ເປີດບໍລິສັດທີເຄໄອປະກັນໄພ ແລະ ປະກັນຊີວິດ
ເມື່ອທ້າຍອາທິດຜ່ານມາ, ໄດ້ມີພິທີເປີດບໍລິສັດປະກັນໄພ ແລະ ປະກັນຊີວິດທີເຄໄອ ຈຳກັດ ຢູ່ນະຄອນຫລວງວຽງຈັນ, ໂດຍການໃຫ້ກຽດເຂົ້າຮ່ວມຂອງທ່ານນາງ ປານີ ຢາທໍ່ຕູ້, ພ້ອມດ້ວຍແຂກຖືກເຊີນທັງພາຍໃນ ແລະ ຕ່າງປະເທດ ເຂົ້າຮ່ວມຈໍານວນຫລາຍ.
ທ່ານນາງ ສີພອນຄຳ ດວງດາລາ ປະທານບໍລິສັດທີເຄໄອ ກ່າວວ່າ: ບໍລິສັດ ຂອງຕົນໄດ້ເລີ່ມດໍາເນີນທຸລະກິດມາແຕ່ເດືອນຕຸລາ 2017, ເຊິ່ງມີທຶນຈົດທະ
ບຽນທັງໝົດ 16 ຕື້ກີບ, ປະກອບຜະລິດຕະພັນຄື: ບໍລິການດ້ານປະກັນຊີວິດແບບສາມັນ, ປະກັນຊີວິດແບບເປັນກຸ່ມ ແລະ ປະກັນອຸປະຕິເຫດ, ເຊິ່ງມີຄວາມມຸ້ງໝັ້ນຈະໃຫ້ເປັນບໍລິສັດປະກັນຊີວິດຊັ້ນນຳທີ່ມີມາດຕະຖານສາກົນ ແລະ ເນັ້ນການໃຫ້ບໍລິການຕ່າງໆ ເພື່ອຕອບສະໜອງຄວາມຕ້ອງການຂອງລູກຄ້າ, ຕົວແທນ ແລະ ພະນັກງານດ້ວຍຄວາມສັດຊື່ ແລະ ຈະໃຫ້ຄວາມສຳຄັນກັບກິດຈະກຳທີ່ສ້າງປະໂຫຍດແກ່ສັງຄົມເພື່ອທຸລະກິດທີ່ຍືນຍົງ. ສ່ວນບໍລິສັດປະກັນໄພທົ່ວໄປຈຳກັດ, ເຊິ່ງມີທຶນຈົດທະບຽນທັງໝົດ 16 ຕື້ກີບເຊັ່ນກັນ, ແມ່ນຈະເນັ້ນໃຫ້ບໍລິການຮັບປະກັນກຸ່ມທຸລະກິດ, ອົງກອນ ຫລື ກຸ່ມລູກຄ້າລາຍຍ່ອຍໃນຫລາກຫລາຍຮູບແບບປະກັນໄພ ເຊັ່ນ: ປະກັນໄພລົດ, ປະກັນໄພອຸປະຕິເຫດສ່ວນບຸກຄົນ, ປະກັນໄພອັກຄີໄພ, ປະກັນໄພຂົນສົ່ງທົ່ວໄປ ແລະ ບໍລິການ ອື່ນໆ.
ບໍລິສັດປະກັນໄພ ແລະ ປະກັນຊີວິດທີເຄໄອ ຈຳກັດ, ເປັນການຮ່ວມທຶນລະຫວ່າງບໍລິສັດທີເຄກຣຸບຂອງລາວກັບບໍລິສັດຈາກປະເທດໄທ ເຊັ່ນ: ບໍລິສັດ ນະວະກິດ ປະກັນໄພ ຈຳກັດມະຫາຊົນ, ບໍລິສັດໄທຣີ ປະກັນຊີວິດ ຈຳກັດມະຊົນ ແລະ ບໍລິສັດ ຟອນຄອນ ປະກັນໄພຈຳກັດ ເພື່ອສ້າງຄວາມເຂັ້ມແຂງທາງດ້ານການເງິນ ແລະ ສ້າງຄວາມຮັບປະກັນດ້ານບໍລິການປະກັນໄພໃຫ້ແກ່ສັງຄົມລາວໄດ້ຢ່າງໝັ້ນໃຈ.
