕເອງ ແລະ ຈະສົ່ງຜົນໃຫ້ທ່ານໃຊ້ເວລາໃນການພັກ ຜ່ອນຢ່າງກຸ້ມຄ່າຫລາຍທີ່ສຸດ ທັງໄດ້ເຮັດຫຍັງມ່ວນໆອີກຫລາຍ ຕາມແຜນການທີ່ວາງເອົາໄວ້.
  8. ບໍ່ຕັ້ງເປົ້າໝາຍ : ເປົ້າໝາຍໃນມື້ນີ້ມີຫຍັງແດ່ ? ອາທິດນີ້ມີຫຍັງແດ່ ? ແລະ ໃນເດືອນນີ້ເດ້ ? ການຕັ້ງເປົ້າໝາຍຈະເຮັດໃຫ້ຊີວິດທ່ານມີລະບົບລະບຽບຫລາຍຂຶ້ນ ເຖິງວ່າທ່ານຈະບໍ່ສາມາດເຮັດຕາມເປົ້າໝາຍທີ່ວາງໄວ້ໄດ້ທັງໝົດ ແຕ່ຢ່າງໜ້ອຍທ່ານກໍຈະມີຄວາມກ້າວໜ້າເກີດຂຶ້ນ.
  9. ບໍ່ຍອມຈັດລຳດັບຄວາມສຳຄັນ : ວຽກ, ເງິນ ແລະ ຊີວິດສ່ວນໂຕ ການຈັດລຳດັບຄວາມສຳຄັນຂອງສິ່ງເຫລົ້ານີ້ລ້ວນເປັນ ສິ່ງສຳຄັນ ທັງຍັງສອດຄ່ອງກັບການແບ່ງເວລານຳອີກ ຫາກທ່ານບໍ່ຈັດລຳດັບຄວາມສຳຄັນໃຫ້ດີ ທ່ານກໍອາດໃຊ້ເວລາໄປຈົນໝົດ ກັບວຽກໆໜຶ່ງ ຈົນລືມສິ່ງສຳຄັນກ່ວາໄປ. ເວລາທີ່ທ່ານວາງແຜນສິ່ງຕ່າງໆໃຫ້ທ່ານລອງຈົດລາຍການວ່າສິ່ງໃດແດ່ທີ່ທ່ານຕ້ອງ ເຮັດ ແລະ ສິ່ງໃດທີ່ຍັງບໍ່ຈຳເປັນ ຫາກໃຊ້ວິທີນີ້ ເມື່ອເຖິງເວລາທີ່ທ່ານເຮັດຫລາຍຢ່າງບໍ່ທັນ ທ່ານກໍຈະຮູ້ວ່າສິ່ງໃດຄວນຕັດອອກໄປ ແລະ ສິ່ງໃດຄວນຈະເຮັດເປັນອັນດັບທຳອິດ.
  10. ເຮັດຫລາຍຢ່າງຫລາຍເກີນໄປ : ການເຮັດກິດຈະກຳຫລາຍເກີນໄປຈົນເກືອບບໍ່ມີເວລາພັກ ສາມາດບົ່ງບອກໄດ້ເລີຍວ່າ ທ່ານບໍລິຫານເວລາບໍ່ດີພໍ ດັ່ງນັ້ນ ຢ່າໃສ່ກິດຈະກຳລົງໃນຕາຕະລາງເວລາທີ່ອັດແໜ້ນຈົນເກີນພໍດີ ຖ້າທ່ານຮູ້ສຶກບໍ່ສະບາຍໃຈກັບກີດຈະກຳທີ່ຫລາຍປານນີ້ ທ່ານກໍຄວນຫລຸດມັນລົງ ເພາະບໍ່ດັ່ງນັ້ນບັນຫາຫລວງຫລາຍຈະຕາມມາຢ່າງແນ່ນອນ.
  11. ໃຊ້ຊີວິດຈົນໝົດແຮງ : ເວລາຄິດເຖິງຄົນທີ່ແບ່ງເວລາບໍ່ເປັນ ທ່ານອາດຄິດເຖິງຄົນຂີ້ຄ້ານທີ່ເມົາແຕ່ນອນໝົດມື້ໝົດເວັນ ແຕ່ຄວາມຈິງແລ້ວ ຄົນແບ່ງເວລາບໍ່ດີມີຢູ່ຫລາຍຮູບແບບ ບາງຄົນເຮັດວຽກຫລາຍເກີນໄປ ບາງຄົນກໍເລື່ອນມື້ເລື່ອນເວັນຈົນຕ້ອງມາເລັ່ງເຮັດຕອນທ້າຍ ແລະ ບາງຄົນກໍອາດເຮັດວຽກຫລາຍເກີນໄປຈົນໂຕເອງຮັບບໍ່ໄຫວ ເຊິ່ງສິ່ງດຽວທີ່ຄົນເຫລົ່ານີ້ມີຄືກັນກໍໍຄື ໂອກາດທີ່ໂຕເອງຈະໝົດແຮງລົງໃນທີ່ສຸດ.
- 1 1 - 11 ພຶດຕິກຳຂອງຄົນບໍ່ຮູ້ຈັກບໍລິຫານເວລາ