ລາວກຽມສະຫລອງສຽງແຄນລາວໄດ້ຮັບຮອງເປັນມໍລະດົກໂລກໃນປີນີ້

ເມື່ອບໍ່ດົນມານີ້, ທ່ານຮອງນາຍົກລັດຖະມົນຕີ ສອນໄຊ ສີພັນດອນ ແລະ ທ່ານ ບໍ່ແສງຄໍາ ວົງດາລາ ລັດຖະມົນຕີກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ພ້ອມຄະນະ, ໄດ້ໄປຮັບໃບຢັ້ງຢຶນສຽງແຄນລາວເປັນມໍລະດົກໂລກຢ່າງເປັນທາງການທີ່ສຳນັກງານໃຫຍ່ອົງການສະຫະປະຊາຊາດດ້ານການສຶກສາ, ວິທະຍາສາດ ແລະ ວັດທະນະທຳ (UNESCO) ປະເທດຝຣັ່ງ, ໂດຍແມ່ນທ່ານນາງ ໂອເຄຼ ອາຊູເລ ເອກອະທິບໍດີອົງການອຸຍແນັສໂກ ເປັນຜູ້ມອບ ແລະ ກະຊວງຖະແຫລ່ງຂ່າວ, ວັດທະນະທຳ ແລະ ທ່ອງທ່ຽວ ຈະໄດ້ກະກຽມສະເຫລີມສະຫລອງສຽງແຄນລາວທີ່ໄດ້ຮັບເອົາເປັນມໍລະດົກໂລກໃນປີນີ້.

ໃນໂອກາດດັ່ງກ່າວ, ຄະນະຜູ້ແທນລາວກໍໄດ້ເຂົ້າຢ້ຽມຊົມຮ້ານວາງສະແດງຜະລິດຕະພັນທ່ອງທ່ຽວລາວໃນງານວາງສະແດງທ່ອງທ່ຽວຝຣັ່ງ 2018 ທີ່ປາຣີ ຊຶ່ງຜູ້ປະກອບການລາວໄດ້ນຳເອົາຜະລິດຕະພັນທ່ອງທ່ຽວ ແລະ ຂໍ້ມູນດ້ານວັດທະນະທຳ, ຮີດຄອງປະເພນີ, ປະຫວັດສາດ, ທຳມະຊາດ ແລະ ອື່ນໆ ທີ່ຕິດ ພັນກັບການທ່ອງທ່ຽວລາວມາວາງສະແດງ ເພື່ອໂຄສະນາໃຫ້ນັກທ່ອງທ່ຽວຕ່າງປະເທດຮັບຮູ້ ແລະ ເຂົ້າໃຈເລິກເຊິ່ງກ່ຽວກັບທ່າແຮງບົ່ມຊ້ອນຂອງລາວ ແລະ   ໃນປີ 2018 ນີ້, ສປປ ລາວ ຈະສູ້ຊົນບັນລຸໂຕເລກນັກທ່ອງທ່ຽວໃຫ້ໄດ້ 5 ລ້ານເທື່ອຄົນ ແລະ ເກັບລາຍຮັບຈາກການທ່ອງທ່ຽວໃຫ້ໄດ້ 900 ລ້ານໂດລາສະຫະລັດ.