ສະຖາບັນພັດທະນາສີມືແຮງງານລາວ-ເກົາຫລີ ຍົກລະດັບມາດຕະຖານສີມືແຮງງານ

ໃນວັນທີ 19 ມີນານີ້, ທີ່ສະຖາບັນພັດທະນາສີມືແຮງງານລາວ-ເກົາຫລີ, ກົມພັດພັດທະນາສີມືແຮງງານ ແລະ ຈັດຫາງານກະຊວງແຮງງານ ແລະ ສະຫວັດດີການສັງຄົມຮ່ວມກັບສະຖາບັນພັດທະນາສີມືແຮງງານລາວ-ເກົາຫລີ, ໄດ້ຈັດຊຸດຝຶກອົບຮົມ ​ແລະ ພັດທະນາສີມືແຮງງານ​ໃຫ້​ແຮງ​ງານ​ຜູ້​ທີ່​ມີ​ຄວາມ​ຊຳ​ນານ, ​ແຕ່​ບໍ່​ໄດ້​ຜ່ານ​ການ​ຝຶກ​ມາ​ກ່ອນໃນສາຂາອາຊີບເຄື່ອງເຢັນ(​ແອ​ເຮືອນ) ພາຍໃຕ້ໂຄງການພັດທະນາສີມືແຮງງານ​ໃຫ້​ມີ​ຄຸນ​ນະພາ​ບຕາມມາດຕະຖານ ແລະ ການສ້າງມາດຕະຖານສີມືແຮງງານແຫ່ງຊາດເພື່ອການເຊື່ອມໂຍງປີ 2017, ໂດຍມີທ່ານ ອິນແປງ ແພງລືໄຊ ຮອງສະຖາບັນພັດທະນາສີມືແຮງງານລາວ-ເກົາຫລີ ແລະ ຜູ້ຕາງໜ້າກົມພັດພັດທະນາສີມືແຮງງານ ແລະ ຈັດຫາງານພາກລັດ ແລະ ເອກະຊົນ, ພ້ອມດ້ວຍຄູອາຈານ ​ແລະ ນັກຝືກອົບຮົມເຂົ້າຮ່ວມຈໍານວນຫລາຍ.

ຊຸດຝຶກອົບຮົມຄັ້ງນີ້, ​ເພື່ອພັດທະນາສີມືແຮງງານລາວໃຫ້ມີທັງປະລິມານ ແລະ ຄຸນນະພາບ, ເຊິ່ງລັດຖະບານໄດ້ມອບໃຫ້ກະຊວງແຮງງານ ແລະ ສະຫວັດດີການສັງຄົມຮັບພິຊອບໃນການສ້າງມາດຕະຖານສີມືແຮງງານແຫ່ງຊາດ ເພື່ອໃຫ້ເຊື່ອມໂຍງກັບອາຊຽນ, ຊຶ່ງຈະດຳເນີນໄປເປັນເວລາ 5 ວັນຈິ່ງສໍາເລັດ.