ແຂວງສາລະວັນ ໃຫ້ເອກະຊົນສຳປະທານຂຸດຄົ້ນຫີນປູນກວ່າ 10 ເຮັກຕາ
ແຂວງສາລະວັນ ໄດ້ອະນຸຍາດໃຫ້ ບໍລິສັດ ຈຸງຢາອີຊີ ຊີມັງລາວ ຈຳກັດ ສຳປະທານຂຸດຄົ້ນຫີນປູນ ຢູ່ເຂດບ້ານປາກປຸຍ ແລະ ບ້ານໜອງບົວ ໃນເນື້ອທີ່ 10,13 ເຮັກຕາ ເພື່ອຜະລິດຊີມັງ ເຊິ່ງພິທີເຊັນສັນຍາສຳປະທານໄດ້ມີຂຶ້ນໃນວັນທີ 20 ມີນານີ້ ລະຫວ່າງທ່ານ ໄຊຍະເດດ ວົງສາຣະວັນ ຫົວໜ້າພະແນກແຜນການ ແລະ ການລົງທຶນແຂວງ ແລະ ທ່ານ ລີ ຢຽນ ຮົວ ປະທານບໍລິສັດຈຸງຢາອີຊີ ຊີມັງລາວ ຈຳກັດ ໂດຍມີທ່ານ ວິຊຽນ ນະວິກຸນ ຮອງເຈົ້າແຂວງສາລະວັນ, ຜູ້ຊີ້ນຳວຽກງານເສດຖະກິດແຂວງ ເຂົ້າຮ່ວມເປັນສັກຂີພິຍານນໍາດ້ວຍ.
ການສຳປະທານເນື້ອທີ່ດິນດັ່ງກ່າວ ແມ່ນ ບໍລິສັດ ຈຸງຢາອີຊີ ຊີມັງລາວ ຈຳກັັດ ເປັນຜູ້ລົງທຶນ 100% ໃນມູນຄ່າ 12 ຕື້ກວ່າກີບ ເຊິ່ງມີໄລຍະສຳປະທານ 5 ປີ (2018-2023) ນັບແຕ່ມື້ອອກຂໍ້ຕົກລົງອະນຸມັດ ເພື່ອນຳໄປຜະລິດຊີມັງລາວ ກາຊ້າງ ຢູ່ໂຮງງານຊີມັງ ຫລັກ 25 ຈາກເທສະບານແຂວງສາລະວັນ ໃນຮູບແບບເສຍພາສີໃຫ້ລັດ ເຮັກຕາລະ 50 ໂດລາສະຫະລັດ ແລະ ມອບເງິນເຂົ້າກອງທຶນພັດທະນາແຂວງຕື່ມອີກ 12 ລ້ານກວ່າກີບຕໍ່ປີ.
ໃນປີ 2002 ໂຮງງານຊີມັງ ໄດ້ຮັບການສ້າງຕັ້ງຂຶ້ນ ໂດຍໄດ້ຮັບການເຫັນດີຈາກລັດຖະບານແຫ່ງ ສປປ ລາວ ແລະ ໄດ້ສຳເລັດການກໍ່ສ້າງໃນປີ 2011 ໂດຍນຳໃຊ້ທຶນທັງໝົດ 76 ລ້ານໂດລາສະຫະລັດ, ໂຮງງານດັ່ງກ່າວມີກຳລັງການຜະລິດ 1.200-1.500 ໂຕນຕໍ່ມື້ ເຊິ່ງມີຊີມັງ 2 ປະເພດຄື: ຊີມັງປອດແລນສີແດງ 52.5 ແລະ ຊີມັງປະສົມ 32.5, ເລີ່ມການຜະລິດມາແຕ່ປີ 2012-2017 ສາມາດຜະລິດຊີມັງໄດ້ທັງໝົດ 758.577 ໂຕນ ແລະ ສາມາດເສຍພັນທະອາກອນໃຫ້ລັດແຕ່ປີ 2012-2017 ມີ 31 ຕື້ກວ່າກີບ.
