ຈີນໂອນການຄວບຄຸມສື່ ໄປຢູ່ພາຍໃຕ້ພັກກອມມູນິດ
ຈີນຈະໂອນການຄວບຄຸມເບິ່ງແຍງຮູບເງົາ, ຂ່າວ ແລະ ການຕີພິມຕ່າງໆ ໄປຢູ່ພາຍໃຕ້ສຳນັກງານການເຜີຍແຜ່ຂອງພັກກອມມູນິດ, ພາຍຫລັງຍຸບສຳນັກງານໜັງສືພິມ, ການຕີພິມ, ວິທະຍຸ, ຮູບເງົາ ແລະ ໂທລະພາບແຫ່ງລັດໄປໃນຕົ້ນເດືອນນີ້.
ສຳນັກຂ່າວຣອຍເຕີອ້າງແຫລ່ງຂ່າວ ແລະ ປະກາດຄະນະກຳມະການກາງພັກກອມມູນິດຈີນ ລົງວັນທີ 19 ມີນາວ່າ: ສຳນັກງານການເຜີຍແຜ່ຈະມີບົດບາດພິເສດ ແລະ ສຳຄັນໃນການໂຄສະນາອຸດົມການ ແລະ ຄວາມບັນເທີງທາງວັດທະນະທຳ ໂດຍຈະເຮັດໜ້າທີ່ຄວບຄຸມເບິ່ງແຍງສື່ຕ່າງໆທີ່ເຄີຍຢູ່ພາຍໃຕ້ການເບິ່ງແຍງຂອງສຳນັກງານທີ່ຖືກຍຸບໄປໃນຕົ້ນເດືອນ ອັນເປັນສ່ວນໜຶ່ງຂອງການປັບຄະນະລັດຖະບານຈີນຄັ້ງໃຫຍ່ທີ່ສຸດໃນຮອບຫລາຍປີ ໂດຍການຄວບລວມກະຊວງ ແລະ ຕັ້ງໜ່ວຍງານໃໝ່. ນອກຈາກນີ້ ຄະນະກຳມະການກາງພັກກອມມູນິດຈີນຍັງອະນຸມັດການຕັ້ງວອຍອອຟໄຊນາ ເປັນສະຖານີວິທະຍຸ-ໂທລະພາບແຫ່ງໃໝ່ທີ່ຈະລວມສະຖານີວິທະຍຸ ແລະ ສະຖານີໂທລະພາບຫລາຍແຫ່ງທີ່ມີຢູ່ໃນປັດຈຸບັນ ໂດຍຈະຂຶ້ນກົງຕໍ່ສຳນັກງານການເຜີຍແຜ່ຂອງພັກກອມມູນິດ.
