ສືບຕໍ່ກໍ່ສ້າງສະໜາມບິນແຂວງຫົວພັນໃຫ້ສໍາເລັດ
ປັດຈຸບັນ, ບໍລິສັດຜູ້ຮັບເໝົາກໍ່ສ້າງສະໜາມບິນໜອງຄ້າງແຂວງຫົວພັນ, ໄດ້ສືບຕໍ່ກໍ່ສ້າງສະໜາມບິນດັ່ງກ່າວໃຫ້ສໍາເລັດ, ພາຍຫລັງໄດ້ຢຸດຕິການກໍ່ສ້າງມາຫລາຍເດືອນຍ້ອນປະສົບບັນຫາຫຍຸ້ງຍາກຫລາຍດ້ານ ແລະ ເມື່ອທ້າຍອາທິດຜ່ານມາ, ທ່ານຮອງນາຍົກລັດຖະມົນຕີ ບຸນທອງ ຈິດມະນີ ໄດ້ລົງໄປຕິດຕາມຄວາມຄືບໜ້າການກໍ່ສ້າງສະໜາມບິນດັ່ງກ່າວ ແລະ ໄດ້ຮັບຟັງລາຍງານຈາກເຈົ້າແຂວງຫົວພັນວ່າ: ສະໜາມບິນແຫ່ງນີ້, ແມ່ນບໍລິສັດພັດທະນາກະສິກຳຮ່ວາງແອັງອັດຕະປືເປັນຜູ້ຮັບເໝົາກໍ່ສ້າງມາແຕ່ເດືອນຕຸລາ 2013 ແລະ ໄດ້ສິ້ນສຸດສັນຍາໂຄງການໃນປີ 2015, ແຕ່ໂຄງການບໍ່ສາມາດປະຕິບັດສຳເລັດຕາມແຜນ, ຍ້ອນມີຫລາຍບັນຫາຫຍຸ້ງຍາກ ເຊັ່ນ: ໂຄງການຕັ້ງຢູ່ຫ່າງຕົວເມືອງ ເຮັດໃຫ້ການຂົນສົ່ງວັດສະດຸ, ພາຫະນະກົນຈັກ ເພື່ອມາຮັບໃຊ້ວຽກງານພົບຄວາມຫຍຸ້ງຍາກ, ລວມທັງໄພທຳມະຊາດທີ່ເປັນອຸປະສັກ ແລະ ອື່ນໆ. ດັ່ງນັ້ນ, ເພື່ອສືບຕໍ່ໂຄງການນີ້ໃຫ້ສຳເລັດພາກສ່ວນກ່ຽວຂ້ອງຕ່າງໆ ເປັນຕົ້ນ: ແຂວງຫົວພັນ, ກະຊວງໂຍທາທິການ ແລະ ຂົນສົ່ງ ແລະ ບໍລິສັດຜູ້ຮັບເໝົາ ໄດ້ມີການປຶກສາຫາລືຫລາຍຄັ້ງຈົນຕົກລົງເຫັນດີເປັນເອກະພາບ ເພື່ອສືບຕໍ່ຈັດຕັ້ງປະຕິບັດໂຄງການດັ່ງກ່າວໃຫ້ສໍາເລັດ, ໂດຍໄດ້ເລີ່ມລົງມືກໍ່ສ້າງມາແຕ່ທ້າຍເດືອນກຸມພາ 2018 ເປັນຕົ້ນມາ, ໃນໜ້າວຽກບຸກເບີກພື້ນທີ່ເພື່ອກໍ່ສ້າງທາງຂຶ້ນ-ລົງຂອງເຮືອບິນ, ລານຈອດເຮືອບິນ, ເຂດປອດໄພຂ້າງທາງ ແລະ ກໍ່ສ້າງທາງລົດມອດໄຟຂອງສະໜາມບິນ, ເຂດປອດໄພຂ້າງທາງຂຶ້ນ-ລົງເຮືອບິນ, ກໍ່ສ້າງທາງຍ່າງຢູ່ໜ້າອາຄານຜູ້ໂດຍສານ ແລະ ວຽກຖົມດິນອ້ອມອາຄານສະໜາມບິນ, ວຽກອານາໄມ ແລະ ອື່ນໆ, ເຊິ່ງຄາດວ່າຈະໃຫ້ສໍາເລັດ ແລະ ເປີດນໍາໃຊ້ໃນອີກບໍ່ດົນນີ້.
