ທ່ານ ປູຕິນ ຊະນະເລືອກຕັ້ງຢ່າງຫລວງຫລາຍ ດຳລົງຕຳແໜ່ງຜູ້ນຳຣັດເຊຍເປັນສະໄໝທີ 4
March 19, 2018 - 11:21 AM
ປະທານາທິບໍດີ ວະລາດິເມຍ ປູຕິນ ສ້າງປະຫວັດສາດເປັນຜູ້ນຳຣັດເຊຍສະໄໝທີ 4 ຫລັງໄດ້ຮັບໄຊຊະນະໃນການເລືອກຕັ້ງວັນທີ 18 ມີນາ ດ້ວຍຄະແນນສຽງສະໜັບສະໜູນຫລວງຫລາຍ 76%.
ສຳນັກຂ່າວຕ່າງປະເທດລາຍງານຈາກນະຄອນຫລວງມົດສະກູ ໃນວັນທີ 19 ມີນາວ່າ: ຜົນບໍ່ເປັນທາງການຂອງການເລືອກຕັ້ງປະທານາທິບໍດີຣັດເຊຍ ເຊິ່ງມີຂຶ້ນໃນວັນທີ 18 ມີນາ ປາກົດວ່າປະທານາທິບໍດີ ວະລາດິເມຍ ປູຕິນ ຜູ້ສະໝັກອິດສະຫລະແຕ່ໄດ້ຮັບການສະໜັບສະໜູນຈາກພັກຢູໄນເຕັດ ຣັດເຊຍ ຂອງນາຍົກລັດຖະມົນຕີ ດີມີຕຣີ ເມດເວເດຟ ແລະ ກຸ່ມການເມືອງໃນນາມ “ແນວຮ່ວມປະຊາຊົນຣັດເຊຍທັງມວນ” (ONF) ຊະນະການເລືອກຕັ້ງຢ່າງຫລວງຫລາຍ ດ້ວຍຄະແນນສຽງສະໜັບສະໜູນປະມານ 76,5%.
