ລາວມີຜົນສໍາເລັດສູງໃນການປົກປ້ອງ ແລະ ສົ່ງເສີມສິດທິມະນຸດ

- advert banner 728 90 728x90 - ລາວມີຜົນສໍາເລັດສູງໃນການປົກປ້ອງ ແລະ ສົ່ງເສີມສິດທິມະນຸດ

ສປປ ລາວ ແລະ ສະຫະພາບເອີຮົບ ໄດ້ຈັດກອງປະຊຸມສົນທະນາກ່ຽວກັບວຽກງານສິດທິມະນຸດ ແລະ ການປົກຄອງ ຄັ້ງທີ 8, ທີ່ນະຄອນຫລວງ ບຣຸກແຊນ, ໃນວັນທີ 15 ມີນາ 2018. ໃນກອງປະຊຸມດັ່ງກ່າວ, ສອງຝ່າຍໄດ້ສົນທະນາ ຫລາຍຫົວຂໍ້ ເປັນຕົ້ນ ຄວາມຄືບຫນ້າຂອງວຽກງານສິດທິມະນຸດຢູ່ ສປປ ລາວ ແລະ ຢູ່ສະຫະພາບເອີຣົບ, ການໃຫ້ສັດຕະຍາບັນສົນທິສັນຍາສາກົນດ້ານສິດທິມະນຸດ, ກົດຫມາຍ ແລະ ນິຕິກໍາທີ່ຮັບຮອງໃຫມ່, ການຮ່ວມມືກັບກົນໄກພິເສດຂອງ ສະພາສິດທິມະນຸດ ສປຊ, ເສລີພາບໃນການສະແດງຄໍາຄິດເຫັນ, ອົງການຈັດຕັ້ງທາງສັງຄົມ, ສິດທິຂອງແມ່ຍິງ, ເດັກນ້ອຍ ແລະ ຄົນພິການ, ສິດທິດ້ານທີ່ດິນ ແລະ ຊີວະນາໆພັນ, ຄວາມໂປ່ງໃສ ແລະ ຄວາມຮັບຜິດຊອບ ໃນການຄຸ້ມຄອງບໍລິຫານ, ການຕ້ານຮູບແບບຕ່າງໆຂອງອາດຊະຍາກໍາຂ້າມຊາດ, ການຮ່ວມມືດ້ານສິດທິມະນຸດໃນເວທີຫລາຍຝ່າຍ, ການອອກຈາກສະຖານະພາບປະເທດດ້ອຍພັດທະນາ, ສິດທິມະນຸດ ແລະ ເປົ້າຫມາຍພັດທະນາແບບຍືນຍົງ.

- lattana 1 - ລາວມີຜົນສໍາເລັດສູງໃນການປົກປ້ອງ ແລະ ສົ່ງເສີມສິດທິມະນຸດ

ໃນກອງປະຊຸມ, ຝ່າຍສະຫະພາບເອີຮົບ ໄດ້ຕີລາຄາຄວາມພະຍາຍາມ ແລະ ຜົນສໍາເລັດຂອງສປປ ລາວ ໃນການປົກປ້ອງ ແລະ ສົ່ງເສີມສິດທິມະນຸດ, ການພັດທະນາລັດແຫ່ງກົດຫມາຍ, ການເຂົ້າເຖິງຂະບວນການຍຸຕິທໍາ, ພ້ອມທັງຈະສືບຕໍ່ໃຫ້ການຮ່ວມມືແກ່ ສປປ ລາວ ໃນວຽກງານດັ່ງກ່າວນີ້. ຝ່າຍ ລາວ ກໍໄດ້ຕີລາຄາຕໍ່ການປະຕິບັດສິດທິມະນຸດຢູ່ ສະຫະພາບ ເອີຣົບ ລວມທັງຄວາມພະຍາຍາມຂອງ ສະຫະພາບ ເອີຣົບ ເພື່ອຮັບປະກັນສິດທິມະນຸດ ໃນການຕໍ່ສູ້ຕ້ານການກໍ່ການຮ້າຍ, ການແກ້ໄຂບັນຫາການເຄື່ອນຍ້າຍ ແລະ ອົບພະຍົບ ຢູ່ ເອີຣົບ. ສອງຝ່າຍໄດ້ສົນທະນາ ກ່ຽວກັບບາງກໍລະນີທີ່ ສະຫະພາບ ເອີຣົບ ມີຄວາມສົນໃຈກ່ຽວກັບສິດທິມະນຸດຢູ່ ສປປ ລາວ ຊຶ່ງຝ່າຍ ລາວ ກໍໄດ້ຊີ້ແຈງອະທິບາຍ ອັນໄດ້ເຮັດໃຫ້ຝ່າຍສະຫະພາບ ເອີຣົບ ມີຄວາມເຂົ້າໃຈຫລາຍຂຶ້ນຕື່ມ ກ່ຽວກັບນະໂຍບາຍ, ກົດຫມາຍ ແລະ ສະພາບຄວາມເປັນຈິງຢູ່ ສປປ ລາວ.

ປີ 2018 ແມ່ນປີຄົບຮອບ 70 ປີ ຂອງຖະແຫລງການສາກົນວ່າດ້ວຍສິດທິມະນຸດ ເຊິ່ງເປັນພື້ນຖານທີ່ສໍາຄັນຂອງລະບົບສິດທິມະນຸດສາກົນ. ສະນັ້ນ, ທັງສອງຝ່າຍ ໄດ້ຕົກລົງກັນ ເພື່ອເພີ່ມທະວີການຮ່ວມມືໃນການສົ່ງເສີມ ແລະ ປົກປ້ອງສິດທິມະນຸດທັງໃນລະດັບສອງຝ່າຍ ແລະ ໃນເວທີສາກົນ, ລວມທັງການຮ່ວມມືກັບບັນດາກົນໄກສິດທິມະນຸດຂອງ ສປຊ.

ກອງປະຊຸມສົນທະນາດ້ານສິດທິມະນຸດລະຫວ່າງ ສປປ ລາວ ແລະ ສະະພາບ ເອີຣົບ ໄດ້ດໍາເນີນໄປຢ່າງກົງໄປກົງມາ, ເຄົາລົບນັບຖືເຊິ່ງກັນ ແລະ ກັນ, ຄວາມສະເຫມີພາບ ແລະ ອະທິປະໄຕຂອງລັດ.

- 1 1 - ລາວມີຜົນສໍາເລັດສູງໃນການປົກປ້ອງ ແລະ ສົ່ງເສີມສິດທິມະນຸດ

ຄະນະຜູ້ແທນລາວນໍາໂດຍທ່ານ ພູໂຂງ ສີສຸລາດ, ຫົວໜ້າກົມສົນທິສັນຍາ ແລະ ກົດໝາຍ, ກະຊວງການຕ່າງປະເທດ, ແລະ ມີຜູ້ຕາງຫນ້າຈາກ ສະພາແຫ່ງຊາດ, ກະຊວງຍຸຕິທໍາ, ກະຊວງປ້ອງກັນຄວາມສະຫງົບ, ສານປະຊາຊົນສູງສຸດ, ກະຊວງພາຍໃນ, ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ, ສູນກາງແນວລາວສ້າງຊາດ, ສູນກາງສະຫະພັນແມ່ຍິງລາວ. ໃນໄລຍະເຂົ້າຮ່ວມກອງປະຊຸມດັ່ງກ່າວ, ຄະນະຜູູ້ແທນລາວ ຍັງໄດ້ໄປຢ້ຽມຢາມ ແລະ ຮຽນຮູ້ຈາກສະຖາບັນຕ່າງໆຂອງ ຄະນະກໍາມະທິການເອີຣົບ, ລັດຖະສະພາເອີຣົບ, ເຂົ້າຮ່ວມກອງປະຊຸມສໍາມະນາກັບບັນດາອົງການຈັດຕັ້ງສັງຄົມພົນລະເຮືອນຂອງປະເທດ ແບນຊິກ ແລະ ອີຢູ ກ່ຽວກັບການສົ່ງເສີມຄວາມສະເຫມີພາບ ຍິງ-ຊາຍ ແລະ ໄດ້ຮັບຟັງການລາຍງານຫຍໍ້ກ່ຽວກັບສານອາຍາສາກົນ ແລະ ສານຍຸຕິທໍາສາກົນອີກດ້ວຍ.