ນວດໂຕລູກນ້ອຍ ຊ່ວຍລູກນ້ອຍສະບາຍໂຕພ້ອມສົ່ງຄວາມຮັກຜ່ານການສໍາຜັດ

ແມ່ຮູ້ບໍວ່າ ການນວດໂຕລູກນ້ອຍເກີດໃໝ່ ຈະເຮັດໃຫ້ລູກຮູ້ສຶກຜ່ອນຄາຍ ແລະ ມີຄວາມສຸກຫຼາຍຂຶ້ນ ແລະຍັງເປັນການສົ່ງຄວາມຮັກຈາກແມ່ສູ່ລູກຜ່ານການສໍາຜັດອີກດ້ວຍ ຊຶ່ງເປັນອີກສິ່ງໜຶ່ງທີ່ແມ່ລູກອ່ອນບໍ່ຄວນເບິ່ງຂ້າມເດັດຂາດ ໂດຍມື້ນີ້ຈະມີວິທີການນວດໂຕລູກທີ່ເໝາະສົມກັບເດັກເກີດໃໝ່ມາຝາກ.

ຈະມີວິທີການນວດແນວໃດ ແລະ ມີຂໍ້ດີແນວໃດແດ່

• ວິທີງ່າຍໆ ນວດໂຕລູກນ້ອຍເກີດໃໝ່

1. ເລືອກນໍ້າມັນນວດໂຕລູກ: ອັນດັບທໍາອິດຕ້ອງເລືອກນໍ້າມັນໃຫ້ເໝາະກັບການໃຊ້ນວດໂຕລູກກ່ອນ ໂດຍສ່ວນໃຫຍ່ຈະນິຍົມໃຊ້ນໍ້າມັນໝາກກອກ ເພາະອຸດົມໄປດ້ວຍວິຕາມິນ ແລະ ຄຸນປະໂຫຍດຫຼວງຫຼາຍ ຊຶ່ງຈະຊ່ວຍໃຫ້ລູກນ້ອຍຮູ້ສຶກຜ່ອນຄາຍ ແລະ ນອນຫຼັບສະບາຍຫຼາຍຂຶ້ນ ແລະຍັງມີສ່ວນຊ່ວຍໃນການບໍາລຸງກະດູກ ແລະ ກ້າມຊີ້ນໃຫ້ແຂງແຮງອີກດ້ວຍ ທີ່ສໍາຄັນປອດໄພຕໍ່ຕົວລູກແນ່ນອນ.
2. ເລີ່ມນວດຕາມສ່ວນຕ່າງໆ ເທື່ອລະຈຸດ

• ຂາ: ການນວດຂາຂອງລູກນ້ອຍ ໃຫ້ແມ່ໃຊ້ມືຂ້າງໜຶ່ງຈັບຂໍ້ແຄ່ງຂອງລູກໄວ້ແລ້ວໃຊ້ມືອີກເບື້ອງໜຶ່ງນວດຮອບໆຂາຄ່ອຍໆ ໂດຍນວດຕັ້ງແຕ່ຂາມາຍັງຂໍ້ແຄ່ງນວດຊໍ້າໆສະຫຼັບກັນກັບຂາທັງສອງຂ້າງ.
• ຕີນ: ການນວດຕີນໃຫ້ມືຂ້າງໜຶ່ງຈັບຂໍ້ຕີນຂອງລູກໄວ້ ສ່ວນມືອີກເບື້ອງໜຶ່ງໃຫ້ໃຊ້ນວດຄ່ອຍໆ ໂດຍເອົານິ້ວມືກາງໄວ້ກ້ອງຝາຕີນ ສ່ວນນິ້ວໂປ້ມືກໍກົດລົງເທິງຕີນ ໄລ່ແຕ່ປາຍນິ້ວໄປຈົນເຖິງຂໍ້ຕີນ ແລະ ຢ່າງລືມບີບນິ້ວຕີນຂອງລູກຢ່າງອ່ອນໂຍນດ້ວຍ.
• ທ້ອງ: ການນວດທ້ອງ ບໍ່ພຽງແຕ່ຈະເຮັດໃຫ້ລູກຜ່ອນຄາຍຫຼາຍຂຶ້ນເທົ່ານັ້ນ ແຕ່ຍັງຊ່ວຍໃຫ້ລະບົບຍ່ອຍອາຫານເຮັດວຽກໄດ້ດີກວ່າເກົ່າອີກດ້ວຍ, ໂດຍໃຫ້ແມ່ໃຊ້ມືທັງສອງເບື້ອງສໍາຜັດກັບໜ້າທ້ອງຂອງລູກ ແລ້ວລູບຢ່າງແຜ່ວເບົາທີ່ສຸດ.
• ຫຼັງ: ສໍາຫຼັບຈຸດສຸດທ້າຍພາດບໍ່ໄດ້ເລີຍ ກໍຄືຫຼັງຂອງລູກນ້ອຍນັ້ນເອງ ໂດຍການນວດຫຼັງໃຫ້ແມ່ອຸ້ມລູກແບບແນບຊິດກັບເອິກ, ອີກມືໜຶ່ງຄ່ອຍໆລູບຫຼັງຂອງລູກຕັ້ງແຕ່ບໍລິເວນຄໍ ໄປຈົນເຖິງກົ້ນ ແລະ ນວດຊໍ້າເລື່ອຍໆ.
• ຮູ້ກ່ອນນວດໂຕລູກ
• ນວດໂຕລູກ ຕ້ອງເບິ່ງເວລາທີ່ເໝາະສົມ ຄືບໍ່ຄວນນວດຫຼັງຈາກທີ່ລູກກິນນົມຫາອຶ່ມ, ເມື່ອລູກບໍ່ສະບາຍ, ຫຼັງຊັກຢາ ຫຼືລູກກໍາລັງອາລົມບໍ່ດີ
• ນໍ້າມັນນວນ ຕ້້ອງເປັນນໍ້າມັນທີ່ປອດໄພສໍາລັບເດັກ ບໍ່ຄວນໃຊ້ນໍ້າມັນຫອມລະເຫີຍໃນການນວດຕົວລູກເດັດຂາດ.
• ການນວດມີປະໂຫຍດຫຼາຍກວ່າທີ່ຄິດ ໂດຍນອກຈາກຈະເຮັດໃຫ້ລູກຜ່ອນຄາຍແລ້ວ ຍັງຊ່ວຍເພີ່ມຄວາມຍືດຫຍຸ່ນໃຫ້ກັບຂໍ້ຕໍ່, ກະຕຸ້ນການໄຫຼວຽນຂອງເລືອດ, ເພີ່ມຄວາມແຂງແຂງໃຫ້ກັບກ້າມຊີ້ນແລະ ຍັງເຮັດໃຫ້ລູກຮູ້ສຶກອົບອຸ່ນ ປອດໄພອີກດ້ວຍ.