ເຊີນ​ຊວນ​ຊາວ​ໜຸ່ມນັກຮຽນ-ນັກສຶກສາເຂົ້າ​ຮ່ວມນິທັດ​ສະການ​ປື້​ມ 2018

- advert banner 728 90 728x90 - ເຊີນ​ຊວນ​ຊາວ​ໜຸ່ມນັກຮຽນ-ນັກສຶກສາເຂົ້າ​ຮ່ວມນິທັດ​ສະການ​ປື້​ມ 2018

ໃນວັນທີ 20 ມີນານີ້, ຢູ່ສະມາຄົມນັກຂ່າວແຫ່ງ ສປປ ລາວ, ພະ​ແນ​ກສຶກສາທິການ​ ແລະ ​ກິລາ​ນະຄອນຫລວງ​ວຽງຈັນ, ສະມາຄົມ​ຮ່ວມ​ໃຈ​ກັບ​ເດັກນ້ອຍ​ລາວ, ​ຫໍສະໝຸດ​ແຫ່ງ​ຊາດ, ກ​ອງ​ທຶນສົ່ງ​ເສີມ​ວັດທະນະທຳ​ປະ​ເທດ​ສະວິດ ​ແລະ ​ສະມາຄົມ​ນັກ​ຂ່າວ​ແຫ່ງ​ປະ​ເທດ​ລາວ, ໄດ້ຮ່ວມກັນ​ຖະ​ແຫລງຂ່າວກ່ຽວ​ກັບນິທັດ​ສະການ​ປື້​ມ 2018 ​ເພື່ອ​ສົ່ງ​ເສີມ​ການ​ອ່ານ​, ​ເຊິ່ງຈະຈັດ​ຂື້ນ​​ໃນວັນ​ທີ 23-24​ມີນາ​ນີ້​ທີ່ຫໍສະໝຸດ​ແຫ່ງ​ຊາດຫລັກ 6 ​ເມືອງ​ໄຊ​ທານີນະຄອນຫລວງ​ວຽງ​ຈັນ.

- lattana 1 - ເຊີນ​ຊວນ​ຊາວ​ໜຸ່ມນັກຮຽນ-ນັກສຶກສາເຂົ້າ​ຮ່ວມນິທັດ​ສະການ​ປື້​ມ 2018

ທ່ານ ບຸນ​ທັນ​ ແສງ​ມະນີ ຕາງໜ້າພະ​ແນ​ກສຶກສາ​ທິການ ​​ແລະ ​ກິລານະຄອນຫລວງ​ວຽງ​ຈັນ ​ກ່າວ​ວ່າ: ​ນິທັດ​ສະການ​ປື້​ມ, ແມ່ນ​ກິ​ດຈະ​ກຳສົ່ງ​ເສີມ​ການ​ອ່ານ, ໂດຍຈະ​ມີ​ການວາງ​ສະ​ແດງ​ປື້​ມທັງ​ພາຍ​ໃນ ​ແລະ ​ຕ່າງປະ​ເທດ ​ແລະ ​ມີ​ກິດຈະກຳ​ການ​ອ່ານລະຄອນ​ຈາກ​ປື້​ມ, ອ່ານ​ກອບກອນ ແລະ ວັນນະຄະດີ​ອື່ນໆ ​​ເພື່ອ​ສ້າງ​ໃຫ້​ເດັກນ້ອຍ​, ນັກຮຽນ-ນັກສຶກສາ ໄດ້​ພັດທະ​ນາ​ຄວາມ​ຮູ້, ທັງ​ເຮັດ​ໃຫ້​​ສັງຄົມ​ໄດ້ຮູ້​ເຖິງ​ວຽກ​ງານ​ສົ່ງ​ເສີມ​ການ​ອ່ານ ​ແລະ ​ການຈັດ​ພິມ​ປື້​ມສຳລັບ​ເດັກນ້ອຍ, ປື້​ມທຳ​ມະ ​ແລະ ​ປື້​ມອ່ານ​ທົ່ວ​ໄປ​ ​ໃຫ້​ທຸກ​ຄົນ​ສົນ​ໃຈ ​ແລະ ​ເຫັນ​ໄດ້​ຄວາມ​ສຳຄັນ​ຂອງ​ການ​ອ່ານທີ່​ຊືມຊັບ​ເອົາ​ຄວາມ​ມ່ວນ​ຄວາມ​ອອນ​ຊອນ​ໃນ​ປື້​ມ​ເຫລັ້ມ​ຕ່າງໆ.

ທ່ານນາງ ​ຂັນ​ທະ​ມາລີ ຍັງ​ນຸວົງ ຜູ້ອຳນວຍການ​ຫໍສະໝຸດ​ແຫ່ງ​ຊາດ, ປະ​ທານ​ສະມາຄົມ​ຫ້ອງ​ສະໝຸດ​ລາວ ​ໃຫ້​ຮູ້​ວ່າ: ກິດຈະກຳ​ພາຍ​ໃນ​ງານ​ປະກອບ​ມີ:ການ​ນຳ​ສະ​ເໜີ​ປື້​ມ, ການ​ສະ​​ແດງ​ລະຄອນຈາກ​ປື້​ມ, ການສະ​ແດງ​ລະຄອນ​ເວົ້າ,ການ​ສົ່ງ​ເສີມ​ການ​ອ່ານ, ການ​ແຂ່ງຂັນ​ການ​ອ່ານ, ​ແຂ່ງຂັນ​ເລົ່າ​ນິທານ, ​ຖາມ-​ຕອບ ກ່ຽວ​ກັບ​ປື້​ມ ແລະ ຄວາມ​ຮູ້​ທົ່ວ​ໄປ, ການ​ພົບ​ປະ​ແລກປ່ຽນ​ບົດຮຽນ​ກັບ​ນັກ​ຂຽນ, ນັກ​ອ່ານ, ນັກ​ແຕ້ມ, ການສະ​ແດງ​ລະຄອນ​ກ້ອມສັງ​ສິນ​ໄຊ, ສູດ​ສາລະພັນ, ​ເທດ, ​ແຫລ່​ ແລະ ​ການ​ແຈກ​ປື້​ມໃຫ້​ຜູ້​ທີ່​ເຂົ້າຮ່ວມ, ​ເຊິ່ງຄາດວ່າຈະ​ມີ​ຜູ້​ເຂົ້າ​ຮ່ວມ​ຫລາຍພັນຄົນໃນຕະຫລອດການຈັດງານ.

ງານ​ຄັ້ງ​ນີ້, ​ແມ່ນ​ຄັ້ງ​ທີ 15 ​ນັບ​ແຕ່​ປີ 1990 ເປັນຕົ້ນມາ ແລະ ​ໄດ້​ມີ​ການປະ​ເມີນ​ຜົນພົບ​ວ່າ: ​ໂຄງການ​ສົ່ງ​ເສີມ​ການ​ອ່ານນີ້, ໂຮ​ງຮຽນ​ໃດ​ມີຫໍສະໝຸດສ່ວນ​ໃຫຍ່​ນັກຮຽນ​ກໍ​ຈະ​ກາຍ​ເປັນ​ນັກຮຽນ​ເກັ່ງ, ຄູ​ກໍ​ເປັນ​ຄູ​ທີ່​ສອນ​ເກັ່ງ ​ຍ້ອນ​ໄດ້​ເຂົ້າ​ເຖິງ​ປື້​ມອ່ານ ​ແລະ ​ການຄົ້ນຄວ້າຫາ​ຄວາມ​ຮູ້​ໃນ​ປື້​ມ​​ກວມເຖິງ 80% ແລະ ​ປີ​ນີ້​ແມ່ນ​ຈະ​ຈັດ​ຂື້ນ 4 ​ຄັ້ງຄື: ​ຢູ່​ຫໍສະໝຸ​ດ​ແຫ່ງ​ຊາດ​ໃນ​ວັນ​ທີ 23-24 ​ມີນາ, ທີ 7-8​ ​ເມສາ ​ຢູ່​​ເມືອງ​ໂພນ​ໂຮງ,​ ທ້າຍ​ເດືອນ​ເມສາ​ຢູ່​ເມືອງ​​ແມດ​​​ແຂວງ​ວຽງ​ຈັນ ແລະ ຕົ້ນເດືອນ​ພຶ​ດສະພາ​ຢູ່​ແຂວງ​ຄຳ​ມ່ວນ.​

- 1 1 - ເຊີນ​ຊວນ​ຊາວ​ໜຸ່ມນັກຮຽນ-ນັກສຶກສາເຂົ້າ​ຮ່ວມນິທັດ​ສະການ​ປື້​ມ 2018