ຖ່ານຂາວ ບີເຄເອັນ ກຳລັງຖືກກົດດັນດ້ານລາຄາໃນຕະຫລາດຍີປຸ່ນ
ບໍລິສັດ ບີເຄເອັນ ຈຳກັດ, ຜູ້ຜະລິດຖ່ານຂາວສົ່ງອອກລາຍໃຫຍ່ຂອງລາວ ກຳລັງຖືກກົດດັນດ້ານລາຄາໃນຕະຫລາດຍີປຸ່ນ, ເຖິງວ່າຈະຄອງຕະຫລາດນີ້ມາດົນແລ້ວກໍຕາມ, ແຕ່ຍ້ອນການແກ່ງແຍ້ງແຂ່ງຂັນຂອງຜູ້ຜະລິດຖ່ານຂາວໃນອາຊຽນ ກຳລັງບຸກເຂົ້າໄປຕະຫລາດດັ່ງກ່າວ, ພ້ອມໄດ້ຮັບນະໂຍບາຍຜ່ອນຜັນດ້ານພາສີຂາອອກຈາກປະເທດຂອງຕົນ, ແຕ່ການສົ່ງອອກຖ່ານຂາວຂອງລາວພັດໄດ້ຮັບການປະຕິບັດພັນທະຄ່າພາສີສູງ, ເຮັດໃຫ້ເກີດຄວາມເສຍປຽບໃນການແຂ່ງຂັນດ້ານລາຄາກັບບັນດາຄູ່ແຂ່ງ, ຂະນະທີ່ຢູ່ພາຍໃນປະເທດເອງ ກໍຖືກຍາດແຍ່ງທາງດ້ານວັດຖຸດິບ, ມີການເກລາຄາຊື້ສູງຂຶ້ນ, ເຮັດໃຫ້ຕົ້ນທຶນການຜະລິດກໍສູງຕາມມາ.
ທ່ານ ຄຳຕັນ ພູສີ ຮອງປະທານບໍລິສັດ ບີເຄເອັນ ຈຳກັດ ເປີດເຜີຍຕໍ່ນັກຂ່າວວ່າ: ພວກເຮົາໄດ້ຜະລິດຖ່ານຂາວສົ່ງໄປຂາຍທີ່ຕະຫລາດຍີ່ປຸ່ນມາເປັນເວລາ 14 ປີ, ປັດຈຸບັນ, ກຳລັງພົບບັນຫາໃຫຍ່ທີ່ເປັນອຸປະສັກ ແລະ ສິ່ງທ້າທາຍຕົ້ນຕໍຄື: ຢູ່ພາຍໃນໄດ້ມີນັກລົງທຶນຍີປຸ່ນ, ຫວຽດນາມ, ຈີນ, ສ.ເກົາຫລີ ມາລົງທຶນຜະລິດຖ່ານຂາວ ແລະ ສົ່ງອອກ, ບັນຫາຕາມມາຄືການຍາດແຍ່ງວັດຖຸດິບ ເຖິງບໍລິສັດຈະມີແຫລ່ງວັດຖຸດິບເປັນຂອງຕົນເອງປູກແບບມີສ່ວນຮ່ວມກັບປະຊາຊົນຕາມນະໂຍບາຍ 2+3 ມາແລ້ວກໍຕາມ, ແຕ່ຖ້າບໍລິສັດລົງທຶນຂອງຕ່າງປະເທດຫາກເກລາຄາຊື້ຫລາຍຂື້ນ, ອາດຈະເຮັດໃຫ້ມີລາຄາຕົ້ນທຶນສູງຂື້ນ.ອີກດ້ານໜຶ່ງກໍແມ່ນລະບຽບການໃນການເຄື່ອນຍ້າຍຖ່ານຍັງຜ່ານຫລາຍຂັ້ນຕອນ, ການສົ່ງອອກຍັງພົບຄວາມຫຍຸ້ງຍາກ, ມີການເກັບຄ່າຄອມມິຊັນພິເສດຕ່າງໆແລະ ຍັງແບກພາລະຄ່າອາກອນໃນລະດັບສູງເຖິງ 20% ທັງໆທີ່ເຮັດຕາມນະໂຍບາຍສົ່ງເສີມການປູກ 2+3 ຂອງລັດຖະບານ.
ຢ່າງໃດກໍຕາມ, ປັດຈຸບັນ ການແຂ່ງຂັນໃນຕະຫລາດຍີ່ປຸ່ນສູງຫລາຍ, ຍ້ອນບັນດາປະເທດໃນອາຊຽນ ເຊັ່ນ: ມຽນມ້າ, ອິນໂດເນເຊຍ, ມາເລເຊຍ ກໍຜະລິດຖ່ານຂາວເຂົ້າໄປຕະຫລາດຍີ່ປຸ່ນເຊັ່ນດຽວກັນ ແລະ ເຂົາເຈົ້າກໍໄດ້ຮັບການໂຍະຍານປະຕິບັດພາສີຂາອອກຕ່ຳກວ່າເຮົາ, ຈຶ່ງມີຄວາມສາມາດແຂ່ງຂັນຕະຫລາດສູງ ແລະ ມີທ່າໄດ້ປຽບໃນຕະຫລາດຍີ່ປຸ່ນ.
