ກະຊວງປ້ອງກັນປະເທດມອບລາງວັນໃຫ້ຜູ້ຊະນະການປະດິດແຕ່ງບົດເພງ, ບົດປະພັນ ແລະ ພາບຖ່າຍສະຫລອງປີສາມັກຄີລາວ-ຫວຽດນາມ.
ກະຊວງປ້ອງກັນປະເທດໄດ້ຈັດພິທີມອບລາງວັນໃຫ້ຜູ້ຊະນະເລີດການປະກວດປະດິດແຕ່ງບົດເພງ, ບົດປະພັນ, ຮູບແຕ້ມ ແລະ ພາບຖ່າຍດີເດັ່ນ, ໃນໂອກາດການສະເຫລີມສະຫລອງປີສາມັກຄີມິດຕະພາບລາວ-ຫວຽດນາມ 2017 ຢູ່ ສປປ ລາວ ໃນຫົວຂໍ້: “ສາຍສຳພັນລາວ-ຫວຽດນາມ”, ເຊິ່ງພິທີດັ່ງກ່າວຈັດຂື້ນໃນວັນທີ 20 ມີນານີ້, ໂດຍການເຂົ້າຮ່ວມຂອງສະຫາຍພົນໂທ ຫງວຽນ ຈອງ ເຫງຍ ກຳມະການສູນກາງພັກກອມມູນິດຫວຽດນາມ, ຮອງຫົວໜ້າກົມໃຫຍ່ການເມືອງກອງທັບປະຊາຊົນຫວຽດນາມ, ສະຫາຍພົນຈັດຕະວາ ວັນທອງ ກອງມະນີ ຄະນະພັກກະຊວງປ້ອງກັນປະເທດ, ຮອງຫົວໜ້າກົມໃຫຍ່ການເມືອງ ກອງທັບປະຊາຊົນລາວ, ພ້ອມດ້ວຍນາຍ ແລະ ພົນທະຫານ, ຄະນະຮັບຜິດຊອບການແຂ່ງຂັນຂອງລາວ ແລະ ຫວຽດນາມເຂົ້າຮ່ວມຢ່າງພ້ອມພຽງ.
ສຳລັບຜູ້ຊະນະເລີດປະເພດພາບຖ່າຍກ່ຽວກັບ: “ການປັກຫລັກໝາຍຊາຍແດນລາວ-ຫວຽດນາມເຂດແຂວງອັດຕະປື ແລະ ແຂວງກອນຕູມຫວຽດນາມປີ1976”, ໂດຍທ່ານ ບຸນມາ ອິນຕາວັນ ຈາກວາລະສານປ້ອງກັນຊາດ, ປະເພດບົດເພງທີ່ຊະນະເລີດມີຊື່ວ່າ: “ມິດຕະພາບທີ່ຍິ່ງໃຫຍ່” ໂດຍ ສາຍແກ້ວ ຫລ້າສິມາ ຈາກວິທະຍຸ ແລະ ໂທລະພາບກອງທັບປະຊາຊົນລາວ, ປະເພດຮູບແຕ້ມ ຊະນະເລີດແມ່ນ “ສະໝໍລະພູມຮົບລາວ-ຫວຽດນາມ” ຈາກ ພອນປະເສີດ ລິນທະວົງ ກອງພົນທະຫານຮາບທີ 2 ແລະ ປະເພດກາບກອນຊະນະເລີດແມ່ນ “ຫອມແຜ່ນດິນບໍ່ຫາຍ ຫອມສະຫາຍລາວ-ຫວຽດນາມ” ຈາກບົດປະພັນຂອງ ພະອາຈານ ບຸດສາຍຂອງ ຄອງຜ້າເຫລືອງ ຢູ່ວັດປ່າໜອງບົວທອງ.
ສະຫາຍພົນຈັດຕະວາ ວັນທອງ ກອງມະນີ ກ່າວວ່າ: ການຈັດພິທີມອບລາງວັນໃນຄັ້ງນີ້, ແມ່ນຢູ່ໃນກິ່ນອາຍທີ່ສອງພັກ, ສອງລັດ, ສອງກອງທັບ ແລະ ປະຊາຊົນສອງຊາດລາວ-ຫວຽດນາມ ພວມໄດ້ເອກອ້າງທະນົງໃຈເປັນຢ່າງຍິ່ງຕໍ່ຜົນສຳເລັດການຈັດຕັ້ງເຄື່ອນໄຫວສະເຫລີມສະຫລອງປີສາມັກຄີມິດຕະພາບລະຫວ່າງລາວ-ຫວຽດນາມ, ຫວຽດນາມ-ລາວ ໃນປີ 2017 ແລະ ການຈັດຕັ້ງແຂ່ງຂັນນີ້, ແມ່ນກິດຈະກຳທີ່ສ່ອງແສງໃຫ້ເຫັນມູນເຊື້ອແຫ່ງໄມຕີຈິດມິດຕະພາບອັນດູດດື່ມ, ຄວາມມີຊີວິດຊີວາແຫ່ງການພົວພັນແບບພິເສດ, ຄວາມບໍລິສຸດຜຸດຜ່ອງ ແລະ ຫາໄດ້ຍາກຕະຫລອດໃນການຕໍ່ສູ້ປົດປ່ອຍຊາດ ກໍຄືໃນໄລຍະປົກປັກຮັກສາ ແລະ ສ້າງສາພັດທະນາປະເທດຊາດໃນປັດຈຸບັນ.
