ວິທີກຳຈັດຄວາມຂີ້ຢ້ານ

1. ໃຫ້ຄຸນຄ່າຄວາມກ້າຫານຫລາຍກ່ວາຄວາມຮູ້ສຶກປອດໄພ : ມີຜົນແບບທົດສອບຫລາຍເທື່ອລະບຸອອກມາວ່າຄົນສ່ວນຫລາຍໃຫ້ຄວາມສຳຄັນກັບຄວາມຮູ້ສຶກປອດໄພຫລາຍກ່ວາທຸກສິ່ງທຸກຢ່າງທີ່ເຂົາຕ້ອງການ ຫລື ເອີ້ນງ່າຍໆວ່າ Play safe ໄວ້ສະເໝີ ເຊິ່ງມັນເຮັດໃຫ້ພວກເຂົາມີຊີວິດຢູ່ລອດໄປແຕ່ລະມື້, ແຕ່ມັນບໍ່ໄດ້ເອີ້ນວ່າ ກຳລັງໃຊ້ຊີວິດ, ຄົນເຮົາທົນໄດ້ກັບການເຮັດວຽກທີ່ບໍ່ມັກ, ຊີວິດການແຕ່ງດອງທີ່ຄວນຈະຈົບໄດ້ແລ້ວ ແລະ ນິໄສບໍ່ດີທັງຫລາຍທີ່ກຳລັງທຳລາຍຊີວິດພວກເຂົາຢ່າງຊ້າໆ ເຊິ່ງມັນເຮັດໃຫ້ພວກເຂົາຮູ້ສຶກວ່າ ປອດໄພ ແລະ ຮັບໄດ້, ແຕ່ຖາມແທ້ໆວ່າເກີດມາທັງເທື່ອ ຕ້ອງການພຽງເທົ່ານີ້ບໍ່ ?

ດ່ານທຳອິດຂອງການເອົາຊະນະຄວາມຢ້ານກໍຄື : ທ່ານຕ້ອງປົດແອກຄວາມຮູ້ສຶກປອດໄພທັງຫລາຍອອກໄປໃຫ້ໝົດກ່ອນ ເພາະມັນແມ່ນສິ່ງທຳອິດທີ່ຂັດຂວາງທ່ານອອກຈາກຊີວິດທີ່ທ່ານປາຖະໜາຢາກໄດ້ຢາກມີແທ້ໆ ຈາກນັ້ນ ແທນບ່ອນມັນໂດຍຄວາມກ້າຫານ ທ່ານຕ້ອງຕັດສິນໃຈວ່າອັນໃດມັນສຳຄັນຫລາຍກ່ວາກັນ ຊີວິດທີ່ຢູ່ລອດໄປແຕ່ລະມື້ ແຕ່ບໍ່ມີຄວາມໝາຍ ມັນເຮັດໃຫ້ທ່ານສະບາຍໃຈກໍແມ່ນ ທ່ານຮູ້ສຶກວ່າຮັບໄດ້ກັບດ້ານສະດວກສະບາຍຂອງທ່ານ, ແຕ່ວ່າເກີດມາແລ້ວ ທ່ານກໍບໍ່ຄວນຈະຕ້ອງການພຽງເທົ່ານັ້ນແມ່ນບໍ່.

2. ໄຈ້ແຍກຄຳວ່າຢ້ານກັບຄວາມລະມັດລະວັງໃຫ້ອອກ : ຄວາມຢ້ານສ່ວນຫລາຍມັກບໍ່ມີເຫດຜົນ ເຊັ່ນ : ທ່ານຢ້ານການໂທ ຫາບຸກຄົນສຳຄັນທີ່ອາດຈະຊ່ວຍຊີວິດບໍລິສັດຂອງທ່ານໄດ້ ພຽງແຕ່ທ່ານບໍ່ກ້າພະເຊີນໜ້າກັບອະດີດທີ່ທ່ານເຄີຍເຮັດມັນ ແລະ ທ່ານລົ້ມເຫລວ, ທ່ານຢ້ານມັນຈະເກີດຂຶ້ນອີກ ຈຶ່ງເລືອກທີ່ຈະບໍ່ເຮັດຫຍັງເລີຍ ຫລືວ່າທ່ານອາດຈະຢ້ານຈົນເກີນໄປທີ່ຈະລາອອກຈາກວຽກປະຈຳມາເຮັດທຸລະກິດຂອງໂຕເອງ ເພາະທ່ານບໍ່ໝັ້ນໃຈວ່າມັນຈະສຳເລັດບໍ່ ? ມັນຈະເກີດຫຍັງຂຶ້ນແດ່ ? ບາງເທື່ອມັນກໍສົມຄວນທີ່ຈະຢ້ານ, ແຕ່ຄົນເຮົາຫລາຍຄົນໄຈ້ແຍກຄວາມຢ້ານກັບຄວາມລະມັດລະວັງບໍ່ໄດ້.

ຍົກໂຕຢ່າງວ່າ : ທ່ານຢ້ານການຂັບລົດໄວເພາະອາດເກີດອຸປະຕິເຫດໄດ້ ຫລື ທ່ານຢ້ານຖືກຈັບຕິດຄຸກ ຖ້າເຮັດທຸລະກິດຄ້າຂາຍສິ່ງທີ່ຜິດກົດໝາຍ ເຊິ່ງຄວາມຢ້ານແບບນີ້ເປັນສິ່ງທີ່ດີ ມັນແມ່ນການລະມັດວະລັງ, ການມີຄວາມຮອບຄອບຕໍ່ຊີວິດ ແລະ ຊັບສິນ ມັນສົມຄວນແລ້ວທີ່ຈະຢ້ານ, ແຕ່ຄວາມຢ້ານທີ່ບໍ່ມີເຫດຜົນແມ່ນການບໍ່ມີຄວາມກ້າທີ່ຈະເຮັດສິ່ງທີ່ຫົວໃຈຮຽກຮ້ອງຢາກເຮັດ, ເຮັດສິ່ງທີ່ມັນຈະດີກັບອະນາຄົດໂຕເອງ ບັນດາຄົນທີ່ປະສົບຄວາມສຳເລັດເຂົາກໍມີຄວາມຢ້ານ ພຽງແຕ່ເຂົາເລືອກທີ່ຈະເຮັດສິ່ງທີ່ຢ້ານ ແລະ ເຮັດຢ່າງຮອບຄອບເທົ່ານັ້ນ.

3. ເອົາຊະນະຄວາມຢ້ານໂດຍການລົງມືປະຕິບັດ : ຖ້າຄວາມຢ້ານຂອງທ່ານແມ່ນສິ່ງທີ່ເກີນການຄວບຄຸມ ບໍ່ວ່າຈະແມ່ນເສດ ຖະກິດ, ໄພທຳມະຊາດ, ລອງຈຳລອງເຫດການວ່າຖ້າມັນຈະເກີດຂຶ້ນກັບໂຕທ່ານ ຫລື ວຽກຂອງທ່ານ ມັນຈະເປັນແນວໃດ ແລະ ຂຽນແຜນການຮອງຮັບວ່າທ່ານຈະສາມາດເຮັດຫຍັງໄດ້ແດ່ຖ້າມັນເກີດຂຶ້ນແທ້ໆ, ຂຽນວິທີຮັບມືກັບມັນຫລາຍໆແບບ ຫລັງຈາກນັ້ນລອງເບິ່ງວ່າທ່ານຍັງຢ້ານຢູ່ຫລືບໍ່.

ປົກກະຕິແລ້ວຄວາມຢ້ານຈະຫລຸດລົງຍ້ອນມັນເຮັດໃຫ້ເຮົາພໍເຫັນພາບແລ້ວວ່າສະຖານະການຈະເປັນແນວໃດ ແລະ ຍິ່ງມີວິທີແກ້ໄຂບັນຫາຮອງຮັບຄ່າວໆກໍຈະຍິ່ງຊ່ວຍໃຫ້ຫລຸດຄວາມເຄັ່ງຄຽດໄດ້ແດ່ ເມື່ອຂຽນແລ້ວກໍບໍ່ຕ້ອງໄປຈົດຈໍ່ກັບມັນ, ປ່ອຍວາງມັນໄປແດ່, ບໍ່ຈຳເປັນຕ້ອງກັງວົນອີກຕໍ່ໄປ, ແຕ່ຖ້າຄວາມຢ້ານຂອງທ່ານມາຈາກການຢ້ານຈະລົງມືເຮັດບາງສິ່ງ ແລະ ເລືອກທີ່ຈະເລື່ອນມື້ນັ້ນມື້ນີ້ໄປເລື້ອຍໆ ຄວາມຢ້ານແບບນີ້ມາຈາກສະພາບຈິດໃຈໃຕ້ສຳນິກທີ່ຢ້ານການປ່ຽນແປງ.

ວິທີງ່າຍໆ ແລະ ໄວທີ່ສຸດທີ່ຈະຈັດການກັບມັນກໍຄື ລົງມືເຮັດມັນຕອນນີ້ເລີຍ ຢ່າຟ້າວອ່ານຫົວຂໍ້ຖັດໄປ ຫາກທ່ານຍັງມີສິ່ງທີ່ຍັງຄ້າງຄາຢູ່, ລົງມືເຮັດໃນເວລານີ້ ຂະນະທີ່ທ່ານກຳລັງອ່ານບົດຄວາມນີ້ຍິ່ງດີ ຖ້າມັນຈຳເປັນຕ້ອງຕິດຕໍ່ໃຜກໍເຮັດໃນຕອນນີ້ເລີຍ ບໍ່ຕ້ອງລໍຖ້າ.

4. ປ່ຽນຄວາາມຢ້ານໃຫ້ເປັນຄວາມຕື່ນເຕັ້ນແທນ : ລອງນຶກເຖິງຕອນທີ່ຫລິ້ນເຄື່ອງຫລິ້ນເປັນຕາຕົກໃຈເທື່ອທຳອິດຢູ່ສວນເດັກຫລິ້ນ ພຽງແຕ່ຢືນກໍເຮັດໃຫ້ເກືອບຍ່ຽວເຮ່ຍແລ້ວ, ແຕ່ເຖິງຈະຢ້ານ ທ່ານກໍເລືອກທີ່ຈະລອງ ເພາະມັນເບິ່ງເປັນຕາມ່ວນຄືກັນ ແລະ ເມື່ອຫລິ້ນແລ້ວ ທ່ານອາດຈະວິນຫົວປວດຮາກ ຫລື ຫລາບ, ແຕ່ເລິກໆກໍພູມໃຈໃນໂຕເອງວ່າທ່ານກໍກ້າລອງເຮັດມັນແມ່ນບໍ່ ?
5. ແຊກແຊງຄວາມຄິດໂຕເອງ : ເຖິງວ່າວິທີນີ້ຈະໃຊ້ບໍ່ໄດ້ກັບທຸກເລື່ອງ ແຕ່ມັນໃຊ້ໄດ້ຜົນຫລາຍກັບຄວາມຢ້ານໃນເຫດການທີ່ກຳລັງພະເຊີນຢູ່ ເຊັ່ນ : ຄວາມຢ້ານ ແລະ ກັງວົນໃນຂະນະທີ່ລໍຖ້າສຳພາດວຽກ ຫລື ຄວາມຢ້ານລະຫ່ວາງການໄປປິ່ນປົວແຂ້ວ ເຊິ່ງຖ້າເມື່ອໃດພົບກັບຄວາມຢ້ານ ໃຫ້ທ່ານແຊກແຊງຄວາມຄິດໂຕເອງ ໂດຍການຄິດເລື່ອງອື່ນໆ ເຊັ່ນ : ທ່ານອາດຄິດເຖິງຕອນທີ່ກຳລັງຫລິ້ນກັບແມວຢູ່ເຮືອນລະຫ່ວາງທີ່ທ່ານໝໍກຳລັງປົວແຂ້ວທ່ານ ເຊິ່ງເປັນບັນຍາກາດທີ່ໜ້າຢ້ານທີ່ສຸດ (ຫາຍາກຄົນທີ່ບໍ່ຢ້ານທ່ານໝໍປົວແຂ້ວ) ການຄິດເຖິງການຫລິ້ນກັບແມວຈະເຮັດໃຫ້ຫລຸດຄວາມກັງວົນໄດ້ຫລາຍ ເພາະຈິດທ່ານບໍ່ຈົດຈໍ່ກັບເຫດການທີ່ຢ້ານອີກຕໍ່ໄປ ຫລື ລະຫ່ວາງລໍຖ້າສຳພາດວຽກ ທຸກຄົນຍ່ອມຕື່ນເຕັ້ນ ຢ້ານ ແລະ ກັງວົນບໍ່ຮູ້ວ່າຄົນສຳພາດເຮົາຈະເປັນໃຜ, ຈະໂຫດປານໃດ, ເຮົາຈະເວົ້າຫຍັງໂງ່ໆອອກໄປຫລືບໍ່, ເຮົາຈະໄດ້ວຽກເຮັດຫລືບໍ່ ? ເຊິ່ງຄວາມຢ້ານແບບນີ້ມີແຕ່ເຮັດໃຫ້ເຮົາຮູ້ສຶກ ບໍ່ດີຫລາຍຂຶ້ນກ່ວາເກົ່າ ແລະ ມີທ່າອ່ຽງສູງຫລາຍທີ່ຈະເຮັດໃຫ້ເຮົາສຳພາດວຽກໄດ້ບໍ່ດີ ດັ່ງນັ້ນມັນຈະບໍ່ດີກ່ວາບໍ່ທີ່ຈະໃຊ້ເວລາໄລຍະນີ້ຄິດເຖິງເລື່ອງອື່ນໄປກ່ອນ ອາດຈະນັບເລກ 1 – 1.000 ໃນໃຈກໍໄດ້ ເຊິ່ງເປັນການໃຊ້ສະໝອງດ້ານຄວາມຄິດແທນ ເຊິ່ງສະໝອງດ້ານອາລົມກໍຈະເຮັດວຽກໜ້ອຍລົງ,  ຄວາມຢ້ານກໍຈະຫລຸດລົງໄປນຳ.