ເຟສບຸກລົງໂຄສະນາເຕັມໜ້າໜັງສືພິມ ຂໍໂທດເລື່ອງຂໍ້ມູນຮົ່ວ
ມາຣ໌ກ ຊັດເຄີເບິຣ໌ກ ຊື້ໂຄສະນາເຕັມໜ້າໜັງສືພິມຍັກໃຫຍ່ໃນອັງກິດ ແລະ ອາເມລິກາລວມ 9 ແຫ່ງ ເພື່ອລົງຖະແຫລງການຂໍໂທດຜູ້ໃຊ້ເຟສບຸກ ຈາກກໍລະນີການຖືກລັກຂໍ້ມູນຄັ້ງໃຫຍ່ໂດຍບໍລິສັດ “ເຄມບຣິດ ອະນາລິຕິກາ”.
ສຳນັກຂ່າວຕ່າງປະເທດລາຍງານຈາກນະຄອນນິວຢອກ ປະເທດສະຫະລັດອາເມລິກາວ່າ: ບໍລິສັດເຟສບຸກຊື້ໂຄສະນາເຕັມໜ້າໃນໜັງສືພິມ 9 ແຫ່ງ ໃນອາທິດຜ່ານມາ ແບ່ງເປັນໜັງສືພິມໃນສະຫະລາຊະອານາຈັກ 6 ແຫ່ງ ໄດ້ແກ່ “ດິ ອັອບເຊິຣຟເວີ”, “ເດິ ຊັນເດ ທາມ”, “ເມລ ອອນ ຊັນດາ”, “ຊັນເດ ມິເຣີ”, ຊັນເດ ເອັກເພຣສ” ແລະ “ຊັນເດ ເທເລກຣາຟ” ແລະ ໜັງສືພິມຂອງອາເມລິກາອີກ 3 ແຫ່ງ ໄດ້ແກ່ “ເດິ ນິວຢອກ ທາມ”, “ເດິ ວໍຊິງຕັນ ໂພສ” ແລະ “ເດິ ວອລ ສຕຣີທ ເຈີນັລ” ມີເນື້ອໃນສຳຄັນເປັນການສະແດງຄວາມເສຍໃຈ ແລະ ຂໍອະໄພຢ່າງສູງສຸດຕໍ່ຜູ້ໃຊ້ເຟສບຸກ ກ່ຽວກັບເຫດການທີ່ແບບສອບຖາມອອນລາຍ ເຊິ່ງພັດທະນາໂດຍອາຈານມະຫາວິທະຍາໄລຄົນໜຶ່ງ ນຳໄປສູ່ການຮົ່ວໄຫລຂອງຂໍ້ມູນຜູ້ໃຊ້ເຟສບຸກ 50 ລ້ານບັນຊີ ໃນປີ 2014.
ທັງນີ້, ຖະແຫລງການດັ່ງກ່າວທີ່ລົງທ້າຍວ່າມາຈາກ ມາຣ໌ກ ຊັດເຄີເບິຣ໌ກ ໜຶ່ງໃນຜູ້ຮ່ວມສ້າງຕັ້ງ ແລະ ປະທານຄະນະເຈົ້າໜ້າທີ່ບໍລິຫານ (CEO) ຄົນປັດຈຸບັນຂອງເຟສບຸກ ລະບຸອີກວ່າເຫດການທີ່ເກີດຂຶ້ນເປັນການທຳລາຍຄວາມເຊື່ອໝັ້ນຂອງຜູ້ບໍລິໂພກຢ່າງຮ້າຍແຮງ ແລະ ເຟສບຸກຍອມຮັບຜິດທີ່ບໍ່ໄດ້ດຳເນີນການພຽງພໍເພ່ືອແກ້ໄຂຂໍ້ບົກຜ່ອງ, ແຕ່ໃນຕອນນີ້ໄດ້ປັບປຸງກົດເກນຫລາຍຢ່າງໃຫ້ມີຄວາມເຂັ້ມງວດຫລາຍຂຶ້ນ ແລະ ຢືນຢັນວ່າຈະບໍ່ເກີດເຫດການແບບນີ້ອີກ.
"We have a basic responsibility to protect people's data and if we can't do that then we don't deserve to have the opportunity to serve people," says Facebook CEO Mark Zuckerberg https://t.co/1p6h21DUxh pic.twitter.com/OrLl1MiBEP
— CNN Breaking News (@cnnbrk) March 22, 2018
ເຫດການທີ່ເກີດຂຶ້ນສ້າງຄວາມເສື່ອມເສຍຢ່າງໜັກໃຫ້ແກ່ເຟສບຸກ ຈົນມີແຮຊແທັກ #deletefacebook ປາກົດໃນໂລກອອນລາຍ ແລະ ທ່ານ ອີລອນ ມັສກ໌ ຜູ້ບໍລິຫານຂອງບໍລິສັດອະວະກາດເອກະຊົນລາຍໃຫຍ່ “ສເປຊເອັກ” ລົບບັນຊີທັງຂອງສເປຊເອັກ ແລະ ເທສລາ ທີ່ແຕ່ລະບັນຊີມີຜູ້ຕິດຕາມຫລາຍກວ່າ 2 ລ້ານຄົນອອກຈາກເຟສບຸກ “ຕາມຄຳທ້າ”. ຂະນະທີ່ບໍລິສັດຊອຟແວ “ໂມຊິລລາ” ແລະ ທະນາຄານ “ຄອມເມີຊບັງ” ໜຶ່ງໃນສະຖາບັນການເງິນລາຍໃຫຍ່ຂອງເຢຍລະມັນ ຖອນໂຄສະນາອອກຈາກເຟສບຸກແລ້ວ.
