ທ່ານ ດູເຕີເຕ ຮຽກຮ້ອງບັນດາປະເທດ ລາອອກຈາກສານອາຍາສາກົນ

ປະທານາທິບໍດີ​ຟີ​ລິບ​ປິນກ່າວ​ຮຽກຮ້ອງ​ໃຫ້​ທຸກ​ປະ​ເທດ​ລາ​ອອກ​ຈາກ​ການ​ເປັນ​ສະມາຊິກ​ສານ​ອາຍາ​ສາກົນ ​ເຊິ່ງ​ເປັນ​ສະ​ຖາ​ບັນ​ທີ່​ບໍ່​ໄດ້​ມອບ​ຄວາມ​ຍຸຕິ​ທຳ​ໃຫ້​ກັບ​ທຸກ​ຄົນ.

ສຳນັກ​ຂ່າວ​ຕ່າງປະ​ເທດ​ລາຍ​ງານ​ຈາກ​ນະຄອນຫລວງ​ມະນິລາ ປະ​ເທດ​ຟີ​ລິບ​ປິນ ​ໃນ​ວັນ​ທີ 19 ມີນາ​ວ່າ: ປະທານາທິບໍດີ ​ໂຣດຣິ​ໂກ ດູ​ເຕີ​ເຕີ ກ່າວ​ໃນ​ວັນ​ທີ 18 ມີນາ​ວ່າ: ທ່ານ​ຂໍ​ຮຽກຮ້ອງ​ໃຫ້​ລັດ​ທຸກ​ແຫ່ງ​ໃນ​ໂລກ​ທີ່​ຮ່ວມ​ພາຄີ​ລັດຖະທຳ​ມະນູນ​ນະຄອນຫລວງ​ໂຣມ ​ເຊິ່ງ​ເປັນ​ສົນທິສັນຍາ​ສາກົນ​ວ່າ​ດ້ວຍ​ການຈັດຕັ້ງສານ​ອາຍາ​ສາກົນ (ICC) ລາ​ອອກ​ຈາກ​ການ​ຮ່ວມ​ສົນທິສັນຍາ​ສະບັບ​ດັ່ງກ່າວ ​ເນື່ອງ​ຈາກ​ສານ​ອາຍາ​ສາກົນ​ບໍ່​ແມ່ນ​ສານ​ຍຸຕິ​ທຳ​ສຳລັບທຸກ​ຄົນ ​ແລະ ລັດຖະທຳ​ມະນູນ​ນະຄອນຫລວງ​ໂຣມກໍ​ຄື EU ທີ່​ມີ​ອະຄະຕິ​ທາງ​ສີ​ຜິວ.

ທັງ​ນີ້, ທຳນຽບມາລາ​ກັນ​ຍັງ​ປະກາດ​ໃນ​ອາທິດ​ຜ່ານ​ມາວ່າ: ທ່ານ ດູ​ເຕີ​ເຕ ​ໄດ້​ລົງ​ນາມ​ໃນ​ໜັງສື​ລາ​ອອກ​ຈາກ​ການ​ເປັນ​ລັດ​ພາຄີ​ລັດຖະທຳ​ມະນູນ​ນະຄອນຫລວງ​ໂຣມ ​ແລະ ຍື່ນ​ຕໍ່​ທ່ານ ອັນ​ໂຕ​ນິ​ໂອ ກູ​ເຕີ​ເຣສ ​ເລຂາທິການສະຫະ​ປະຊາ​ຊາດ (UN) ​ເປັນ​ທີ່​ຮຽບຮ້ອຍ​​ແລ້ວ. ຂະນະ​ທີ່ ICC ​ເຊິ່ງມີ​ສຳນັກງານ​ໃຫຍ່​ຢູ່​ນະຄອນຫລວງ​ເຮ​ກ ​ໃນ​ໂຮ​ນລັງ ອອກ​ຖະ​ແຫລ​ງການ​ຮຽກຮ້ອງ​ໃຫ້​ລັດຖະບານ​ມະນິລາ​ທົບ​ທວນ​ການ​ຕັດສິນ​ໃຈ​ທີ່​ເກີດ​ຂຶ້ນ​ໃນ​ວາລະ​ຄົບຮອບ 20 ປີ ຂອງ​ລັດຖະທຳ​ມະນູນ​ນະຄອນຫລວງ​ໂຣມ ​ເຊິ່ງລັດ​ພາຄີ 139 ​ແຫ່ງ ຮ່ວມ​ກັນ​ລົງ​ນາມ​ຮັບຮອງ​ໃນ​ວັນ​ທີ 17 ກໍລະກົດ 1998 ກ່ອນ​ມີ​ຜົນ​ບັງຄັບ​ໃຊ້​ໃນ​ວັນ​ທີ 1 ກໍລະກົດ 2002.