ເອັສຣາ ກຽມຈັດແຂ່ງຂັນບານເຕະ ນັກຮຽນຊີງຂັນ ເອັສຣາ ຄັບ 2018

- advert banner 728 90 728x90 - ເອັສຣາ ກຽມຈັດແຂ່ງຂັນບານເຕະ ນັກຮຽນຊີງຂັນ ເອັສຣາ ຄັບ 2018

ສູນເອັສຣາ ຫລື ສະໂມສອນ ເອັສຣາ ເອັຟຊີ ສູນທີ່ມີຊື່ສຽງໃນ ສປປ ລາວ ທີ່ປັ້ນນັກເຕະກ້າວສູ່ ທີມຊາດລາວຫລາຍໆຄົນ ກຽມຈັດການແຂ່ງຂັນບານເຕະສົ່ງເສີມນັກຮຽນເຍົາວະຊົນໃຫ້ຫ່າງໄກຈາກສິ່ງເສບຕິດ ຊີງຂັນ ເອັສຣາ ຄັບ ປະຈໍາປີ 2018 ໂດຍຈະເປີດສາກວັນທີ 31 ມີນານີ້ ທີ່ສູນເອັສຣາ.

- lattana 1 - ເອັສຣາ ກຽມຈັດແຂ່ງຂັນບານເຕະ ນັກຮຽນຊີງຂັນ ເອັສຣາ ຄັບ 2018

ຕາມການເປີດເຜີຍຂອງທ່ານ ສຸກອາພອນ ວົງຈຽງຄໍາ ຄູຝຶກສະໂມສອນ ເອັສຣາ ທັງເປັນຄະນະຈັດການແຂ່ງຂັນ ບອກວ່າ: ການແຂ່ງຂັນບານເຕະ ເອັສຣາ ຄັບ 2018 ສືບເນື່ອງມາຈາກປີຜ່ານ​ມາ (ເອັສຣາ ລີກ) ທີ່ພວກເຮົາຈັດຂຶ້ນມາ ເພື່ອພັດທະນານັກເຕະລາວລຸ້ນເຍົາວະຊົນໃຫ້ຫ່າງໄກຈາກສິ່ງເສບຕິດ. ສະນັ້ນ, ທາງສູນກິລາພວກເຮົາຈະຈັດການແຂ່ງຂັນປະຈໍາປິ 2018 ເຊິ່ງຈະເລີ່ມເປີດສາກໃນວັນທີ 31 ມີນາ 2018 ແລະ ຈະດໍາເນີນໄປໃຫ້ສໍາເລັດກ່ອນປີໃໝ່ລາວ. ປີນີ້ກໍເປັນອີກປີໜຶ່ງທີ່ພວກເຮົາຢາກໃຫ້ມີລາຍການແຂ່ງຂັນຂອງນັກຮຽນ ເພື່ອຫຼີກ​ເວັ້ນຈາກສິ່ງເສບຕິດ ແລະ ເພື່ອພັດທະນາກິລາລາວໄປພ້ອມໆກັນ ເຊິ່ງລາຍການນີ້ຈັດຂຶ້ນມາເປັນປີທີ 2 ແລ້ວ ເຊິ່ງປີນັ້ນຈັດແຂ່ງຂັນແບບລີກໂດຍມີ 10 ທີມເຂົ້າຮ່ວມແຂ່ງຂັນ, ແຕ່ປີນີ້ຈັດແບບທົວນາເມັ້ນ ກໍານົດເອົາ 16 ທີມເຂົ້າຮ່ວມ ກໍຄືຈັບສະຫຼາກປະກົບຄູ່ແຂ່ງຂັນ ໂດຍທີມທີ່ເສຍຈະຕົກຮອບທັນທີ ແລະ ຈະກໍານົດແຂ່ງຂັນໃນວັນເສົາ-ອາທິດ ລະຫວ່າງວັນທີ 31 ມີນາຈົນຮອດກ່ອນປີໃໝ່ລາວ.

ສໍາລັບ ການແຂ່ງຂັນບານເຕະ ເອັສຣາ ຄັບ 2018 ຈະເລີ່ມເປີດສາກນັບຕັ້ງແຕ່ວັນທີ 31 ມີນາ 2018 ໄປຈົນເຖິງກ່ອນປີໃໝ່ລາວ ທີ່ສູນກິລາເອັສຣາ ບ້ານນາສ້ຽວ ເມືອງນາຊາຍທອງ ນະຄອນຫຼວງວຽງຈັນ, ເຊິ່ງເລີ່ມເປີດຮັບສະໝັກທີມເຂົ້າຮ່ວມແຂ່ງຂັນນັບຕັ້ງແຕ່ວັນທີ 12 ມີນາ ຜ່ານມາ ໄປຈົນເຖິງວັນປິດຮັບສະໝັກທີ 24 ມີນານີ້ ໂດຍກໍານົດເອົາພຽງ 16 ທີມເທົ່ານັ້ນ. ຂະນະທີ່ ນັກກີລາທີ່ເຂົ້າຮ່ວມແຂ່ງຂັນຕ້ອງບໍ່ເກີນ 15 ປີ.

ສ່ວນເງິນລາງວັນຊະນະເລີດໄດ້ 2 ລ້ານກີບ ພ້ອມຂັນລາງວັນ ແລະ ຫຼຽນຄໍາ,​ ອັນດັບ 2 ໄດ້ເງິນລາງວັນ 1,5 ລ້ານກີບ ແລະ ອັນດັບ 3 ໄດ້ເງິນລາງວັນ 1 ລ້ານກີບ. ນອກນັ້ນ, ຍັງມີລາງວັນດາວຍິງສູງສຸດ ຈະໄດ້ຮັບເງິນ 2 ແສນກີບ ພ້ອມຂັນລາງວັນ.

- 1 1 - ເອັສຣາ ກຽມຈັດແຂ່ງຂັນບານເຕະ ນັກຮຽນຊີງຂັນ ເອັສຣາ ຄັບ 2018