ໄຂກອງປະຊຸມລັດຖະບານເປີດກ້ວາງຄັ້ງທີ 1 ປະຈຳປີ 2018 ຈັດຂຶ້ນທີ່ເມືອງວຽງໄຊ

- advert banner 728 90 728x90 - ໄຂກອງປະຊຸມລັດຖະບານເປີດກ້ວາງຄັ້ງທີ 1 ປະຈຳປີ 2018 ຈັດຂຶ້ນທີ່ເມືອງວຽງໄຊ

ກອງປະຊຸມລັດຖະບານເປີດກວ້າງຄັ້ງທີ 1 ປະຈໍາປີ 2018 ໄດ້ໄຂຂຶ້ນເປັນທາງການໃນວັນທີ 22 ມີນານີ້, ທີ່ເມືອງວຽງໄຊແຂວງຫົວພັນ, ພາຍໃຕ້ການເປັນປະທານຂອງທ່ານ ທອງລຸນ ສີສຸລິດ ນາຍົກລັດຖະມົນຕີ, ມີບັນດາທ່ານຮອງນາຍົກລັດຖະມົນຕີ, ສະມາຊິກລັດຖະບານ, ເຈົ້າຄອງນະຄອນຫລວງວຽງຈັນ ແລະ ບັນດາເຈົ້າແຂວງ, ຜູ້ຕາງໜ້າອົງການຈັດຕັ້ງພັກ, ສະພາແຫ່ງຊາດ, ສານປະຊາຊົນສູງສຸດ, ອົງການໄອຍະການປະຊາຊົນສູງສຸດ, ສູນກາງແນວລາວສ້າງຊາດ, ອົງການຈັດຕັ້ງມະຫາຊົນຂັ້ນສູນກາງເຂົ້າຮ່ວມ 450 ທ່ານ.

- lattana 1 - ໄຂກອງປະຊຸມລັດຖະບານເປີດກ້ວາງຄັ້ງທີ 1 ປະຈຳປີ 2018 ຈັດຂຶ້ນທີ່ເມືອງວຽງໄຊ

ກອງປະຊຸມລັດຖະບານຄັ້ງນີ້, ເປັນກອງປະຊຸມສັນຈອນເທື່ອທໍາອິດ ທີ່ມີລັກສະນະພິເສດ ຂອງຄະນະລັດຖະບານຊຸດທີ 8, ເຊິ່ງໄດ້ຈັດຂຶ້ນໃນໄລຍະເວລາທີ່ພໍດີ ກັບວັນສ້າງຕັ້ງພັກ 22 ມີນາ ຄົບຮອບ 63 ປີ (22 ມີນາ 1955-22 ມີນາ 2018). ທ່ານນາຍົກລັດຖະມົນຕີ ໄດ້ກ່າວເປີດກອງປະຊຸມສໍາຄັນນີ້ວ່າ: ກອງປະຊຸມລັດຖະບານຄັ້ງນີ້, ໄດ້ຈັດຂຶ້ນທີ່ເມືອງວຽງໄຊ ເປັນສະຖານທີ່ສໍາຄັນ ແລະ ມີຄວາມໝາຍ, ເປັນຖິ່ນກໍາເນີດຂອງສູນບັນຊາສູ້ຮົບ ແລະ ຖານທີ່ໝັ້ນຂອງການປະຕິວັດ, ທັງເປັນຈຸດກໍາເນີດຂອງ ສປປ ລາວ ແລະ ປີນີ້ເປັນປີກະກຽມການສະເຫລີມສະຫລອງວັນສ້າງຕັ້ງເມືອງດັ່ງກ່າວຄົບຮອບ 50 ປີ (30 ພະຈິກ 1968-30 ພະຈິກ 2018). ພ້ອມກັນນີ້, ກໍເປັນປີທີ່ພວກເຮົາຫາກໍ່ສະເຫລີມສະຫລອງ ວັນປົດປ່ອຍຜາຖີ່ ຄົບຮອບ 50 ປີ (11 ມີນາ 1968-11 ມີນາ 2018). ສິ່ງສໍາຄັນກວ່ານັ້ນ ແມ່ນການສ້າງເງື່ອນໄຂໃຫ້ພວກເຮົາທຸກຄົນໄດ້ທົບທວນ ແລະ ລໍ້າລຶກເຖິງບຸນຄຸນອັນໃຫຍ່ຫລວງ ສູງສົ່ງຂອງຜູ້ນໍາປະຕິວັດ, ບຸນຄຸນຂອງການປະຕິວັດ, ບຸນຄຸນອັນໃຫຍ່ຫລວງທີ່ຝັ່ງໄວ້ໃນຫົວໃຈຂອງປະຊາຊົນລາວຕະຫລອດໄປ, ໂດຍສະເພາະແມ່ນຜູ້ເສຍສະຫລະ ເພື່ອພາລະກິດຂອງການປະຕິວັດປົດປ່ອຍຊາດ, ປົດປ່ອຍປະຊາຊົນ ອອກຈາກການຄອບຄອງຂອງຈັກກະພັດລ່າເມືອງຂຶ້ນໃນເມື່ອກ່ອນ ແລະ ການປົກປັກຮັກສາ ແລະ ພັດທະນາປະເທດຂອງພວກເຮົາໃນປັດຈຸບັນ.

ສໍາລັບກອງປະຊຸມທີ່ຈະໄດ້ພ້ອມກັນປຶກສາຫາລື, ຮັບຟັງ ແລະ ປະກອບຄໍາເຫັນຕໍ່ການເຜີຍແຜ່ແນະນໍາ ແລະ ກະຕຸກຊຸກຍູ້ແຕ່ຫົວທີກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດປະຈໍາປີ 2018, ເຊິ່ງກວມເອົາບັນດາຫົວຂໍ້ຕ່າງໆດັ່ງນີ້: ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈໍາປີ 2018, ບັນດາໂຄງການຈຸດສຸມພັດທະນາຂອງລັດຖະບານ ຢູ່ສູນກາງ ແລະ ທ້ອງຖິ່ນ, ການປັບປຸງຄວາມສະດວກໃນການດໍາເນີນທຸລະກິດ ແລະ ການລົງທຶນຜ່ານປະຕູດຽວ; ການຜັນຂະຫຍາຍຜົນ ແລະ ການຈັດຕັ້ງປະຕິບັດແຜນການຮ່ວມມືລາວ-ຫວຽດນາມ, ແຜນການຮ່ວມມືລາວ-ຈີນ; ສະພາບການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາ 2 ເດືອນ, ຄາດຄະເນງວດ 1 ແລະ ຄາດຄະເນ 6 ເດືອນຕົ້ນປີ 2018 ແລະ ທິດທາງແຜນການປີ 2018; ການຈັດຕັ້ງປະຕິບັດແຜນພັດທະນາຊົນນະບົດ ແລະ ລຶບລ້າງຄວາມທຸກຍາກ. ການສົ່ງເສີມການຜະລິດເປັນສິນຄ້າ ແລະ ຄໍ້າປະກັນສະບຽງອາຫານ; ການຄຸ້ມຄອງລາ ຄາສິນຄ້າ ແລະ ການບໍລິການ, ການດັດສົມໂຮງງານປຸງແຕ່ງໄມ້, ການສົ່ງເສີມວິສາຫະກິດຂະໜາດນ້ອຍ ແລະ ຂະໜາດກາງ; ສະພາບການຈັດຕັ້ງປະຕິບັດປີທ່ອງທ່ຽວລາວ 2018; ຄວາມຄືບໜ້າໃນການກະກຽມສະເຫລີມສະຫລອງວັນສ້າງຕັ້ງເມືອງວຽງໄຊ ຄົບຮອບ 50 ປີ.

ເພື່ອຮັບປະກັນໃຫ້ກອງປະຊຸມມີປະສິດທິຜົນ ແລະ ບັນລຸຄາດໝາຍ ທ່ານນາຍົກລັດຖະມົນຕີ ໄດ້ຮຽກຮ້ອງມາຍັງຜູ້ແທນກອງປະຊຸມ ຈົ່ງຍົກສູງຄວາມຮັບຜິດຊອບຂອງຕົນ ເຂົ້າໃນການປະກອບຄໍາເຫັນຢ່າງກົງໄປກົງມາ, ກະທັດຮັດ ແລະ ມີຈຸດສຸມ ໂດຍລົງເລິກເຖິງຂໍ້ຄົງຄ້າງທີ່ຍັງປະຕິບັດບໍ່ທັນໄດ້ດີ, ວິເຄາະວິໄຈເຖິງສາຍເຫດ ແລະ ສະເໜີທິດທາງ, ມາດຕະການແກ້ໄຂຕົວຈິງ ເພື່ອຮັບປະກັນການຄຸ້ມຄອງ ແລະ ບໍລິຫານປະເທດ ດໍາເນີນໄປດ້ວຍປະສິດທິພາບ ແລະ ມີປະສິດທິຜົນສູງ.