ຈີນກຽມຂຶ້ນພາສີສິນຄ້າອາເມລິກາ ຕອບໂຕ້ກຳແພງພາສີທ່ານ ທຣຳ
ລັດຖະບານປັກກິ່ງປະກາດບໍ່ຢ້ານ “ສົງຄາມການຄ້າ” ດ້ວຍການເປີດເຜີຍລາຍຊື່ສິນຄ້າຂອງອາເມລິກາ 128 ລາຍການ ທີ່ຈະຜະເຊີນກັບກຳແພງພາສີສູງສຸດ 25% ຕອບໂຕ້ກໍລະນີປະທານາທິບໍດີ ໂດນັນ ທຣຳ ສັ່ງເພີ່ມການຮຽກເກັບພາສີສິນຄ້າຂອງຈີນ 2.877 ລ້ານໂດລາສະຫະລັດ.
ສຳນັກຂ່າວຕ່າງປະເທດລາຍງານຈາກນະຄອນຫລວງປັກກິ່ງ ສປ ຈີນ ໃນວັນທີ 23 ມີນາວ່າ: ກະຊວງການຄ້າຂອງຈີນອອກຖະແຫລງການວ່າ: ລັດຖະບານປັກກິ່ງບໍ່ເຄີຍມີຄວາມຕ້ອງການເຮັດສົງຄາມການຄ້າກັບປະເທດໃດ, ແຕ່ບໍ່ມີຄວາມຢ້ານກົວຖ້າຕ້ອງຜະເຊີນກັບສະຖານະການນັ້ນ. ທັງນີ້ ລັດຖະບານປັກກິ່ງຫວັງເປັນຢ່າງຍິ່ງວ່າລັດຖະບານວໍຊິງຕັນຈະທົບທວນການຕັດສິນໃຈຂອງຕົນເອງໃນເລື່ອງນີ້ ເພື່ອບໍ່ໃຫ້ສົ່ງຜົນກະທົບຕໍ່ການພົວພັນໃນລະດັບທະວີພາຄີ ແລະ ເພື່ອບໍ່ໃຫ້ເກີດຜົນກະທົບເປັນຕ່ອງໂສ້ໄປປະເທດອື່ນ.
The Trump administration has announced it would impose tariffs on up to 60 billion US dollars of imports from China, while also preparing to file new complaints against China at the World Trade Organization, raising concerns of a possible trade war. pic.twitter.com/NpuwxUm4pR
— CGTN (@CGTNOfficial) March 23, 2018
ເຖິງຢ່າງໃດກໍຕາມ, ລັດຖະບານປັກກິ່ງປະກາດລາຍຊື່ສິນຄ້າຂອງອາເມລິກາ 128 ລາຍການ ທີ່ອາດຕ້ອງຜະເຊີນກັບມາດຕະການກຳແພງພາສີທີ່ສູງຂຶ້ນຂອງຈີນ ຖ້າທັງສອງປະເທດບໍ່ສາມາດຫລຸດຜ່ອນກໍລະນີຂັດແຍ່ງນີ້ໄດ້ ກ່ອນມາດຕະການຂອງອາເມລິກາຈະມີຜົນບັງຄັບໃຊ້ ໂດຍລັດຖະບານປັກກິ່ງແບ່ງການໃຊ້ມາດຕະການອອກເປັນ 2 ກໍລະນີ ຄືອັດຕາພາສີ 15% ສຳລັບສິນຄ້າ 120 ລາຍການ ລວມທັງໝາກໄມ້, ວາຍ ແລະ ທໍ່ເຫລັກ ຄິດເປັນມູນຄ່າ 977 ລ້ານໂດລາສະຫະລັດ ແລະ ອັດຕາພາສີ 25% ສຳລັບຊີ້ນສັດແຊ່ແຂງ ແລະ ຜະລິດຕະພັນອາລູມີນຽມຈາກອາເມລິກາອີກ 8 ລາຍການ ຄິດເປັນມູນຄ່າ 1.900 ລ້ານໂດລາສະຫະລັດ ເພື່ອສ້າງ “ຄວາມສົມດູນທາງການຄ້າ” ແລະ ເປັນການທົດແທນທີ່ຈີນຕ້ອງສູນເສຍຜົນປະໂຫຍດຈາກມາດຕະການກຳແພງພາສີເຫລັກ ແລະ ອາລູມີນຽມທີ່ລັດຖະບານວໍຊິງຕັນປະກາດກ່ອນໜ້ານັ້ນ.
