EU ຮຽກເອກອັກຄະລັດຖະທູດກັບຈາກຣັດເຊຍ
ສະຫະພາບເອີຣົບຮຽກເອກອັກຄະລັດຖະທູດປະຈຳນະຄອນຫລວງມົດສະກູກັບ ເພື່ອ “ປະທ້ວງທາງສັນຍາລັກ” ຕໍ່ກໍລະນີອະດີດສາຍລັບຣັດເຊຍ ເຊິ່ງລີ້ໄພຢູ່ສະຫະລາຊະອານາຈັກ ໄດ້ຮັບສານພິດຮ້າຍແຮງຈົນບໍ່ສະບາຍພ້ອມກັບລູກສາວ.
ສຳນັກຂ່າວຕ່າງປະເທດລາຍງານຈາກນະຄອນຫລວງບຣຸກແຊນ ປະເທດແບນຊິກ ໃນວັນທີ 23 ມີນາວ່າ: ກອງປະຊຸມຜູ້ນຳ 28 ປະເທດສະມາຊິກສະຫະພາບເອີຣົບ (EU) ອອກຖະແຫລງການໃນວັນທີ 22 ມີນາວ່າ: ສະມາຊິກ EU ທັງໝົດເຫັນພ້ອມກັນວ່າ “ມີຄວາມເປັນໄປໄດ້ຢ່າງຍິ່ງ” ວ່າລັດຖະບານມົດສະກູມີສ່ວນກ່ຽວຂ້ອງກັບກໍລະນີທີ່ທ່ານ ເຊີເກ ສກຣີພັລ ອະດີດເຈົ້າໜ້າທີ່ຂ່າວລັບຂອງຣັດເຊຍ ອາຍຸ 66 ປີ ແລະ ລູກສາວ ນາງ ຢູເລຍ ສກຣີພັລ ອາຍຸ 33 ປີ ໄດ້ຮັບສານພິດຮ້າຍແຮງຈາກໂຄງການ “ໂນວິຊັອກ” ທີ່ສະຫະພາບໂຊວຽດພັດທະນາຂຶ້ນ ໂດຍເຫດການເກີດຂຶ້ນທີ່ເມືອງຊາລິສບິວຣີ ທາງຕອນໃຕ້ຂອງອັງກິດ ໃນວັນທີ 4 ມີນາ ແລະ ປັດຈຸບັນ ພໍ່ລູກສກຣີພັລຍັງຕ້ອງໄດ້ຮັບການປິ່ນປົວຢ່າງໃກ້ຊິດຈາກແພດ.
#BREAKING EU leaders agree Russia "highly likely" behind UK spy attack, says European Council President Donald Tusk
— AFP News Agency (@AFP) March 22, 2018
ຂະນະທີ່ນາຍົກລັດຖະມົນຕີ ມາຣ໌ກ ຣັຕເຕ ຜູ້ນຳໂຮນລັງ ກ່າວວ່າສະມາຊິກ EU ມີຄວາມເປັນເອກະພາບຮ່ວມກັນຢ່າງຈະແຈ້ງໃນເລື່ອງນີ້ ຈຶ່ງມີມະຕິເຫັນພ້ອມໃຫ້ມີການຮຽກເອກອັກຄະລັດຖະທູດ EU ປະຈຳນະຄອນຫລວງມົດສະກູກັບນະຄອນຫລວງບຣຸກແຊນແລ້ວ ເພື່ອເປັນການປະທ້ວງທາງສັນຍາລັກ. ສ່ວນແຫລ່ງຂ່າວລະດັບສູງໃນສະຫະພາບເອີຣົບເປີດເຜີຍອີກວ່າ: “ບາງປະເທດ” ກຳລັງພິຈາລະນາກຽມເນລະເທດນັກການທູດຂອງຣັດເຊຍ ຫລື ຮຽກກັບເອກອັກຄະລັດຖະທູດຂອງຕົນເອງປະຈຳນະຄອນຫລວງມົດສະກູເຊັ່ນກັນ. ເຖິງຢ່າງໃດກໍຕາມ ມີລາຍງານວ່າ: ອີຕາລີ ແລະ ເກຣັກ ຄັດຄ້ານມາດຕະການດັ່ງກ່າວ ແລະ ມີຄວາມເປັນໄປໄດ້ສູງວ່າຈະບໍ່ປະຕິບັດຕາມ.
